Şou-biznes

Ana səhifə

Şou-biznes

İsmayıl Ömərov: “Ermənistan arzu edərsə, Bakıda keçiriləcək “Eurovision-2009” rəqs müsabiqəsində iştirak edə bilər”

11 fevral 2009 10:37 (UTC +04:00)

Bakı. Kəmalə Quliyeva – APA. “Eurovision 2009” rəqs müsabiqəsi bu ilin sentyabrın 26-da Bakıda keçiriləcək. APA-nın məlumatına görə, bu barədə İctimai Televiziya və Radio Verilişləri Şirkətinin (İTV) sədri İsmayıl Ömərov, “Eurovision 2009” rəqs müsabiqəsinin icraçı prodüseri Fərhad Hacıyev və müsabiqədə Azərbaycan nümayəndə heyətinin rəhbəri Adil Kərimlinin birgə keçirdikləri mətbuat konfransında məlumat verilib. İ. Ömərov bildirib ki, bütün Şərqdə və Qafqazda “Eurovision” rəqs müsabiqəsi ilə dəfə olaraq Azərbaycanda keçiriləcək. “Eurovision 2009” rəqs müsabiqəsinin tenderində qalib gəlməyin bir sıra şərtləri olduğunu deyən İ. Ömərovun sözlərinə görə, bunun üçün ölkə - stabil və turistlərin təhlükəsizliyinə təminat verən ölkə olmalıdır: “Sentyabrın 26-da möhtəşəm bir tədbir olacaq. Dünya bir daha Azərbaycan gözəlliklərinin, böyük musiqi mədəniyyətinin, tərəqqisinin şahidi olacaq”. İ. Ömərov bildirib kİ, ötən il bu müsabiqədə 24 ölkə təmsil olunub. Bu il isə iştirakçı ölkələrin sayının artacağı gözlənilir. Azərbaycandan müsabiqədə iştirak edəcək şəxslərin seçiminin çox ciddi aparılacağını deyən İTV rəhbəri hələlik ölkəmizi təmsil edən iştirakçıların adlarının bəlli olmadığını deyib. O qeyd edib ki, kifayət qədər böyük maliyyə vəsaiti tələb etdiyindən İTV müsabiqənin təşkili üçün artıq bir sıra dövlət qurumlarına müraciət edib. Lakin İTV rəhbəri “Eurovision 2009” rəqs müsabiqəsinin Azərbaycana neçəyə başa gələcəyini açıqlamayıb: “Biz hələ Azərbaycana nə qədər turist gələcəyini bilmirik. Ona görə də konkret rəqəm desək, səhv olar. Sentyabrın əvvəlində bu barədə dəqiq məlumat verəcəyik”. İ. Ömərov qeyd edib ki, “Eurovision 2009” rəqs müsabiqəsinin aparıcıları dünyanın ən məşhur ulduzları olacaq. Lakin həmin ulduzun kimliyi bir neçə aydan sonra açıqlanacaq.

Qeyd edək ki, hələlik müsabiqədə iştirak edəcək ölkələrin sayı dəqiq məlum deyil. Müsabiqədə Ermənistanın iştirakına gəlincə, İ. Ömərov bildirib ki, əgər bu dövlətin belə bir arzusu olsa, bu müsabiqədə təmsil oluna biləcək: “Avropa Yayım Birliyinin nizamnaməsinə və “Eurovision”un tələblərinə əsasən, siyasi motivlərə, irqi ayrı-seçkiliyə uymaq olmaz. Ona görə də Ermənistan müsabiqədə iştirak etsə, onun iştirakı üçün tam şəraiti yaradılacaq. Buna qədər də Ermənistan idmançıları Azərbaycanda keçirilən müəyyən yarışlarda iştirak ediblər və heç bir insident baş verməyib”. Azərbaycan mehmanxanalarının və yollarının ölkəyə gələcək iştirakçıları və turistləri qarşılamağa nə dərəcədə hazır olmasına gəldikdə İ. Ömərov qeyd edib ki, paytaxtın infrastrukturu ən azı 10 min turisti yerləşdirməyə imkan verir: “Turistlərin sayı bundan çox olsa da, biz onları yerləşdirə biləcəyik. Tıxaclara gəlincə, hər bir ölkədə belə tıxaclar var. Müsabiqə keçirilənə qədər yəqin ki, yollardakı tikintilər də başa çatacaq”.