Şou-biznes

Ana səhifə

Şou-biznes

Azərbaycanın “Eurovision-2009” təmsilçiləri Hadisə ilə birgə konsert verə bilər

02 mart 2009 13:12 (UTC +04:00)

Bakı. Ülkər Qasımova - APA. Bu ilin mayında Moskvada keçiriləcək “Eurovision -2009” mahnı yarışmasında Azərbaycan təmsilçiləri Aysel Teymurzadənin və Araş Türkiyənin bu yarışmada təmsilçisi Hadisə ilə birgə konsert verə bilər. Bunu APA-ya açıqlamasında “Eurovision” yarışması üzrə Azərbaycan nümayəndə heyətinin rəhbəri Adil Kərimli deyib. O bildirib ki, mayın 1-də Bakıda Heydər Əliyev Sarayında konsert verəcək Hadisə ilə Azərbaycan təmsilçilərinin bir səhnədə çıxış etməsi üçün onlara təklif gəlib: “Bununla bağlı sadəcə olaraq fikir var. Bu təklif dəyərləndirilib və nəzərdən keçirilib. Sadəcə olaraq vaxtla bağlı bəzi problemlər var. Təmsilçilərimizin artıq yüklənməməsini istəyirik. Əgər bununla bağlı hər hansısa problem olmasa, bu layihə mütləq həyata keçiriləcək”.

A. Kərimli Azərbaycan təmsilçilərinin “Eurovision-2009” mahnı yarışmasında ifa edəcəkləri “Always” mahnısının son variantı üzərində aparılan işlərin artıq başa çatmaq üzrə olduğunu açıqlayıb: “Bu mahnının çox qısa zamanda təqdimatı nəzərdə tutulur. Araşın Bakıya gəlməsi ilə bağlı hələ dəqiq bir məlumat yoxdur. Gəlmək vaxtı müəyyənləşən kimi təbii ki, onun səfərənini vaxtı mətbuata və ictimaiyyətə açıqlanacaq. Burada sirli heç bir şey yoxdur”. Nümayəndə heyətinin rəhbəri bildirib ki, martın 16-na kimi bu yarışmada təmsil olunacaq ölkələrin həm mahnısı, həm də ifaçısının dəqiqləşməsi mütləqdir. Ancaq təmsilçilərin kliplərinin hazır olub-olmaması o qədər də vacib şərt deyil: “Klip hazır olmaya da bilər. Əsas odur ki, martın 16-da mahnı audio formasında təqdim olunsun. Onф klip çəkilməsi məsələsi sonra da həyata keçirilə bilər. Yəni bu şərt deyil”.

Azərbaycan təmsilçilərinin ilk onluğa daxil olacağına əminliyini bildirən nümayəndə heyətinin rəhbəri, bu nəticəni əldə etmək üçün Azərbaycanın çox güclü təmsilçi və mahnıya sahibləndiyini əsas gətirib: “Çünki iştirakçılarımızın özləri də, oxuma tərzləri də, mahnı da bu sözü deməyə bizə imkan verir. Hər halda ilk onluğa düşəcəyimizə əminik. Hələlik yarışmada Azərbaycanın ən güclü rəqibinin hansı ölkənin təmsilçisini olduğunu da demək çox çətindir. Ancaq martın 16-dan sonra bunu söyləmək mümkün olacaq”. Onu da deyək ki, bu il ötən ildən fərqli olaraq yarışmada təmsil olacaq ölkələrin iştirakçısının Bakıya gəlməsi nəzərdə tutulmayıb: “Eurovision-2009” yarışmasında iştirak edəcək ölkələrin təmsilçilərinin promo-tur çərçivəsində Bakıya gəlməsi nəzərdə tutulmayıb. Bununla bağlı onların sorğusu və ya arzusunu almamışıq”.

Promo-turların həyata keçirilməməsi məsələsinə gəlincə A.Kərimli bildirib ki, bu təbliğat forması artıq “Eurovision”un təcrübəsindən çıxmaq üzrədir: “Çünki promo-turların təbliğat effekti çox aşağı düşüb. Bu səbəbdən promo-turlar planlaşdırmırıq. Əsas məsələ odur ki, təbliğat tək promo-turla həyata keçirilmir. Azərbaycan təmsilçilərinin təbliğ olunması üçün biz başqa vasitələrdən istifadə edəcəyik. Bu yarışmada iştirakçı dövlətlərin xarici televiziya kanallarında ayrı-ayrı formalarda təqdimatını nəzərdə tuturuq. Bu da təbliğatın əsas formasıdır. Hətta demək olar ki, biz artıq bu təbliğat vasitələrdən istifadə etməyə başlamışıq. Bizim təmsilçilərimizin video yazıları iştirakçı dövlətlərin televiziya kanallarına təqdim olunub. Hətta xarici mətbuatda onların piar-kampaniyası gedir”. A. Kərimli “Eurovision -2009” musiqi yarışmasında Türkiyəni təmsil edəcək müğənni Hadisənin artıq bir çox ölkələrdə konsertlər verməsi ilə xal toplaması fikrini də yanlış hesab etdiyini açıqlayıb: “Promo-tur artıq köhnəlmiş bir fikirdir. O demək deyil ki, Hadisəyə xal qazandıran promo-turlarda iştirakı olacaq”. Aysel Teymurzadə və Araşın “Eurovision-2009” ifa edəcəkləri “Always” mahnısına klip çəkilişlərinə martın ortalarından başlanılacaq. A. Kərimlinin sözlərinə görə, artıq bununla bağlı ilkin hazırlıq işlərinə start verilib.