Şou-biznes

Ana səhifə

Şou-biznes

Azərbaycan paytaxtındakı konsert salonları və digər mədəniyyət müəssisələrinin icarə haqları: 150 manatdan 60 min manatadək - ARAŞDIRMA

Azərbaycan paytaxtındakı konsert salonları və digər mədəniyyət müəssisələrinin icarə haqları: 150 manatdan 60 min manatadək - <font color=red>ARAŞDIRMA</font>

02 sentyabr 2009 09:26 (UTC +04:00)

Bakı. Ülkər Qasımova-APA. Bakının konsert salonları və digər mədəniyyət müəssisələrində kütləvi tədbirlər keçirilməsi necəyə başa gəlir? APA kütləvi tədbirlər keçirilməsi üçün ödənilən məbləği müəyyənləşdirmək məqsədilə araşdırma aparıb.

Araşdırma zamanı məlum olub ki, Bakıda fəaliyyət göstərən mədəniyyət ocaqlarında, eləcə də bir neçə stadionda kütləvi tədbirlərin və konsertlərin keçirilməsi üçün tələb olunan icarə haqqı dövlət tərəfindən deyil, hər məkanın öz rəhbərliyi tərəfindən təyin olunur. Kirayə haqqının məbləğinin aşağı və ya yuxarı olması isə tədbir zamanı istifadə ediləcək elektrik enerjisinin həcmindən, tədbirin mahiyyətindən və tədbirin təşkilinə sərf olunacaq maliyyə vəsaitindən asılıdır.

Son zamanlar konsertlərin təşkili üçün ən uğurlu məkan hesab edilən və əsaslı təmirdən sonra tez-tez qapılarını Bakı sakinlərinin üzünə açan Heydər Əliyev Sarayında bir günlük konsert keçirmək üçün 11 800 manat lazımdır. Əsaslı təmirdən sonra Heydər Əliyev Sarayının icarə haqqında xeyli artım nəzərə çarpır. Əsasən yay mövsümündə konsertlərin təşkili üçün nəzərdə tutulan Yaşıl Teatr Bakı Konsert Kompleksinin icarə haqqı da Heydər Əliyev Sarayının icarə dəyərindədir. Belə ki, Yaşıl Teatrda da zalın bir günlük icarəsi 11 800 manatdır. Rəşid Behbudov adına Dövlət Mahnı Teatrında isə icarə haqqı 400 manatdan başlayır. Teatrdan APA-ya verilən məlumata görə, tədbir keçirən idarə və ya məsul şəxslə əvvəlcə ümumi müqavilə bağlanılır və qiymət müzakirə edilir. Azərbaycan Dövlət Akademik Opera və Balet Teatrında bu məkanın səviyyəsinə və statusuna uyğun tədbirlər keçirilməyə icazə verilir. Teatrın icarə haqqı Mədəniyyət və Turizm Nazirliyi tərəfindən müəyyənləşdirilir və icarə üçün 3000 manat ödənilməlidir.

Azərbaycanın tarixi məkanlarından birində yerləşən Muğam Teatrında isə bir günlük tədbirin keçirilməsi üçün 2000 manat tələb olunur. Teatrın direktoru Arif Qazıyev APA-ya deyib ki, özəl təşkilatlar üçün nisbətən artıq qiymət müəyyənləşdirilir: “Biz icarə verdiyimiz zalla bərabər qonaqlar üçün çay süfrələri də açırıq. Eyni zamanda ay ərzində öz təşəbbüsümüzlə təbdirlər, xatirə və yaradıcılıq gecələri keçiririk. Bu zaman imkanı olan təşkilatlar daha çox icarə haqqı verirlər”. Araşdırma zamanı məlum olub ki, Tofiq Bəhramov adına Respublika Stadionu konsertlərin təşkili üçün ən bahalı obyektdir. Belə ki, bu stadionda bir günlük konsertin təşkili üçün icarə haqqı orta qiymətlə 60 000 manat təşkil edir. Bundan başqa Tofiq Bəhramov adına Respublika Stadionunda konsertdən əvvəl edilən məşqlər üçün əlavə icarə haqqı ödənilməlidir. Heydər Əliyev İdman Konsert Kompleksində bir günlük tədbirin keçirilməsi orta hesabla 15 min manata başa gəlir. Araşdırma zamanı məlum olub ki, sözügedən obyektin qış üçün ayrı, yay üçün isə ayrı icarə qiyməti var. Bu qiymət ancaq konsertlərin keçirilməsi üçün keçərlidir. Heydər Əliyev İdman Konsert Kompleksində sərgilərin təşkili üçün icarə haqqı müəyyənləşən zaman istifadə olunacaq sahənin ölçüsü nəzərə alınır.

Paytaxtda fəaliyyət göstərən sərgi salonları və qalereyaların icarə qiymətləri isə fərqlidir. Araşdırma zamanı məlum olub ki, qeyd olunan yerlərdə sərgilərin təşkili üçün 150-500 manat arasında ödəniş etmək lazımdır. Azərbaycan Rəssamlar İttifaqının Vəcihə Səmədova adına Sərgi Salonunda sərgi təşkil etmək üçün yerli rəssamlar 200 manat, xarici rəssamlar üçün 500 manat icarə haqqı ödəməlidir. Bu qiymət sözügedən sərgi salonunda aparılan əsaslı təmirdən sonra bir qədər artıb. Muzey Mərkəzində bir günlük sərginin icarə haqqı 500 manat, “Qız qalası” rəsm qalereyasında 500 manat, Miniatür Sənət Mərkəzində 300 manat, Müasir İncəsənət Qalereyasında 300 manat, “Abşeron” Rəsm Qalereyasında 200 manat, “Bakı” Rəsm Qalereyası, Bədii Sərgi Salonu, Tofiq İsmayılov adına Uşaq Qalereyasında isə 150 manatdır. Azərbaycan Rəssamlar İttifaqının nəzdində olan sərgi salonları və qalereyaların icarə qiymətini ittifaq rəhbərliyi, özəl qalereyalarda icarə haqqını isə salonun sahibi müəyyənləşdirir. “Nizami” və “Azərbaycan” kinoteatrlarında da tədbir keçirmək üçün prosedura bur az fərqlidir. Kinoteatr rəhbərliyi əvvəlcə tədbirin mahiyyətini araşdırır, daha sonra tədbir zamanı istifadə olunacaq maliyyə vəsaiti nəzərə alınaraq icarə haqqı müəyyən edilir. Qeyd edək ki, adları çəkilən hər bir obyektdə dövlət tədbirlərinin keçirilməsi ödənişsizdir.

Xatırladaq ki, APA iki il əvvəl də paytaxtın konsert salonları və digər mədəniyyət müəssisələrində kütləvi tədbirlər keçirmək üçün tələb olunan icarə haqqı ilə bağlı araşdırma aparmışdı. Hər iki araşdırmanın nəticələrinin müqayisəli təhlili göstərir ki, ötən müddət ərzində icarə haqlarında təxminən 20-40% artım baş verib. Müqayisə üçün qeyd edək ki, 2007-ci ildə Yaşıl Teatr Konsert Kompleksində bir günlük konsertin icarə haqqı 8 000 manat, Azərbaycan Dövlət Akademik Opera və Balet Teatrında 2 500 manat, Rəşid Behbudov adına Dövlət Mahnı Teatrında isə 350-400 manat olub...