Şou-biznes

Ana səhifə

Şou-biznes

“Eurovision-2009”-un yarımfinalında Azərbaycandan olan münsiflər heyəti ən yüksək xalı Norveç təmsilçisinə verib - FOTOSESSİYA

“Eurovision-2009”-un yarımfinalında Azərbaycandan olan münsiflər heyəti ən yüksək xalı Norveç təmsilçisinə verib - <font color=red>FOTOSESSİYA</font>

19 may 2009 12:35 (UTC +04:00)

APA-nın məlumatına görə, bu sözləri “Eurovision-2009” yarışmasında Azərbaycanı təmsil edən və 42 ölkə arasında 3-cü yeri qazanan Aysel Teymurzadə və Araş bu gün keçirdikləri mətbuat konfransında deyiblər. Tədbirdə çıxış edən A. Teymurzadə nəticədən sonra Moskvada olan gənclər və idman naziri Azad Rəhimovun onların otağına gəldiyini, yüksək səviyyəli çıxışlarına görə təşəkkür etdiyini bildirib: “Artıq nəticələr açıqlandıqdan sonra dövlət başçısı İlham Əliyev də bizimlə telefon əlaqəsi saxladı. Dövlət başçısı bizi təbrik etdi və uğurlar arzuladı. Bizim müsabiqədə uğur qazanmayacağımızı deyənlər də var idi. Bu gün onlar bizim əldə etdiyimiz nəticəni görüb dedikləri sözə utanırlar”.

A. Teymurzadə Ermənistan təmsilçilərinin onlara uğurlar arzuladığını da açıqlayıb: “Hələ yarımfinaldan əvvəl Ermənistan təmsilçiləri bizə yaxınlaşıb mahnımızın çox gözəl olduğunu dedilər. Hətta bizə uğurlar arzuladılar. Mən onların bu hərəkətindən şoka düşdüm. Demək ki, bizim mahnımız və ifamız həqiqətən də çox gözəldir. Müsabiqənin finalında Azərbaycana 1 xal vermələri də bunun əyani sübutudur. Bizim mahnımız o qədər ürəyəyatan və sevilən idi ki, ermənilər özlərini saxlaya bilməyib, bizə səs verdilər”.

Azərbaycan təmsilçisi “Eurovision-2009” müsabiqəsində birincilik qazanan norveçli Aleksandr Rıbakın bu qələbəyə layiq olduğunu vurğulayıb: “Aleksandr birinciliyə layiq idi və bu yeri də qazandı. Biz müsabiqədə əvvəl də ən güclü rəqibimizin məhz Aleksandr olduğunu demişdik. Ancaq özümüzün də ilk üçlükdə olacağına əmin idik. Hisslərimiz bizi aldatmadı”.

İctimai Televiziya və Radio Yayımları Şirkətinin (İTV) nümayəndəsi və “Eurovision-2009” müsabiqəsinin şərhçisi Leyla Əliyeva Azərbaycanın beş nəfərdən ibarət münsiflər heyətinin 12 balı Norveç təmsilçisi Aleksandr Rıbaka verdiklərini də qeyd edib: “Azərbaycan tərəfindən münsiflər heyətində Vaqif Gərayzadə, Fəxriyyə Xələfova, Mübariz Tağıyev, Tünzalə Ağayeva, Mənzər Nurəliyeva təmsil olunurdu. Onlar öz səslərini məhz norveçli təmsilçiyə göndərmişdilər”.

İTV-nin ictimaiyyətlə əlaqə və monitorinq şöbəsinin rəhbəri Tahir Məmmədov “Eurovision-2009” mahnı müsabiqəsində aparılan səsvermə ilə bağlı fikirlərini bildirib. İTV rəsmisi səsvermənin obyektiv olduğunu vurğulayıb və heç bir şəkildə bu nəticələrin dəyişdirilməsinin mümkün olmadığını deyib: “Səslər Almaniyanın xüsusi olaraq bu iş üçün ayrılmış şirkəti tərəfindən hesablanıb və səsvermədən öncə hər bir ölkəyə faksla göndərilib. Ona görə də səsləri gizlətmək ehtimalı yoxdur. Ola bilsin, hansısa texniki nasazlıq üzündən səsvermə alınmasın. Amma ümumilikdə səsvermədə heç bir pozuntu olmayıb”. T. Məmmədov xalq artisti Aygün Kazımovanın “Eurovision-2009” müsabiqəsinin finalını şərh etməsi ilə bağlı yayılan məlumatlara da aydınlıq gətirib: “Aygün Kazımova müsabiqə keçirilən ərəfədə Moskvada idi. Ona və digər müğənnilərə dəstəklərinə görə təşəkkür edirik. Ancaq Aygün Kazımovanın finalı şərh etməsi ilə bağlı İTV tərəfindən rəsmi məlumat verilməmişdi. Yəni bu müsabiqədə məhdudiyyətlər var. Elə yerlər var ki, onların ora keçməsi qeyri-mümkündür”.
Mətbuat konfransının sonunda Aysel Teymurzadə və Araş “Always” mahnısını Azərbaycan media mənsubları qarşısında ifa ediblər.