Şou-biznes

Ana səhifə

Şou-biznes

Sibel Can Heydər Əliyev Sarayında konsert proqramı ilə çıxış edib

09 mart 2009 09:36 (UTC +04:00)

Bakı. Ülkər Qasımova-APA. Türkiyəli müğənni Sibel Can martın 8-də Heydər Əliyev Sarayında konsert proqramı ilə çıxış edib. APA-nın məlumatına görə, 8 Mart - Beynəlxalq Qadınlar Gününü Bakıda keçirməkdən məmnunluq duyduğunu söyləyən S. Can öncə Azərbaycan xanımlarını təbrik edib: “Mən bu gün bütün Azərbaycan xanımlarını təbrik etmək üçün buraya gəlmişəm. Çox sevinirəm ki, konsertim məhz bu önəmli gündə keçirilir. Bütün qadınlara xoşbəxt həyat və ömürlük sevgi arzulayıram”.

Daha sonra repertuarında yer alan köhnə və yeni mahnılarını ifa edən sənətçi ara-sıra tamaşaçılarla da ünsiyyətə girib. S. Can Ələkbər Tağıyevin “Sən gəlməz oldun” mahnısını ifa edərkən konsert salonunun tamaşaçı zalını gəzib. Müğənni bəzi həmkarlarından fərqli olaraq pərəstişkarları ilə xatirə şəkli çəkdirməkdən imtina etməyib.

Xanım sənətçi Heydər Əliyev Sarayının əsaslı təmirdən sonra çox möhtəşəm olduğunu da dilə gətirib: “Mənim Bakıda sonuncu böyük konsertim dörd il öncəyə təsadüf edib. Həmin vaxt bu möhtəşəm saray hələ təmir olunmamışdı. Ancaq o zaman da bura çox gözəl idi. İndi isə bu saraya baxıb həsəd aparmamaq mümkün deyil”.

Müğənni tamaşaçıların ona gül dəstəsi verməsini olduqca xoş qarşılayıb. Hər gəlişində Azərbaycan tamaşaçısına daha çox heyran olduğunu vurğulayan türkiyəli müğənni “Azərbaycan tamaşaçısına və onların gətirdiyi gül dəstələrinə heyranam” söyləyib. Repertuarındakı ritmik mahnılara də yer ayıran S. Can adəti üzrə rəqqasəlik qabiliyyətini nümayiş etdirib.

İki saatdan artıq çıxış edən sənətçi çox sevilən “Bərivan” mahnısını da tamaşaçılara ərməğan edib. S. Can 21 mahnının hamısını canlı oxuyub. Onunla birgə Furkan Biçer də iki mahnı ifa edib. Konsertin sonunda S. Can yaxın vaxtlarda yenidən Azərbaycanda konsert vermək arzusunu dilə gətirib.

Konsertdən sonra media mənsublarının suallarını cavablandıran sənətçi konsertdən çox razı qaldığını söyləyib: “Tamaşaçıların ilgisi məni sadəcə məftun etdi. Hər şey o qədər gözəl idi ki, səhnədən ayrılmaq istəmirdim”.

Qeyd edək ki, “Səs Organization”un rəhbəri Nahid Emiloğlunun təşkil etdiyi konsertin informasiya dəstəyi APA-ya məxsusdur.