Şou-biznes

Ana səhifə

Şou-biznes

Adil Kərimli: “Azərbaycanın “Eurovision”da iştirakdan məhrum edilməsi üçün iştirakçı ölkələr arasında səsvermə keçiriləcəyi barədə xəbərlər yalandır”

20 avqust 2009 12:20 (UTC +04:00)

Əgər Avropa Yayım hər hansı bir ölkənin müsabiqədən uzaqlaşdırılması barədə məsələ qaldırsa, bu işi özü həll edir. Çünki iştirakdan məhrum etmə iştirakçı ölkələrin səlahiyyətlərinə aid məsələ deyil”. Bu açıqlamanı APA-ya “Eurovision” müsabiqəsinin Azərbaycan üzrə nümayəndə heyətinin rəhbəri Adil Kərimli verib.

Avropa Yayım Birliyinin təmsilçi ölkələrə Azərbaycanın “Eurovision”da iştirakının məqbul olub-olmadığı ilə bağlı sorğu göndərməsi barədə Ermənistan mediasında yayılan məlumatlara münasibət bildirən Adil Kərimli deyib ki, bu barədə onda məlumat yoxdur. O “Eurovoison-2009” yarışmasında erməni təmsilçilərinə səs göndərən Azərbaycan vətəndaşlarının Milli Təhlükəsizlik Nazirliyinə (MTN) çağırılması barədə yayılan məlumatların rəsmi təsdiqini tapmadığını bildirib: “Hələlik bu məsələ ilə bağlı araşdırma aparılmayıb və heç bir nəticəyə gəlinməyib. Təbii ki, Avropa Yayım Birliyi belə bir qərar çıxarmaz və bu, yanlış bir şeydir. Məsələ ondadır ki, Ermənistan mətbuatı hələ heç rəsmi təsdiqini tapmamış məsələdən özlərinə sərf etdikləri formada istifadə edirlər. Mətbuat bu məsələlərdə çox diqqətli olmalıdır. Bu məsələ ilə bağlı Avropa Yayım Birliyinin rəsmi bir açıqlaması yoxdur, rəsmi bir münasibət bildirməyib. Sadəcə mətbuatdan izlədiyimiz məlumatlara görə, Avropa Yayım Birliyi bununla bağlı araşdırmalara başlayıb. Araşdırma gedirsə, nəticə əldə olunduqdan sonra sözsüz ki, bununla bağlı bir açıqlama olacaq”. Qeyd edək ki, bu gün Ermənistan televiziyası Avropa Yayım Birliyinin Azərbaycanın növbəti il müsabiqədə iştirakına icazə verilib-verilməməsi ilə bağlı iştirakçı dövlətlər arasında səsvermə keçirəcəyi barədə xəbər yayıb.