Şou-biznes

Ana səhifə

Şou-biznes

Flora Kərimova: “Faiq Ağayevlə heç zaman barışığa getmərəm”

08 aprel 2009 10:58 (UTC +04:00)

Bakı. Ülkər Qasımova-APA. “Mən həyatı boyu Faiq Ağayevlə barışığa getmərəm və getməyəcəyəm də. Faiq nəyə ümid edir? Sənin istəyin alınmayacaq”. Bu sözləri APA-ya açıqlamasında Azərbaycanın xalq artisti Flora Kərimova deyib. Xalq artisti Faiq Ağayev və vəkili Kamil Məmmədovun mətbuata yaydıqları birgə bəyanatda “Flora Kərimovanın nümayəndəsi Qurban Məmmədov barışıq təklifi ilə çıxış edib” sözlərinə münasibət bildirən Flora Kərimova bildirib ki, Faiq Ağayevə qarşı qaldırdığı iddia ərizəsində qeyd etdiyi bütün sözlərinin sübutu var: “Mənim əlimdə ona dediyim bütün sözlərin sübutu var. Şahidim mediadır, jurnallardır, rəylərdir.
Faiq Ağayev mənə qarşılıqlı ərizə iddiası qaldırıb. O ərizənin hər sözü o qədər zəifdir ki, bilmirəm Faiq mənə qarşı bu ərizəni verəndə nə düşünüb, nə fikirləşib. Faiqin mənim əleyhimə yazdığı iddia romanının heç əhəmiyyəti də yoxdur. Faiq barışığa barmaq yeri də qoymadı. Qurban Məmmədovla ailəvi dostuq və ona çox güvənərəm. O istəmir ki, mənim əsəblərim tarıma çəkilsin. O deyir ki, sən yaradıcı insansan və bu lazım deyil. O öz adından bu sözü səsləndirib. O da ötəri olaraq bir söz deyib ki, “mən istəyərdim ki, bunlar barışsınlar və heç birinin adı məhkəmələrdə hallanmasın”. Bunu isə mənim barışığa getmək arzum və ya addımım kimi qəbul etmək çox yanlışdır. Çox xahiş edirəm ki, media bununla bağlı məsələlərdə həssas olsun. Qurban müəllim orada öz fikrini deyəndə mənim o biri vəkillərim bu fikrin əleyhinə olduqlarını deyiblər. Mənim fikrimi təsdiqləmək üçün yenə də vəkilim İlhamə Həsənova hakimin icazəsi ilə zaldan çıxıb mənimlə əlaqə saxladı. Soruşdu ki, “Flora xanım, bəlkə son 5-10 dəqiqə ərzində fikrinizi dəyişmisiniz, barışığa getmək istəmisiniz?” Dedim “yox, ola da bilməz”. Qurban müəllimin səyi ancaq və ancaq mənim səhhətimi qorumaq səyi idi. Mən iddia ərizəmdə göstərdiyim bütün sözləri sübut edəcəyəm və sübutlarım da yetərlidir. Faiq Ağayevin fiziki dəyişikliyə məruz qaldığı hamının gözü qabağındadır. O yazılarında mənim öz həyat yoldaşımı öldürdüyümü qeyd edib. Axı bu kağızda onun nədən öldüyü yazılıb. Əgər Faiqin əlində qanuni qüvvəyə minmiş məhkəmə hökmü yoxdursa, bu, artıq böhtandır. Faiq bu böhtana görə cavab verməlidir”.

Qeyd edək ki, Faiq Ağayevin mətbuat xidmətinin və vəkili Kamil Məmmədovun yaydığı mətbuat açıqlamasında bildirilir ki, Yasamal rayon məhkəməsində xalq artisti Flora Kərimova və Azərbaycan İslam Demokrat Partiyasının sədri Tahir Abbaslının xalq artisti Faiq Ağayevə qarşı qaldırdığı iddia üzrə keçirilən məhkəmə iclasında F. Kərimovanın nümayəndəsi Qurban Məmmədov barışıq təklifi ilə çıxış edib. Hakim bu məsələyə məhkəmənin növbəti iclasında baxılacağını söyləyib.