Şou-biznes

Şou-biznes

Fəxriyyə Xələfovanın “Nuray” ətriyyat kolleksiyasının təqdimatı möhtəşəm şou ilə baş tutub - FOTOSESSİYA

Fəxriyyə Xələfovanın “Nuray” ətriyyat kolleksiyasının təqdimatı möhtəşəm şou ilə baş tutub - <font color=red>FOTOSESSİYA</font>

09 oktyabr 2009 11:02 (UTC +04:00)

Bakı. Ülkər Qasımova - APA. ABŞ-ın tanınmış müğənnisi, keçmiş “Destiny Child” qrupunun üzvü Kelli Roland və rusiyalı reper Timati Heydər Əliyev Sarayında konsert proqramı ilə çıxış ediblər. APA-nın məlumatına görə, konsert çərçivəsində əməkdar incəsənət xadimi, modelyer və ətiyyatçı Fəxriyyə Xələfovanın “Nuray” ətriyyat kolleksiyasının təqdimat mərasimi keçirilib.

Öncə ictimaiyyətin ixtiyarına verilən kolleksiya üçün sarayın foyesində xüsusi yerlər ayrılıb. Konsertə təşrif buyuran tamaşaçıların hər birinə bu ətirlərdən vurulub və onlara testerlər verilib. “Nuray” kolleksiyası F. Xələfovanın ətriyyatçı kimi ilk işidir. Kolleksiyada üç müxtəlif qoxulu ətir toplanıb. Ətirlər mavi, çəhrayı və yaşıl rəngləri ilə fərqlənir. Noyabrın sonlarından yeni ətriyyat kolleksiyasının satışa çıxarılması nəzərdə tutulub.

Müğənnilərin çıxışlarından əvvəl hər ətrin rənginə uyğun geyinmiş modellər tərəfindən “Nuray” ətriyyatı səhnəyə gətirilib. Daha sonra səhnəyə rusiyalı reper-müğənni Timati çıxıb. Bir saaata yaxın səhnədə qalan Timati repertuarındakı ən populyar mahnıları ifa edib. Azərbaycan xanımlarının çox gözəl olduğunu vurğulayan Timati onların şərəfinə mahnı da oxuyub: “Yenidən Azərbaycana gəlməkdən çox məmnunam. Buranı çox sevirəm və bu səhnədə çıxış etdiyimə görə xoşbəxtəm. Bu ölkənin kişiləri də çox xoşbəxtdirlər, çünki burada çox gözəl xanımlar var”.

Bakı haqqında mahnı oxuyan müğənni son olaraq pərəsətişkarları qarşısında soyunub. Şalvarını çıxarmağa cürət etməsə də, rusiyalı reper köynəyini əynindən çıxarıb. Bu hərəkətindən sonra çıxışına son qoyan Timatini ABŞ-ın tanınmış müğənnisi Kelli Rouland əvəz edib. Kellinin səhnəyə çıxışı ilə zal coşub. Timati bir tamaşaçını belə öz ifası ilə ayağa qaldıra bilməsə də, Kelli bütün zalı ayağa qaldırıb və hər tamaşaçı sənətçini ayaq üstdə alqışlayıb. Timati də şounu izləmək üçün zala gəlib. Tamaşaçıların Kelli üçün ayağa qalxması rusiyalı sənətçidə qısqanclıq yaradıb və o, zaldan çıxıb.

Kelli Rouland həm möhtəşəm rəqs şousu, həm də ifa nümayiş etdirib. Tamaşaçıya böyük dəyər verdiyini hər hərəkəti ilə bəlli edən professional sənətçi bunu sözlərlə də ifadə edib: “İlk dəfədir Azərbaycan səhnəsində çıxış edirəm və bu ölkəyə ilk gəlişimdir. Ancaq qısa müddətdə bu ölkəni də, bu insanları da çox sevdim”.

K. Rouland çıxışı müddətində üç ayrı geyimdə səhnəyə çıxıb. Onun səhnəyə ayaqyalın çıxması da tamaşaçıların nəzərindən qaçmayıb. Amerikalı sənətçini səhnədə özü ilə gətirdiyi DJ və rəqqaslar müşayiət ediblər. Onlar səhnədə pop musiqisinin mərhum kralı Maykl Ceksonu da anmağı unutmayıblar və onun mahnılarının sədaları altında xüsusi şou nümayiş etdiriblər. Kellinin möhtəşəm şousundan doymayan tamaşaçılar müğənninin səhnəni tərk etməsi ilə razılaşmayıblar və onu ayaqüstü alqışlarla geri qaytarıblar. Səhnəyə dönən Kelli tamaşaçıların istəyi ilə bir mahnı da oxuyub.

Qeyd edək ki, Kelli Rouland və Timatinin konserti “Tonica Production”un təşkilatçılığı ilə baş tutub.