Şou-biznes

Şou-biznes

Azərbaycanı “Eurovision-2010” müsabiqəsində yeni namizədlərin dinlənilməsi mərhələsi keçirilib

01 oktyabr 2009 15:08 (UTC +04:00)

Bakı. Ülkər Qasımova - APA. 2010-cu ilin mayında keçiriləcək “Eurovision” müsabiqəsində Azərbaycan təmsilçisinin seçilməsi üçün yeni milli seçim həyata keçirilib. Bu barədə APA-ya açıqlama verən İctimai Televiziya və Radio Verilişləri Şirkətinin (İTV) ictimaiyyətlə əlaqələr şöbəsinin müdiri Tahir Məmmədov bildirib ki, bu milli seçimlərin ikinci turu deyil, yeni namizədlərin dinləməsi mərhələsi hesab olunur: “Milli seçimlərin növbəti mərhələsi ötən gün İTV-də yerli Təşkilat Komitəsinin iştirakı ilə keçirilib. Təşkilat komitəsi sözügedən müsabiqəyə qatılmaq istəyən gənc sənətçilərin müraciətləri nəzərə alınaraq milli seçim turunda əlavə seçim turu keçirilib. Təşkilat Komitəsi o namizədləri dinləmək qərarına gəlib və buna görə də dinləmə keçiriblər. Bundan öncə olan dinləmə kimi bu dəfə də qatılanların çıxışları lentə alınıb, onların fikirləri dinlənilib və yeni namizədlərlə söhbətlər aparılıb”.

T. Məmmədovun sözlərinə görə, bu mərhələdə avqustun əvvəllərində keçirilmiş dinləmələrdə iştirak edənlər yox, yeni namizədlər iştirak edib. Azərbaycanın “Eurovision-2010” müsabiqəsində təmsilçisi məhz yerli münsiflər heyətinin və beynəlxalq ekspertlərin iştirakı ilə müəyyənləşəcək. Şöbə müdiri qeyd edib ki, dünənki əlavə dinləmədə daha 8 namizəd dinlənilib. Onlardan altısı solo ifaçı, ikisi isə qrupdur.

Qeyd edək ki, “Eurovision-2010” müsabiqəsinin Azərbaycan təmsilçisinin adının bu ilin noyabrda açıqlanması gözlənilir. Bu dəfə “Eurovision-2010” müsabiqəsində iştirakçı 46 namizəd arasından seçiləcək.