Şou-biznes

Ana səhifə

Şou-biznes

Namiq Qaraçuxurlu sənətə gəlişinə görə iş adamı Telman İsmayılova təşəkkür edib – FOTOSESSİYA - VİDEO

Namiq Qaraçuxurlu sənətə gəlişinə görə iş adamı Telman İsmayılova təşəkkür edib – <font color=red>FOTOSESSİYA - VİDEO</font>

17 aprel 2009 08:38 (UTC +04:00)

Bakı. Ülkər Qasımova-APA. Aprelin 16-da meyxana ustası Namiq Qaraçuxurlu ilk solo-konsert proqramı ilə çıxış edib. APA-nın məlumatına görə, “Səs Organization”un təşkilatçılığı ilə “Rəvayət” adı altında keçirilən konsert bir sıra maraqlı məqamlarla yadda qalıb. Meyxana ustası üç saatlıq proqramında həm yeni, həm də köhnə meyxanalarını tamaşaçılarına ərməğan edib. Gecədə Namiq Qaraçuxurlunun ailə üzvləri, qohumları, dostları Xatirə İslam, Murad Dadaşov, Fərda Xudaverdiyev, meyxanaçı həmkarları iştirak edib. Namiq Qaraçuxurlu qara kostyumla, üstü “Swarovski” qaşlarla bəzədilmiş qalstukla tamaşaçıların qarşısına çıxıb. Onun geyimi xüsusi olaraq səhnə tərtibatı ilə uyğunlaşdırılıb. Səhnəyə qoyulan “Swarovski” qaşlarla bəzədilmiş not dəftəri də diqqətləri cəlb edib. Səhnədən tamaşaçı bolluğunu görən meyxanaçı proqramda dəyişiklik edəcəyini elan edib. O, “Sənətkar heç kimdir millət olmasa” misralarını meyxana ilə davam etdirib. Bundan sonra isə N. Qaraçuxurlu sənətdəki ilk addımlarında ona dəstək olan Moskvada yaşayan azərbaycanlı iş adamı “AST Telman” kimi tanınan Telman İsmayılova böyük təşəkkürünü bildirib: “Bu gün mənim səhnədə və sizlərin qarşısında olmağımın səbəbkarı məhz odur. Sənət yolumda mənə bu dəstəyi verdiyi üçün minnətdaram”.

Proqram üçün hazırlanan ssenaridə konsertin adına uyğun idi. Konsertdə hər üç meyxanadan bir səhnədə quraşdırılmış ekranda müxtəlif mövzulara həsr olunmuş rəvayətlər nümayiş olunub. N. Qaraçuxurlunun canlı ansamblın müşayiəti ilə oxuduğu bütün mahnılar tamaşaçıların alqışları ilə qarşılanıb. Namiq söz verdiyi kimi, muğamla meyxananı sintez edərək, “Qar yağacaq” mahnısını tar-kamanın müşayiəti ilə oxuyub. Daha sonra meyxana ustasının qardaşı oğlu səhnəyə çıxaraq, əmisinə, “Aygün hardadır” sualı ilə müraciət edib. Bundan sonra meyxanaçı duet ortağı, xalq artisti Aygün Kazımovanı səhnəyə dəvət edib. Populyar cütlük tamaşaçıların alqışları altında “Dedi-qodu” və “Dözmədi qəlbim” duetini oxuyublar. Aygün Kazımovanın səhnəyə çıxarkən N. Qaraçuxurlunun həyəcan keçirməsi tamaşaçıların da diqqətinə səbəb olub. Duet ortağını səhnədə görər-görməz meyxana ustası mahnının sözlərini unudaraq, bunu Aygün Kazımovanı görüb özünü itirməsi ilə əlaqələndirib. Tamaşaçıların N. Qaraçuxurluya çoxsaylı gül dəstələri təqdim etməsi A. Kazımovada belə bir fikir formalaşdırıb: “Bu gün Aygünün son anlarıdır, məni qoyub Namiqə gül dəstələri verirlər”. Bu ifadəsindən sonra isə xalq artisti sözünün zarafat olduğunu bildirib.

Həm duet, həm də çox böyük məhəbbət yaşayan cütlük elə sevgilərini səhnədə də nümayiş etdiriblər. Onlar hər iki dueti əl-ələ tutaraq ifa ediblər. A. Kazımova N. Qaraçuxurluya müraciət edərək “Bu gün bayram günüdür, çünki sənin ilk solo-konsertindir. Yəni bir insanda da bu qədər istedad cəmləşə bilər? Sənən halal olsun, Namiq” deyib. Namiqin öz qohumlarının gətirdiyi gül çələnglərini Aygün Kazımovaya təqdim etməsi xalq artistinin maraqlı mesajı ilə müşayiət olunub: “Baxın görürsünüz ki, Namiqin qohumları gül dəstələrini mənə verirlər. Sonra da deyirlər ki, Namiqin qohumları məni qəbul etmirlər”. Bəyaz, uzun gəlinlik paltarını xatırladan geyimlə səhnəyə çıxan Aygün Kazımova ilə qara kostyum geyinmiş Namiq Qaraçuxurlu səhnədə gəlin və bəyə bənzəyiblər. Daha sonra Namiq Qaraçuxurlu dünyasını dəyişən ustad meyxanaçıları anaraq, səhnəyə öz həmkarlarını dəvət edib, həmkarları Ağamirzə, Mehman, Xəyyam, Aydın Xırdalanlı ilə deyişib. Əməkdar artist, muğam ifaçısı Zabit Nəbizadə ilə Namiq Qaraçuxurulunun meyxana və muğamı sintez etmələri tamaşaçıların marağına səbəb olub. Konsertin sonunda isə meyxana ustası yeni yazdığı “Rəvayət” meyxanasını ifa edib. Konsertdən sonra jurnalistlərə müsahibə verməyi də unutmayan N.Qaraçuxurlu kosnertdən çox məmnun qaldığını vurğulayıb. Qeyd edək ki, “Səs Ornagizanion”un təşkilatçılığı ilə keçirilən konsertin informasiya dəstəyi APA-ya məxsusdur.