Şou-biznes

Ana səhifə

Şou-biznes

“Eurovision-2010” müsabiqəsində Azərbaycanı təmsil edəcək sənətçi 40 iddiaçı arasından seçiləcək

20 avqust 2009 13:15 (UTC +04:00)

Bakı. Ülkər Qasımova-APA. Azərbaycanı gələn ilin mayında Osloda keçiriləcək “Eurovision-2010“ yarışmasında təmsil edəcək sənətçi 40 nəfər arasından seçiləcək. Bu barədə APA-ya açıqlamasında “Eurovision” müsabiqəsinin Azərbaycan üzrə nümayəndə heyətinin rəhbəri Adil Kərimli məlumat verib. O bildirib ki, artıq milli seçimlərin birinci turu başa çatıb: “Birinci turda bu müsabiqədə iştirak etmək istəyən 40-a yaxın iştirakçının namizədlikləri təsdiqlənib. Növbəti mərhələdə isə artıq namizədlikləri təsdiqlənən həmin iştirakçıların seçimi münsiflər heyəti tərəfindən aparılacaq”. Növbəti seçim mərhələsinin vaxtı isə hələ tam dəqiqləşməyib. Nümayəndə heyətinin rəhbərinin bildirdiyinə görə, “Eurovision-2010” müsabiqəsində Azərbaycan təmsilçisinin seçilməsində iştirak edəcək münsiflər heyətinin tərkibində dəyişiklik olmayıb.

Qeyd edək ki, ötən ilki münsiflər heyətində İTV-nin baş direktoru İsmayıl Ömərov, Bakı Musiqi Akademiyasının rektoru Fərhad Bədəlbəyli, Azərbaycan Mədəniyyətinin Dostları Fondunun icraçı direktoru İbrahim Quliyev, Beynəlxalq Musiqi Şurasının Azərbaycan Milli Musiqi Komitəsinin prezidenti Lalə Kazımova, Azərbaycan Dövlət Filarmoniyasının direktoru Murad Adıgözəlzadə, Mədəniyyət və Turizm Nazirliyinin sektor müdiri Mənzər Nurəliyeva və Gənclər və İdman Nazirliyinin nümayəndəsi Fərhad Hacıyev təmsil olunmuşdu. Azərbaycanı “Eurovision-2009” müsabiqəsində təmsil edən Aysel Teymurzadə Araşla birgə Azərbaycanı sözügedən müsabiqədə təmsil edib üçüncülük əldə etmişdi.