Şou-biznes

Ana səhifə

Şou-biznes

Yaqub Zurufçu: “Azərbaycan vətəndaşı olmaq üçün ABŞ vətəndaşlığından imtina etməyə hazıram”

17 aprel 2009 15:22 (UTC +04:00)

Bakı. Ülkər Qasımova-APA. Aprelin 26-da Azərbaycan Dövlət Filarmoniyasında Yaqub Zurufçunun yaradıcılıq gecəsi keçiriləcək. Bu barədə APA-ya açıqlama verən Y. Zurufçu bildirib ki, konsertin bədii rəhbəri və baş dirijoru Ağaverdi Paşayevdir. Konsertdə Y. Zurufçunu Azərbaycan Dövlət Xalq Çalğı Alətləri Orkestri müşayiət edəcək. Müğənni bildirib ki, yaradıcılıq gecəsi Məhəmməd Hüseyn Şəhriyarın xatirəsinə həsr olunacaq: “İlk dəfə belə bir səhnədə çıxış edəcəyəm. Bu tədbir dövlət səviyyəsində həyata keçiriləcək və konsertə mötəbər simalar dəvətlidirlər”.

Y. Zurufçu qeyd edib ki, konsert proqramında Məhəmməd Hüseyn Şəhriyarın sözlərinə bəstələdiyi yeni mahnıları da ifa edəcək. Y.Zurufşu bu mahnılarla yanaşı, bir neçə fars və Azərbaycanın, qədim, unudulan mahnılarını da oxuyacağını deyib.

Yaradıcılıq gecəsini keçirdikdən sonra isə sənətçi Amerikaya gedəcək: “İki ay orada qalacağam. Bu müddətdə bir neçə konsertimin təşkili nəzərdə tutulur”.

Azərbaycan vətəndaşlığı üçün artıq lazımi sənədləri təqdim etdiyini vurğulayan Y. Zurufçu yaxın vaxtlarda bu arzusunu gerçəkləşəcəyinə inandığını qeyd edib: “Ən böyük arzularımdan biri rəsmən Azərbaycan vətəndaşı olmaqdır. Bu arzumun yaxın vaxtlarda reallaşacağına ümid edirəm”.

O, Azərbaycan vətəndaşı olmaq üçün ABŞ vətəndaşlığından imtina etməyə hazır olduğunu da diqqət çatdırıb: “Azərbaycan vətəndaşı olmağım üçün tələb olunsa, Amerika vətəndaşlığından imtina edəcəyəm. Çünki Amerika mənə lazım deyil. Mən onların pasportundan yalnız gedib-gəlmək üçün istifadə edirəm. 25 il Amerikada yaşadım, ancaq dərdimə dərman olmadı. Mənim üçün Azərbaycan vətəndaşı olmaq hər şeydən vacibdir. İstəyirəm ki, mənə Azərbaycan vətəndaşı kimi müraciət olunsun, burada sözümü ABŞ vətəndaş kimi yox, məhz Azərbaycan vətəndaşı kimi qəbul etsinlər”.