Şou-biznes

Şou-biznes

Populyar türk müğənniləri Kutsi və Bengü Abbas Abbasovun oğlunun toyunda iştirak ediblər

05 oktyabr 2009 10:43 (UTC +04:00)

Bakı. Ülkər Qasımova - APA. Türkiyənin tanınmış müğənniləri Kutsi və Bengü Azərbaycan paytaxtında keçirilən toy mərasimində iştirak ediblər. APA-nın məlumatına görə, toy mərasimi oktyabrın 3-də “Buta Palace”də keçirilib.

Türkiyəli sənətçilər Azərbaycan baş nazirinin sabiq birinci müavini, Azərbaycan Güləş Federasiyasının fəxri prezidenti Abbas Abbasovun kiçik oğlu Vüsal Abbasovun toy mərasimində iştirak ediblər. Müğənnilərin hər birinə toyda iştirak üçün yüksək məbləğ ödənib.

Kutsi və Bengü APA-ya eksklüziv açıqlamalarında Bakını çox sevdiklərini bildiriblər. Hər iki türkiyəli müğənni Bakıda iş qurmaq arzularını da dilə gətiriblər. Kutsi isə gələn il 8 Mart günü Bakıda olacağına və Azərbaycan xanımlarının qarşısında konsert proqramı ilə çıxış edəcəyinə söz verib. Ötən ay ata olan Kutsi bu hissi yaşamasından çox məmnun olduğunu və oğlunun böyüyüb Vətənə layiqli övlad olacağını diləyib: “Bu, Bakıya ilk səfərim deyil. Azərbaycanı və bu xalqı çox sevirəm, sonsuz hörmət bəsləyirəm. Təklif olsa, burada iş qurmağa da razılaşaram. Gələn il burada konsert verəcəyimə söz verirəm və bu sözümə əməl edəcəyəm. Azərbaycanlı müğənnilərlə də işbirliyi qurmağı istəyirəm”.

Kutsi “Doktorlar” serialından sonra çox yorulduğunu və artıq yorğunluğunu atdığını dilə gətirib: “Məhz yorğunluq səbəbindən mən bundan sonra serialda çəkilməyəcəyimi demişdim. İndi isə artıq yenidən seriala çəkilməyə hazıram. Məni qane edəcək serial və ya film olsa, eyni zamanda mənə layiq rol təklif olunsa, niyə də olmasın? Ancaq mən aktyorluqdan öncə müğənniliyi özümə məslək hesab edirəm. Mənim sənətim müğənnilikdir”.

Kutsi və Bengü bu gün Türkiyəyə qayıdıblar.