Şou-biznes

Ana səhifə

Şou-biznes

Müğənni İradə İbrahimovanın toyu olub - FOTOSESSİYA - VİDEO

Müğənni İradə İbrahimovanın toyu olub - <font color=red>FOTOSESSİYA - VİDEO</font>

05 aprel 2009 20:11 (UTC +04:00)

Bakı. Ülkər Qasımova - APA. Bu gün Bakıda müğənni İradə İbrahimovanın toy mərasimi keçirilib. APA-nın məlumatına görə, İ. İbrahimova Ceyhun İzzət adlı Azərbaycan əsilli türk biznesmenlə ailə qurub. Toydan əvvəl Mirmöhsün Ağanın məzarını ziyarət edən bəylə gəlin saat 20.00-da mərasimin keçirildiyi şadlıq evinə gəliblər. İradə İbrahimova Türkiyədə hazırlanan ağ, sadə gəlinlik paltarında gələcək həyat yoldaşı ilə birgə qeyri-adi bir şəkildə mərasimə təşrif buyurublar. Pərdələrlə örtülmüş səhnə elə bəy və gəlin üçün açılıb. Toyun keçirildiyi sarayın ətrafı mühafizəçilər tərəfindən nəzarətə götürülüb. Qonaqlar adları siyahıda yoxlanıldıqdan sonra içəriyə buraxılıblar. Televiziyalar və fotoqraflar zalda yoxdur. Toyu əməkdar artist Ənvər Sadıqovun rəhbərliyi altında müğənni Abbas Bağırov idarə edib. Tamadalıq isə Nəsib Nura həvalə olunub. Zal və masalar qırmızı gül və şamlarla bəzədilib. Bəylə gəlin zala gəlməzdən əvvəl masaların üzərinə yeməklər düzülməyib. Sadəcə, hər qonaq üçün bir qızılgül və şirinlik olaraq konfet qoyulub. Bəylə gəlin mərasimə qatıldıqdan sonra təamların paylanmasına başlanıb.

Səbəbkarlar üzüklərini dəyişdikdən sonra qonaqları salamlayıblar. İ. İbrahimova toy üçün yaranmış xüsusi ssenaridən kənara çıxaraq, Brilyant Dadaşovanın repertuarından “Səninəm” mahnısını bəy üçün oxuyub və onlar birgə ilk rəqslərini ediblər. Toyda millət vəkili Səməd Seyidov həyat yoldaşı ilə, Anar Məmmədxanov, Faiq Sücəddinov, Baba Vəziroğlu, Zülfiyyə Xanbabayeva, Arif Babayev, Tünzalə Ağayeva, Vüqar Camalzadə, Nailə Mirməmmədli, Faiq Ağayev, Elnarə, Manana və Georgi, Murad Dadaşov, Sevda və Elmira Ələkbərzadələr, Ülviyyə Könül və digər şəxslər iştirak ediblər.

Bəzi qonaqlar gül çələngləri ilə gəliblər. Ümumilikdə mərasimə 600 nəfərin dəvət edildiyi bildirilir. Bəzi qonaqlar restoranın şəhərdən bir qədər kənarda olması səbəbindən mərasimə gecikiblər. Toyda İ. İbrahimovanın atası və anası iştirak edir. Bəyin atası səhhətində problemlər olması səbəbindən toyda olmasa da, mərasimdə iştirak edən anası Zafer xanım qonaqları salamlayıb, yeni evlənənlərə xeyir-dua verərək, onlara xoşbəxtlik arzulayıb. Toyda Türkiyədən də qonaqlar iştirak edib. “Azəri qızı” Günel də qardaşı Tunarla birgə mərasimə qatılıb.

Bəylə gəlin bütün qonaqlarla ayrı-ayılıqda görüşüb, onları rəqsə dəvət edib. F. Sücəddinov pianoda musiqi ifa edib. Gəlini mələyə bənzədən T. Ağayeva onun şərəfinə “Sarı gəlin” mahnısını ifa edib. Bunun ardınca isə o, Türkiyədən gəlmiş qonaqların şərəfinə türk mahnısı oxuyub. Həm oğlan evi, həm qız evi, həm də bəylə gəlin T. Ağayeva ilə birlikdə həmin mahnısı ifa ediblər.

Aşıq Zülfiyyə toyda İradənin arzusu ilə aşıq havaları çalıb. “Natiq” Ritm Qrupu “Sarı gəlin” kompozisiyasını ifa edib. Toydan çox konsert proqramını xatırladan mərasimdə gəlinin çox şən olduğu diqqət çəkib. “Azəri qızı” Günelin “Adı yok”, “Azərbaycan-Türkiyə” və “Qaragöz” mahnılarını ifa etməsi ilə məclis daha da qızışıb. Gəlin həyat yoldaşı ilə birgə “Cütçü” rəqsini oynayıb. Bəy Azərbaycan rəqslərini oynaya bilməsə də, buna cəhd edib. Toy mərasimində yaddaqalan məqamlardan biri də bəyin oğurlanması olub. İ. İbrahimova 15 dəqiqə ərzində həyat yoldaşını axtarıb. Bəyi oğurlayan rəqqaslar isə gəlinin atasından şirinlik aldıqdan sonra Ceyhun bəyi qaytarıblar. Mərasimdə gəlin və bəy onlar üçün xüsusi hazırlanmış tortu da bərabər kəsərək, adət-ənənə üzrə bir-birini yedizdiriblər. Toy mərasimi gecə yarısına kimi davam edib.

Qeyd edək ki, İ. İbrahimova ilə Ceyhun İzzət 2001-ci ildə tanış olub. Ötən il isə İ. İbrahimova ailəsi ilə birgə İstanbulda olarkən C. İzzət müğənniyə ailə qurmağı təklifi edib və ona üzük verib. İ. İbrahimova da onun bu təklifini qəbul edib.

Onu da əlavə edək ki, oğlan toyu aprelin 19-da İstanbulda keçiriləcək.