Şou-biznes

Ana səhifə

Şou-biznes

Abbas Bağırov: ““A trio” qrupuna yeni üzvlər axtarıram”

20 fevral 2009 15:00 (UTC +04:00)

Bakı. Ülkər Qasımova-APA. Müğənni Abbas Bağırov rəhbərlik etdiyi “A trio” qrupunu yenidən yaradacaq. APA-nın məlumatıan görə, müğənni bu gün keçirdiyi mətbuat konfransında qrupun fəaliyyəti ilə bağlı yeni açıqlamalar verib. Sənətçinin sözlərinə görə, o “A trio” qrupuna yeni gənclərin cəlb edilməsi üçün bu ayın 27-də Rəşid Behbudov adına Dövlət Mahnı Teatrında kastinq keçirəcək: “Kastinq bir gün keçiriləcək və bu kastinqdə 19 yaşından 26 yaşına kimi gənc istedadlar iştirak edə biləcəklər. Kastinqlərdə mənim də təmsil olunduğum münsiflər heyəti iştirak edəcək. Həmin münsiflər heyətində tanınmış bəstəkarların iştirakı ilə yanaşı, qrupun əvvəlki üzvlərindən Ramal və Vüsal da olacaq”.
A. Bağırov onu da açıqlayıb ki, yenidən yaradılacaq “A trio” qrupuna bir qız, iki oğlanı cəlb etmək niyyətindədir: “Həm görünüş, həm də format etibarı ilə birinci qrupdan seçilməsini istəyirəm. Qrupa ancaq musiqi təhsili olan gəncləri cəlb edəcəyəm. Həm savadı, həm də istedadı olan gənclər “A trio”nun üzvü olmaq şansı qazanaa bilərlər. Yeni yaradacağım eyniadlı qrup bir il ərzində ancaq öz üzərlərində işləməklə məşğul olacaq. Bu müddət ərzində isə birinci “A trio” qrupu öz fəaliyyətini davam etdirəcək. Mən “A trio” qrupunu toylar üçün yaratmamışam və daima da bu fikrimdə qalacağam”.
“A trio” qrupunun dağılmasına gəlincə, sənətçi bunu təkzib edib: “Birinci “A trio” qrupu dağılmayıb. Qrupun dağılması ilə bağlı deyilənlərin hamısı yalandır. Sadəcə olaraq, qrup üzvləri solo karyeraya başlamaq niyyətlərini açıqladılar. Mən də bu qrupda olmaq istəməyənləri məcburi şəkildə saxlaya bilmərəm. Əminəm ki, ikinci “A trio” qrupu daha da uğurlu layihələrə imza atacaq”.