Şou-biznes

Ana səhifə

Şou-biznes

Aysel Teymurzadənin atası: “Eurovision-2009” müsabiqəsində Türkiyə birinci yeri tutsa, biz ikinci olmağa razıyıq” - FOTOSESSİYA

Aysel Teymurzadənin atası: “Eurovision-2009” müsabiqəsində Türkiyə birinci yeri tutsa, biz ikinci olmağa razıyıq” - <font color=red>FOTOSESSİYA</font>

14 may 2009 12:59 (UTC +04:00)

Moskva. Ülkər Qasımova-APA. Azərbaycanı “Eurovision-2009” yarışmasında təmsil edən Aysel Teymurzadə və Araş bu gün axşam “Always” mahnısı ilə II yarımfinalda çıxış edəcəklər. APA-nın Moskvaya ezam olunmuş xüsusi müxbirinin verdiyi məlumata görə, yarımfinaldan bir gün əvvəl Aysel Teymurzadənin valideynləri qızlarını dəstəkləmək üçün müsabiqənin keçirildiyi Moskva şəhərinə gəliblər. Aysel Teymurzadənin atası Məhəmməd Teymurzadə APA-ya açıqlamasında qızına və onun duet ortağı Araşa uğurlar arzulayıb: “Mən qızıma və onun duet ortağına tam olaraq inanıram. İnşallah bu gecə bütün Azərbaycan xalqı sevinəcək. Çünki Aysellə Araş finala vəsiqə qazanacaqlar. Mən onların qələbəsinə inanıram”. M. Teymurzadə Aysel və Araşın ən güclü rəqiblərindən birinin Türkiyə təmsilçisi Hadisə Açıqgözün olduğunu qeyd edib: “Əgər Türkiyə birinci olsa, biz ikinci olmağa razıyıq. Onların qələbəsi bizim qələbəmizdir. Düzdür, bizim uğura çoxları sevinəcək. Ancaq unutmamaq lazımdır ki, bizi gözü götürməyənlər də var. Ona görə də elə çalışmalıdırlar ki, istəməyənlərin ürəyi partlasın”.
Qızının üzərinə çox böyük məsuliyyət düşdüyünü vurğulayan M. Teymurzadə ona bu yolda böyük uğurlar arzulayıb. O, Araşın Aysel uçun çox uğurlu duet ortağı olduğunu da istisna etməyib: “Yaşı az olmasına baxmayaraq, qızımın üzərinə çox böyük məsuliyyət düşür. Bu gecə bütün Azərbaycan xalqı ona və Araşa dua edir. Bu dualar yerdə qalmayacaq. Bu müsabiqə üçün Aysel öz üzərində çox çalışıb və çox əziyyət çəkib. Aysel və Araşın əziyyəti yerdə qalmayacaq. Azərbaycan qalib olacaq”. Bu müsabiqədə iştirakın çox çətin olduğunu deyən M. Teymurzadə, bütün dünya azərbaycanlılarından Aysel və Araşa dəstək olmalarını xahiş edib: “Bu tək bizim yox, bütün Azərbaycanın, Azərbaycan xalqının qələbəsi olacaq. Ona görə də bir olmalı və bacardığımız qədər təmsilçilərimizi dəstəkləməliyik. Onların əziyyəti yerdə qalmamalıdır. Ayselin 20 yaşını evdə onsuz qeyd etdik. Bütün qohumlarla, yaxınlarla birgə yığışıb Ayseli televizordan seyr etdik”.
Hazırda ciddi-cəhdlə yarımfinala hazırlaşan Aysel Teymurzadə isə APA-ya açıqlamasında əsas məşqlərin uğurlu keçdiyini də bildirib: “İlk məşqdə səsləndirmə, çəkiliş və geyimimlə əlaqədar bəzi problemlər oldu. Ancaq ikinci məşqdə hər şey daha uğurlu oldu. Ümumiyyətlə zalda tamaşaçıların çoxluğu mənə güc verir. Tamaşaçıların alqışları məni alovlandırır, daha gözəl çıxış etməyimizə zəmin yaradır”. A. Teymurzadə hər şeyin onların planlaşdırdığı kimi baş tutduğunu deyib. O mayın 12-də keçirilən I yarımfinalda çıxış edən sənətçilərdən təxmin etdiyi ölkə təmsilçilərinin finala vəsiqə qazandıqlarını vurğulayıb: “Deməli, hisslərim məni aldatmır. Birinci yarımfinalla bağlı necə fikirləşirdimsə, nəticə elə də oldu. Sadəcə finala keçəcəyini fikirləşdiyim bir ölkədə yanıldım, o da Belarus idi”. A. Teymurzadə bu məsuliyyətli yolda ailəsinin onun yanında olmasına çox məmnun olduğunu vurğulayıb: “Bir aydan artıq idi ki, valideynlərimi, bacılarımı görmürdüm. Bu gün hamısı mənim yanımdadır və mənə dəstək olacaqlar. Bu da mənə ayrıca güc verir”. Aysel Teymurzadənin duet ortağı Araş da bu gün Azərbaycan xalqını sevindirəcəklərini əminliklə vurğulayıb: “Bizim bu əziyyətimiz yerdə qalmayacaq. Mən buna tam olaraq inanıram. Biz bu gecə Azərbaycan xalqını finala vəsiqə qazanmamızla sevindirəcəyik. Bütün Azərbaycan xalqı bizdən dualarını əsirgəməsin. Bu dualara çox ehtiyacımız var”. Bu gecə “Eurovision” səhnəsində çıxış edəcək Azərbaycan təmsilçiləri Aysel və Araş bütün dünya azərbaycanlılarına da müraciət etməyib unutmayıblar: “Azərbaycandan səs göndərmək mümkün deyil. Bunun üçün bizə dünya azərbaycanlıları səs göndərsinlər. Bizim bu dəstəyə ehtiyacımız var. Dəstəyinizi bizdən əsirgəməyin”.