Şou-biznes

Ana səhifə

Şou-biznes

Amerikalı müğənni Kelli Rouland: “Mən Bakını çoxdan tanıyıram” - FOTOSESSİYA

Amerikalı müğənni Kelli Rouland: “Mən Bakını çoxdan tanıyıram” - <font color=red>FOTOSESSİYA</font>

08 oktyabr 2009 15:27 (UTC +04:00)

Bakı. Ülkər Qasımova- APA. Bu gün axşam ilk dəfə olaraq Bakıda konsert verəcək ABŞ-ın tanınmış müğənnisi, keçmiş “Destiny Child” qrupunun üzvü Kelli Rouland mətbuat nümayəndələri ilə görüşüb. APA-nın məlumatına görə, müğənni mətbuat konfransına bir saat geciksə də, jurnalistləri maraqlandıran bütün sualları ətraflı cavablandırıb. K. Rouland ilk öncə islam ölkəsi olan Azərbaycanda olmasından məmnunluq duyduğunu və bura ilk səfərinin olduğunu bildirib: “Dünən gecə gəldiyimə görə hələlik şəhəri gəzmək imkanım olmayıb. Ancaq təyyarədən düşəndə və hava limanından qaldığım otelə qədər olan yolda bu şəhərlə tanış oldum. Bakı çox işıqlı şəhərdir və burada ciddi yenidənqurma işləri aparıldığının şahidi oldum”.

Keçmiş “Destiny Child” qrupu ilə bağlı sualları cavablandıran müğənni onunla birgə qrupda çalışan Beyons və Mişellə əlaqələrinin hələ də davam etdiyini açıqlayıb: “Hər ikisi ilə əlaqəm var, bir-birimizi görəndə söhbət edirik, yəni əlaqəmiz tamamilə kəsilməyib. Bizim hər birimizin yollarımız ayrıdır. Sənətlərimizi, çıxışlarımızı, musiqiçilik qabiliyyətimizi eyniləşdirmək olmaz. Biz hər birimiz fərqliliyimizlə seçilirik. Solo karyeraya başladıqdan sonra hansımızın daha populyar olduğunu deyə bilmərəm. Hər birimiz özümüzə görə populyarıq. Hazırda solo karyeramı davam etdirirəm və özümü çox rahat hiss edirəm. Artıq solo albomumun hazırlıqlarına da başlamışam”.

Sənətçi Azərbaycan haqqında müəyyən məlumatlara malik olduğunu deyib: “Bilirəm ki, Azərbaycan neft ölkəsidir. Eyni zamanda bu ölkədə kürü çoxdur. Dostlarıma da buradan əliboş qayıtmamağa söz vermişəm. Onlara hədiyyə olaraq kürü aparmaq istəyirəm. Bakı mənə çox doğmadır. Çünki ən yaxın dostumun adı Bakıdır. Bura çatandan bəri onlar zəng vururlar və bu yerlə maraqlanırlar. Hər beş dəqiqədən bir soruşurlar ki, necə şəhərdir, orada maraqlı nələrə var? Ona görə də mən Bakını çoxdan tanıyıram. Dostumun adı Bakı olduğuna görə, onlar daima bu şəhərlə yaxından maraqlanırlar. Mən də onlar vasitəsi ilə yetəri qədər məlumat toplamışam. Qaldı ki, Azərbaycan musiqi ilə bağlı hansısa məlumatım olub-olmadığına, mən hər zaman bu ölkənin mədəniyyəti, incəsənəti, musiqisi ilə məhz o ölkədə olarkən canlı surətdə xəbər toplayıram. Azərbaycan musiqisi ilə də bağlı burada olduğum müddətdə məlumat toplamağa çalışacağam”.

Kelli Rouland bugünkü konsertdə onunla birgə çıxış edəcək rusiyalı müğənni Timati ilə duet oxumayacağını qeyd edib. Konsertdə Timati öz repertuarını, Kelli isə öz mahnılarını bakılı tamaşaçılar qarşısında çıxış edəcək: “Kişilər mənə həm qadın, həm müğənni kimi baxa bilər və elə bu cür də qiymət verə bilərlər. Ancaq mənim ən çox istədiyim məni bir qadın kimi yox, bir musiqiçi kimi bəyənmələri və bu cür də baxmalarıdır”. Bir müddət əvvəl Dubayda səfərdə olan Kelli Rouland iki islam ölkəsi arasındakı fərqi də açıqlayıb: “Dubay çox gözəl bir məkandır. Orada da çox böyük tikinti işləri gedir. Ancaq Bakı daha çox tarixiliyini qoruyub saxlayıb. Bakı mənə klassikanı xatırladır, klassik bir şəhəriniz var”. Sonda isə Kelli Rouland bakılı tamaşaçılara möhtəşəm proqram vəd edib və media mənsubları qarşısında repertuarından mahnı ifa edib.