Şou-biznes

Şou-biznes

Alla Puqaçova Bakıda vida konserti verib

05 sentyabr 2009 07:42 (UTC +04:00)

APA-nın məlumatına görə, konsertdə Azərbaycan prezidenti İlham Əliyev və xanımı Mehriban Əliyeva da iştirak edib. Mədəniyyət və Turizm Nazirliyinin təşkilati dəstəyi ilə keçirilən konsertdə bir sıra dövlət məmurları da iştirak edib. Konsert saat 19:30-da başlayıb. Yeni saç düzümündə, qara qısa paltarda tamaşaçıların qarşısına çıxan Alla Puqaçova ilk olaraq “Ya poyu” mahnısını oxuyub. “Ne plaç”, “Aduvançik” mahnılarından sonra tamaşaçılara müraciət edib: “İfa etdiyim mahnıları mənimlə birgə yaşamağınızı istəyirəm. Bakıda mənim unudulmaz xatirələrim olub. Bu şəhəri və bu xalqı çox sevirəm”.
Sənətçi Bakının sürətlə inkişaf etdiyini bildirib. İlk baxışdan Bakını tanımadığını deyən Alla Puqaçova bu güclü iqtisadi inkişafa görə zalda əyləşən dövlət başçısı İlham Əliyevə xüsusi təşəkkür edib.

Proqram boyu yeni mahnıları ilə yanaşı “Aysberq”, “Primadonna”, “Recnoy tramvaycik”, “Pozovi menya soboy”, “Lyubov kak sostayaniye” kimi hit mahnılarını ifa edən müğənni əvvəlcə zala düşərək tamaşaçılarla salamlaşıb, daha sonra dövlət başçısının yanına gedərək onun qarşısında mahnı ifa edib. Konsertin sonuna yaxın Alla Puqaçovaya dövlət başçısı İlham Əliyev və xanımı Mehriban Əliyevanın adından gül çələngləri təqdim olunub. Müğənni göstərilən diqqətə görə təşəkkür edib: “Konsertimdə prezidentin öz ailəsi ilə birgə iştirakı mənə böyük qürur və şərəf verir. Mən bu səhnədə, sizlərin qarşısında konsert verməkdən çox məmnunam”.

Alla Puqaçova SSRİ-nin xalq artisti, dünya şöhrətli müğənni, uzun illər dostluq etdiyi mərhum Müslüm Maqomayevin ona verdiyi məsləhəti xatırlayıb: “O mənə hər zaman deyirdi ki, “Alla, çalış səhnədən yüksəklikdə olarkən ayrıl, o yüksəklikdən enmə, səhnəni vaxtında tərk elə”.
Konsert boyu Alla Puqaçova ifa etdiyi bütün mahnılarda mono-tamaşa nümayiş etdirib.
Qeyd edək ki, konsertin səhnə tərtibatının müəllifi Rusiyanın tanınmış dizayneri Boris Krasnovdur. Konsertdə sənətçinin istifadə etdiyi geyimlər tanınmış modelyer Valentin Yudaşkin tərəfindəın layihə çərçivəsində hazırlanıb. Konsert proqramı bitdikdən sonra isə tamaşaçıların fasiləsiz alqışları ilə Alla Puqaçova səhnəyə qayıdıb. İlk çağırışda heç bir mahnı oxumasa da, ikinci dəfə səhnəyə təşrif buyuranda “Ya uletayu” mahnısını ifa edib və Bakıdakı vida konsertini məhz bu mahnı ilə yekunlaşdırıb. Pərdələr bağlandıqdan sonra da tamaşaçılar uzun müddət ayaq üstə Alla Puqaçovanı alqışlayıblar. Üçüncü dəfə yenidən səhnəyə qayıdan Rusiya estradasının primadonnası bu dəfə mahnı ifa etməyəcəyini dilə gətirib və artıq proqramının sona çatdığını qeyd edib: “Mən bu alqışları görüb qayıtmaya bilməzdim. Mənə olan alqışların sayı və gurultusu mənim üçün əhəmiyyət kəsb etmir, çünki mən vaxtında bütün bu alqışları görmüşəm. Məni indi bu səhnəyə qaytaran sizin gözlərinizdəki sevgi, qonaqpərvərliyiniz və mehribançılığınız oldu. Bu mənim ümumiyyətlə, səhnədə son qastrolumdur. Mən birdə heç bir ölkədə konsert proqramı ilə çıxış etməyəcəyəm, bunu artıq bilirsiniz. Ancaq bu o demək deyil ki, mən fəaliyyət göstərməyəcəyəm. Qətiyyən belə düşünməyin. Çünki mənim yaradıcılığım teatr, kino sahəsində davam edəcək. Mən ancaq konsert fəaliyyətimə son qoyuram”.