Şou-biznes

Şou-biznes

Müğənni Ruhi sahibi olduğu “Fashion City” moda evini bağlayıb və moda biznesinə son qoyub – EKSKLÜZİV

Müğənni Ruhi sahibi olduğu “Fashion City” moda evini bağlayıb və moda biznesinə son qoyub – <font color=red>EKSKLÜZİV</font>

20 oktyabr 2009 08:40 (UTC +04:00)

Bakı. Ülkər Qasımova-APA. Müğənni Ruhi moda biznesinə son qoyub və rəhbərlik etdiyi “Fashion City” moda evini bağlayıb. Bu barədə APA-ya açıqlama verən Ruhi moda biznesi ilə vidalaşmağının səbəblərini belə izah edib: “Mənim ilk biznesim olan moda biznesi alınmadı. Buna şükür edim, ya etməyim, bilmirəm. Moda biznesini quran zaman çox aldandım. İlk addımlarımdan artıq aldanmağa başladım. Özüm o işin içərisində deyildim, o işdən kifayət qədər xəbərim yox idi. İşi inandığım insanların öhdəsinə buraxmışdım, amma gördüm ki, çox sadəlövhlük etmişəm. Fikrimcə, hər bir qadın və kişi qurduğu biznesin içərisində olmalı və hər bir şeydən mütləq xəbər tutmalıdır. Bir daha əmin oldum ki, həyatda heç kimə inanmaq olmaz. Bütün bunlar moda biznesimə son qoymağa məcbur etdi. “Best model of Azerbaycan” müsabiqəsindən üç ay sonra rəhbərlik etməyə başladığım “Fashion City” moda evini bağladığımı ilk dəfə açıqlayıram. Ətrafımda olanların halallığını aldım və bildirdim ki, mən bundan sonra o işə rəhbərlik etməyəcəyəm. İstəmədim ki, kimsə mənim qazandığım pula haram qatsın. Görürdüm ki, artıq işçilərimin arasında söz-söhbət yaranıb”.

Ruhi açıqlamasında yeni biznes sahəsinə üz tutduğunu vurğulayıb. Yeni işi haqqında çox ətraflı danışmaq istəmədiyini bildirən sənətçi bu işinin zinət əşyaları biznesi bağlı olacağını qeyd edib. Xanım sənətçi üz tutduğu bu biznesdə uğur qazanacağına inandığını dilə gətirib: “Moda biznesində yol verdiyim səhvlərə, yeni biznesimdə yol verməyəcəyəm. Bu biznesdə rəhbər də, əsas qüvvə də özüməm. Artıq bir ilə yaxındır ki, bu bizneslə yaxından maraqlanıram”.

Yeni biznes sahəsinə başı qarışan müğənni, yaradıcılıq sahəsində də yeniliklərinə ara vermək fikrində deyil. Belə ki, sənətçi Türkiyədə yeni klipinin çəkildiyini deyib: “Türkiyədə sözləri Ramiz Rövşənə, musiqisi Xanım İsmayılqızına məxsus olan “Mən sənsiz ölmədim, məni bağışla” mahnısına klip çəkdirmişəm. Bu klip Azərbaycanda ilk dəfə olaraq 35 millimetrlik kinolentdə çəkilib. Türkiyədə çox tanınmış bir rejissorla işləmişik və klipdə Türkiyənin tanınmış kişi modeli çəkilib. Bu kliplə yanaşı, Türkiyədə artıq yeni albomum işıq üzü görmək üzrədir. Klip və albom bir toplu halında hazırlanacaq və hər ikisi bir diskdə yerləşdiriləcək. Yaxın günlərdə yaradıcılığımın yekunun olaraq son təqdimat mərasimi keçirəcəyəm”.

Ruhi bu açıqlamasında yaxın vaxtlarda şou-biznesdən tamamilə ayrılacağını bildirib: “Artıq şou-biznes aləmindən gedirəm. Məni artıq şou-biznesdə görməyəcəksiniz. Çünki özümü artıq şou-biznesdə görə bilmirəm. Bu sahədə ürəyim istəyən ən gözəl şeyləri elədim. İlk dəfə olaraq Hindistanda klip çəkdirdim, ilk dəfə 35 millimetrlik kinolentə çəkilmiş klip mənim klipim oldu. Qısası, məni efir məkanında getdikcə daha az-az görəcəksiniz. Şou-biznesdən getməyimin səbəbi isə şou-biznesdə qazandığım hörməti, ətrafımdakı dostları itirmək istəməməyimdir. Bu sahə elə bir sahədir ki, getdikcə insan öz hörmətini itirir, insanlar cılızlaşır. Mən bütün bunları görmək istəmirəm. Toylara, şou-proqramlara getmirəm, bu sahədə qalıb nə edəcəyəm ki? Deyirdilər, Ruhi oxuya bilmir, sübut etdim ki, oxuya bilirəm. Bu sənətə yeni gələndə heç notu belə bilmirdim. Bu sahə artıq mənim gözümdə cılızlaşır, bu sahənin gözümdə daha da cılızlaşmasını istəmirəm”.

Bir müddət əvvəl səhhətində problemlər yaşayan Ruhi artıq özünü yaxşı və gümrah hiss etdiyini qeyd edib: “Səhhətimlə bağlı yaşadığım problemlər tam olaraq həll olunub. Hazırda özümü olduqca gümrah və yaxşı hiss edirəm. Səhhətimdə heç bir problem yoxdur. Həmin vaxt bir-iki müğənni məni görüb dedi ki, “ay Ruhi, deyirdilər, sən öləcəksən axı”. Mən də onlara bildirdim ki, “Mənə hökm yazan sizsiniz? Mən ölməyə hazırlaşmıram. Ömrü verən də Allahdır, alan da”. Belə şeylər bir çoxlarını daha da sevindirir. Şükür Allaha ki, sağlamam, əsəblərim də çox normallaşıb”.

Müsahibələrinin birində övladlığa uşaq götürmək istədiyini açıqlayan Ruhi, bu istəyini yaxın bir il ərzində reallaşdıracağını vurğulayıb: “Gördüyünüz kimi bu müddət ərzində ana ola bilmədim. Çox güman ki, işlərimi qaydaya salandan sonra bununla bağlı, ciddi addım atacağam. Özümü tam tənzimləyəndən sonra övladlığa uşaq götürmək istəyirəm. Oğlan və ya qız olmağının fərqi yoxdur...”