Şou-biznes

Ana səhifə

Şou-biznes

Ali Məhkəmə xalq artisti Faiq Ağayevin kassasiya şikayətini təmin etməyib

06 oktyabr 2009 10:06 (UTC +04:00)

Bakı. Ülkər Qasımova-APA. Ali Məhkəmə xalq artisti Faiq Ağayevin şikayəti təmin etməyib. Bu barədə APA-ya xalq artisti Flora Kərimovanın vəkili Yunus Vəliyev məlumat verib. Vəkilin sözlərinə görə, bu gün Ali Məhkəmədə xalq artisti Faiq Ağayevin Bakı Apelyasiya Məhkəməsinin qərarından ünvanladığı kassasiya şikayətinə baxılıb və iddia təmin olunmayıb. Məhkəmə prosesində hər iki tərəf iştirak edib.

Xalq artisti Faiq Ağayev APA-ya açıqlamasında hakim Vidadi Həşimovun sədrlik etdiyi məhkəmə prosesində qaldırdığı kassasiya şikayətinin təmin olunmadığını təsdiqləyib. F. Ağayev qeyd edib ki, hakim tərəfləri qarşılıqlı iddialardan çəkinməyə və bu münaqişəyə son qoymağa çağırıb. Sənətçi bildirib ki, hakim hər üç sənət adamının ictimaiyyət arasında müəyyən çəkiyə sahib olduğunu bildirərək, bu münaqişənin ictimaiyyət arasında mənfi rəy yaratdığını qeyd edib və tərəfləri barışığa çağırıb. Xalq artisti Flora Kərimova isə bu məsələdə sona kimi gedəcəyini açıqlayıb və bu yoldan dönüş olmadığını dilə gətirib.

Flora Kərimovanın Faiq Ağayevə qarşı Cinayət Məcəlləsinin 147 və 148-ci maddələri üzrə qaldırdığı iddia əsasında yaxın günlərdə yeni məhkəmə prosesi başlayacaq. Bu iddiaya Yasamal Rayon Məhkəməsində baxılacaq. F. Ağayev APA-ya bildirib ki, Flora Kərimovanın ona qarşı qaldırdığı bu iddiaya o da qarşılıqlı iddia qaldırmaq niyyətindədir. Sənətçinin sözlərinə görə, o, bu iddia ilə Yasamal Rayon Məhkəməsinə deyil, məhz Flora Kərimovanın qeydiyyatda olduğu rayonun məhkəməsinə müraciət edəcək.

Qeyd edək ki, elə bu yaxınlarda iki xalq artisti arasında Yasamal Rayon Məhkəməsi tərəfindən aparılan qarşılıqlı mülkü iş tərəflərin bir-birindən üzr istəməsi və bir-birlərinə eyni məbləğdə pul ödənilməsi qərarı ilə nəticələnmişdi. Ancaq tərəflər məhkəmənin bu qərarından narazı olduqlarını dilə gətirmişdilər.