Şou-biznes

Ana səhifə

Şou-biznes

Sərdar Ortac Baloğlan Əşrəfovun əlindən öpüb - FOTOSESSİYA

Sərdar Ortac Baloğlan Əşrəfovun əlindən öpüb - <font color=red>FOTOSESSİYA</font>

30 mart 2009 07:47 (UTC +04:00)

Bakı. Ülkər Qasımova-APA. Dünən Heydər Əliyev Sarayında türkiyəli müğənni Sərdar Ortac xüsusi olaraq Bakıdakı pərəstişkarları üçün hazırlamış proqramla çıxış edib. APA-nın məlumatına görə, saatların yay vaxtına keçməsinə baxmayaraq, tamaşaçıların zala vaxtında gəlməsi maraqla qarşılanıb. Sərdar Ortac deyilən vaxtdan 40 dəqiqə sonra səhnəyə çıxıb və çıxışına “Həyəcan” mahnısı ilə başlayıb. Bu mahnının ifa etdikdən sonra çox həyəcanlı olduğunu və bu səbəbdən də konsertə bu mahnı ilə başladığını bildirib: “Azərbaycanın böyük oğlu Heydər Əliyevin adını daşıyan sarayda oxumaqdan qürur duyuram. Bu gün tam fərqli bir konsert olacaq. Öz mahnılarımla yanaşı Azərbaycan mahnılarını da ifa edəcəyəm. Baloğlan Əşrəfovu səhnəyə dəvət edib, onun əlindən öpəcəyəm”. Konsertin başlanğıcında əsasən lirik mahnılara üstünlük verən Sərdar Ortac, konsertin vaxtının dəyişilməsinə də aydınlıq gətirib: “Böyük bir təyyarədə mənə yer tapılmadı. Amma buna baxmayaraq sizə olan sevgim bir gün gec olsa da məni bura gətirdi”.

Qeyd edək ki, Sərdar Ortac Bakıya özəl təyyarə ilə gəlib. Proqram boyu əsasən köhnə repertuarındakı mahnılara yer ayıran müğənni daha bir azərbaycanlı müğənni Məhəbbət Kazımovun repertuarından da mahnı ifa edib. Sənətçi, Azərbaycan estrada müğənnilərini tanıdığını bildirsə də, ürəyinə daha çox xalq mahnılarımızın, muğamlarımızın yaxın olduğunu dilə gətirib. Sərdar Ortac elə səhnədə ikən Türk xalqını Azərbaycan musiqisinin gözəlliyini dərk etməməkdə günahlandırıb: “Bizimkilər azəri mahnısı deyəndə, “Daşlı qala”nı söyləyirlər. Azərbaycan musiqisi tək “Daşlı qala”dan ibarət deyil. Sizin muğamlarınız dünyanın ən gözəl musiqi nümunəsidir”.

Konsert bir sıra maraqlı məqamları ilə də yadda qalıb. Belə ki, müğənninin Azərbaycan mahnılarına müraciət etməsi, bu mahnıları milli musiqi alətlərimiz olan tar və kamanla ifa etməsi xüsusi marağa səbəb olub. Sərdar Ortacı tarda Humay Qədimova, kamançada isə Sevinc Bağıyeva müşayiət edib. Tamaşaçılarla bolluca zarafat edən müğənni onlara yaxın olmaq üçün “Şeytan” mahnısını ifa edərkən tamaşaçıların yanına gəlib. Digər müğənnilərin konsertindən fərqli olaraq, iki saatlıq proqramda tamaşaçılar Sərdar Ortaca böyük dəstək olublar. Türkiyəli müğənni “Nar çiçəyim”, “Qara bibərim”, “Unut getsin”, “Ürəyimdən yaralı” və digər mahnılarını Bakıdakı tamaşaçılara ərməğan edib. Baloğlan Əşrəfovun “Nədəndir” mahnısını ifa etdikdən sonra onu səhnəyə dəvət edib. Onun əllərindən öpən Sərdar Ortac B. Əşrəfovdan canlı olaraq bir mahnı oxumağı rica edib. Baloğlan Əşrəfovun da ifası tamaşaçılar tərəfindən alqışlarla qarşılanıb. S. Ortac konsertində iştirak edən və bu mahnının söz müəllifi olan Əlibala Hacızadə ilə də tanış olub və onun qarşısında baş əyib. Röyanı, Elşad Xoseni tanıdığını qeyd edən müğənni, onların musiqisini tam bəyənmədiyini vurğulayıb. Konsertin sonunda meyxana ustası Namiq Qaraçüxurlunun “Papanın gül balası” meyxanasından bir parça oxumağı isə maraqla qarşılanıb. O, sonra Namiq Qaraçuxurluya salamlarını göndərməyi unutmayıb. Sərdar Ortac səhnədə bek-vokalçısı ilə gözəl rəqs nümayiş etdirib. Konsertdə maraqlı məqamlardan biri də Sərdarın truba, davul və digər musiqi alətlərində gözəl ifaçılıq qabiliyyətini nümayiş etdirməsi olub. Pərəstişkarlarından biri S. Ortaca kamança, tar və qavalın simvolu əks olunmuş suvenir hədiyyə edib. Müğənni səhnədə olarkən zarafatyana internetə də öz təşəkkürün bildirib: “İnternetin mənim Azərbaycan mahnılarını oxumağımda çox böyük rolu var. Yoxsa, mən bu cür gözəl Azərbaycan mahnılarını duymaqdan məhrum olardım”. O, proqramını “Həyəcan” mahnısı ilə bitirib. Qeyd edək ki, “Səs Organization”un təşkilatçılığı keçirilən konsertin informasiya dəstəyi APA-ya məxsusdur.