Şou-biznes

Şou-biznes

Bu mövsüm hansı rənglər dəbdədir? - SORĞU

Bu mövsüm hansı rənglər dəbdədir? - <font color=red>SORĞU</font>

28 sentyabr 2009 13:13 (UTC +04:00)

Bakı. Ülkər Qasımova-APA. Havaların soyuması bütün insanlara qarderobu yeniləmək və dəbə uyğun yeni geyimlər almaq istəyi oyadır. APA 2009-2010 payız və qış mövsümündə daha çox necə geyimlərin və hansı rənglərin dəbdə olacağını öyrənib. Bununla əlaqədar yerli modelyerlərin payız-qış mövsümünün dəbi ilə bağlı fikirlərini sizin ixtiyarınıza veririk.

Modelyer Gülnarə Xəlilovanın bildirdiyinə görə, bu mövsümdə paltolar, trikotajdan hazırlanmış geyimlər daha çox dəbdədir: “Xanımların nəzərinə çatdıraq ki, bu mövsümdə paltolar, trikotajdan hazırlanmış geyimlər çox dəbdə olacaq. Paltolarda həm trapesiya, həm qol saatı formasında siluet olaraq bu formalar üstünlük təşkil edəcək. Bu sırada həm düz, həm də bədənə yatımlı formaları qeyd edə bilərik. Rəng etibarı ilə daha çox boz və sarıya çalan açıq çəhrayı rəng, eləcə də qırmızı, qara, ağ kimi rənglər paltolarda aktual olacaq. Trikotajlarda isə bütün toxunuşlar – həm qalın, həm incə, həm təbii saplarla sintetik sapların qarışığından istifadə olunan toxunuşlar, firuzəyi, tünd yaşıl, qırmızı, çəhrayı rənglər dəbdədir. Xaki rənglər daha çox hər bir vaxtda istifadə oluna biləcək rəng kimi bu mövsüm üçün də qəbul olunur. Əsasən yaşıl rəng – yaşıl-firuzəyi, tünd və açıq yaşıl çoxluğu nəzərdə olacaq”.

G. Xəlilova bu mövsümün əsas yeniliyindən də söz açıb. Onun sözlərinə görə, 2009-2010 payız və qış mövsümündə əsas ideya həm formalarda, həm də rənglərdə kişi, qadın, uşaq geyimləri arasındakı sərhədin aradan götürülməsi olacaq: “Burda rənglərin miqrasiyası baş verəcək. Kişiyə aid olan rənglərdən qadın geyimlərində, qadına aid olan əlvan rənglərdən isə kişi geyimlərində istifadə ediləcək. Əlbəttə ki, özünü əlvan rənglərdən qoruyan kişilərimiz yenə də tünd rənglərdən yararlanacaq. Sözsüz ki, bu faktor hamıya şamil olunmur. Sırf dəbi izləyən insanlar bundan istifadə edəcəklər. Hər zaman gecə geyimlərində gördüyünüz atlas, ipək məxmər, krujeva və ya gipür parçaları gündəlik həyatdakı geyimlərdə də görmək mümkün olacaq. Eləcə də əksinə, gündəlik geyim formalarında istifadə olunan parçalara gecə geyimlərində də hansısa bir maraqlı kəsim formasında rast gələ biləcəyik. Builki dəbin formalarında bütün bunlar var”.

Modelyer Zemfira Qurbanova da builki payız-qış kolleksiyasının ötən ilkindən çox fərqləndiyini deyib: “Şal və toxunma geyimlər bu ilin dəbdədir. Builki formalarda daha çox qat-qat və büzməli qısa geyimlərə üstünlük veriləcək. 2009-2010 payız-qış kolleksiyası 60-cı illərin dəbini xatırladacaq. 60-cı illərin geyimləri haradasa builki dəbin detallarına köçüb. Yenə də paltar formalarına uyğun botinkalar, krem rənglərin müxtəlif çalarları, eləcə də həmin geyimlərə uyğun taxtadan aksessuarlar və həmin rəngə uyğun corablar dəbdə olacaq. Mövsüm başa çatdığı üçün artıq daha çox tünd rənglərə üstünlük veriləcək. Krem rəngi dəbdədir, lakin o demək deyil ki, hamı krem rəngi geyinəcək. Açıq rənglərdən çəhrayı, firuzəyi, yaşıl rənglərdən də çox istifadə ediləcək. Əsas odur ki, bu mövsümdə eyni rəngələrdən olna geyimlər geyinmək dəbdə olmayacaq”.

Z. Qurbanovanın sözlərinə görə, bu payız-qış mövsümündə kişilər açıq rənglərdən ziyafət geyimlərində istifadə edəcəklər. Həmin çalarlarda yun köynəklərdən və eyni rəngdə ayaqqabılardan istifadə ediləcək. Modelyer son dövrlər paytaxt əhlinin idman üslubundan ötən illərə nisbətən daha az istifadə etməsinin səbəblərini də açıqlayıb: “Həqiqətən də idman geyimləri demək olar ki, tamamilə sıradan çıxır. Bu da dəblə bağlıdır. Çünki idman geyimləri hələ də dəbdə öz yerini tam almayıb. Bunun üçün daha bir neçə il tələb olunur”.