Şou-biznes

Ana səhifə

Şou-biznes

“Junior Eurovision -2009” müsabiqəsi Kiyevdə keçiriləcək

08 iyun 2009 13:36 (UTC +04:00)

Bakı. Ülkər Qasımova-APA. VII “Junior Eurovision -2009” müsabiqəsi Ukraynanın paytaxtı Kiyevdə keçiriləcək. APA-nın “Eurovision” müsabiqəsinin rəsmi internet saytına istinadən yaydığı xəbərə görə, bu müsabiqədə 13 ölkədən 10-15 yaşında gənc istedadlar iştirak edəcəklər. Canlı şou şənbə günü, noyabrın 21-də keçiriləcək və Avropanın televiziya kanalları, eləcə də internet vasitəsi ilə canlı yayımlanacaq. VII “Junior Eurovision” müsabiqəsində Belarus, Belçika, Kipr, Makedoniya, Gürcüstan, Malta, Niderland, Ermənistan, Rumıniya, Rusiya, Serbiya, İsveç və Ukrayna təmsil olunacaq. Avropa Yayım Birliyinin icraçı direktoru Svante Stokseliusun bildirdiyinə görə, müsabiqənin təşkilatçısı olan ittifaqın heyəti bu günlərdə builki “Junior Eurovision” müsabiqəsinə ev sahibliyi edəcək Kiyevin “NTU” kanalında vəziyyətlə tanış olublar: “Ukraynalı təşkilatçılar ən yaxşı “Eurovision” müsabiqəsini təşkil etmək üçün əllərindən gələni edirlər. Bir şey dəqiqdir ki, Avropa noyabrın 21-də keçiriləcək ən möhtəşəm şounu səbirsizliklə gözləyə bilər”. S. Stokselius deyib ki, 2005-ci ildə keçirilən 50-ci “Eurovision” mahnı müsabiqəsinə məhz “NTU” kanalı ev sahibliyi edib. Elə builki “Junior Eurovision” müsabiqəsi də 2005-ci ildə “Eurovision” mahnı müsabiqəsinin keçirildiyi Kiyev İdman Sarayında keçirilməsi dəqiqləşib. “Junior Eurovision-2009” müsabiqəsində Azərbaycanın iştirakı nəzərdə tutulsa da, sonradan Azərbaycan bu müsabiqədə iştirakdan imtina edib. Ötən il isə Azərbaycanın bu müsabiqədə iştirakdan imtina etməsini Avropa Yayım Birliyinə gec bildirməsi İctimai Televiziya və Radio Verilişləri Şirkətinin (İTV) cərimə ödəməsi ilə nəticələnmişdi.
Müsabiqənin rəsmi internet saytında “Junior Eurovision -2010” müsabiqəsi ilə bağlı yeni məlumat yerləşdirilib. Bu məlumatda bildirilib ki, gələn il “Junior Eurovision - 2010” müsabiqəsinə Belarus ev sahibliyi edəcək. Belarusun “BTRC” kanalının təşkil edəcəyi müsabiqə Minsk arenasında keçiriləcək. Minsk arenasının 15 minə qədər tamaşaçı tutumu var. Avropa Yayım Birliyinin icraçı direktoru S. Stokselius bildirib ki, Belarus bu zamana kimi həm “Eurovision” mahnı müsabiqəsinin, həm də “Junior Eurivision”nın sadiq iştirakçısıdır: “Belarus “Junior Eurovision” müsabiqəsində iki dəfə qalib olub. Bundan başqa “Junior Eurovision” müsabiqəsi Belarusun ən populyar televiziya şoularından biridir. BTRC kanalının müsabiqənin təşkil etməklə bağlı müraciəti Avropa Yayım Birliyi tərəfindən müsbət dəyərləndirilib və ittifaqın rəhbərliyini bu müsabiqənin təşkil edə biləcəklərinə inandırıblar”.
Qeyd edək ki, “Eurovision-2009” mahnı müsabiqəsinin qalibi Aleksandr Rıbak, Belarusda anadan olub və 4 yaşında Norveçə köçüb. Rıbak Belarusun müsabiqənin təşkilatçısı olmasını dəstəkləyir.