Şou-biznes

Ana səhifə

Şou-biznes

“Sehirli çıraq” teleoyununun aparıcısı dəyişdirilib

13 oktyabr 2009 14:46 (UTC +04:00)

Bakı. Ülkər Qasımova – APA. Bir neçə ay əvvəl fəaliyyətə başlamış “Qoliaf” Media Prodakşın yeni, “Sehirli çıraq” adlı musiqili, əyləncəli teleoyunla televiziya tamaşaçılarının görüşünə gəlməyə hazırlaşır. Bu məqsədlə yaradıcı heyət bu gün mətbuat konfransı keçirib. APA-nın məlumatına görə, “Lider TV” ilə birgə hazırlanan “Sehirli çıraq” layihəsinin rəhbəri, Türkiyəli prodüser Kamal Cenk İçten canlı yayımlanacaq teleoyun haqda məlumat verib. O bildirib ki, “Sehirli çıraq” layihəsi intellektual oyun deyil, hər kəsin qazana biləcəyi musiqili, əyləncəli teleoyundur: “Həftə içi beş gün canlı olaraq yayımlanacaq proqramda hər gün beş iştirakçı yarışmada iştirak etmək hüququ qazanacaq. Onlardan ikisi studiyada qonaq qismində iştirak edən tanınmış şəxslər olacaq. Digər üçü isə gün ərzində şəhər nömrələrindən zəng vurmaqla və mobil telefonlarından SMS göndərməklə qeydiyyata düşmüş, seçim nəticəsində şans qazanmış tamaşaçılar olacaq”.
K. C. İçtenin sözlərinə görə, ilk mərhələlərdə oyuna qoyulmuş hədiyyələrin dəyəri 500-2000 manat məbləğində olacaq.
Qeyd edək ki, nümayiş olunan reklam çarxlarından da məlum olduğu kimi “Sehirli çıraq” müğənni Xuraman Şuşalının təqdimatında yayımlanmalı idi. Son günlər verilən məlumatlarda isə teleoyunun aparıcısının dəyişdiyi bildirilir. K. C. İçten deyib ki, “Qoliaf” Media Prodakşının siması kimi Xuraman Şuşalı hər zaman layihədə çıxış edəcək: “O, həm də prodakşının təsisçilərindən biridir. İnşallah, birlikdə bir neçə layihəyə imza atacağıq”. Mətbuat konfransına qatılan Xuraman Şuşalı da jurnalistlərə açıqlamasında bildirib ki, sözügedən şirkətin siması olmaq, onun üçün böyük fəxrdir.
Prodakşının mətbuat katibi Azər Nəsibov son olaraq bildirib ki, layihə 6 ay müddətinə həftə içi 5 gün axşam saatlarında “Lider TV”nin canlı efirində yayımlanacaq. “Sehirli çıraq”da kimin aparıcı olacağı isə bu günlərdə bəlli olacaq.