Şou-biznes

Şou-biznes

“Eurovision-2010”: yeni qaydalar, yeni iştirakçılar, yeni həyəcanlar...

29 oktyabr 2009 10:15 (UTC +04:00)

Bakı. Ülkər Qasımova – APA. “Eurovision-2010” müsabiqəsinə 6 aya yaxın vaxt qalsa da, iştirakçı ölkələrdə artıq seçim turlarına start verilib. APA-nın məlumatına görə, 55-ci yubiley müsabiqəsi olacaq yarışmanın keçiriləcəyi tarixlər həm də Norveçin dövlət bayramları ərəfəsinə təsadüf edir. Dəqiq rəqəm bəlli olmasa da, Norveçin NRK telekanalının araşdırmasına əsasən müsabiqəsinin təşkilinə 24 milyon avro xərclənəcək.

Hazırda Avropa Yayım Birliyində (EBU) müsabiqənin qaydalarına bir sıra dəyişikliklər müzakirə olunur. Gələn ildən fonoqramın yığışdırılması planlaşdırılır. Belə ki, səhnədə yer alan musiqiçilər hər bir ifaçını canlı müşayiət etməlidir. “Eurovision-2010” müsabiqəsində rəsmən 27 ölkənin iştirak edəcəyi təsdiqlənsə də, bu il müsabiqənin daha bir debütantı ola bilər. Belə ki, Lixtenşteynin 1FL televiziyası da iştirak üçün öz namizədliyini EBU-ya təqdim edib. EBU bu ölkənin müsabiqədə iştirak edib-etməyəcəyinə bu ilin dekabrında qərar verəcək. Gələn il İtaliya, Lüksemburq və San-Marino müəyyən fasilədən sonra yenidən yarışmaya qatılacaqlar. Ötən il siyasi səbəblərdən Moskvada keçirilən müsabiqədə iştirak etməyən Gürcüstan da Norveçdə təmsil olunacaq. Bununla yanaşı, “Eurovision-2010”da yer almaq istəməyən ölkələr də var. Bu siyahıda Andorra, Ermənistan, Litva və Estoniya var. Əsasən maliyyə böhranına görə müsabiqədən imtina etmək fikrində olan bu ölkələr son qərarlarını bu ilin dekabrında açıqlayacaqlar. “Eurovision-2010” müsabiqəsində iştirak etməyəcəklərini açıqlayan ölkələr isə Macarıstan, Monako və Çexiyadır.

Gələn ildən etibarən Avropa Yayım Birliyi bütün iştirakçı ölkələr üçün yeni qayda tətbiq etmək qərarını verib. Bundan sonra müsabiqə ərəfəsində hər hansı ölkədə gizli səsvermə aparılmazsa, buna görə məsuliyyət birbaşa təşkilatçı teleşirkətin üzərinə düşəcək. Avropa Yayım Birliyi və Məşvərət Şurası qərara gəliblər ki, səsvermənin anonimliyini poza biləcək məlumatların açıqlanmasına görə iştirakçı yayım şirkəti məsuliyyət daşıyır. Yeni qayda səs verənlərin şəxsi iradəsinə hörmət prinsipini təminat altına almağa yönəlib. Bu baş verməzsə, Avropa Yayım Birliyi qaydanı pozan teleşirkətə sanksiya tətbiq edə bilər.

Ötən yarışmada təkcə final mərhələsində müsabiqə iştirakçılarına səs vermək hüququ qazanan münsiflər heyəti gələn ildən etibarən yarımfinallarda da səs verə biləcək. Hər iki yarımfinal və bir final mərhələsində təyin olunacaq münsiflər heyəti 50 faiz səs hüququna malik olacaq. Artıq məlum olan digər yenilik isə bundan ibarətdir ki, tamaşaçılar səs vermək üçün çıxışların başa çatmasını gözləmək məcburiyyətində qalmayacaqlar və müsabiqənin gedişində bəyəndikləri, dəstəklədikləri təmsilçilərin sms nömrəsinə səs göndərə biləcəklər.

“Eurovision -2010” müsabiqəsinə ciddi hazırlaşan Azərbaycanın aidiyyəti qurumları müsabiqə təmsilçisinin seçilməsi üçün milli seçimləri davam etdirirlər. Azərbaycanın müsabiqə üzrə təşkilat komitəsindən bildirilib ki, yarışmaya qatılmaq istəyən gənc sənətçilərin müraciətləri nəzərə alınaraq milli seçim turundan əlavə seçim turu keçirilib. Bundan öncə olan dinləmə kimi, bu dəfə də qatılanların çıxışları lentə alınıb, onların fikirləri dinlənilib və yeni namizədlərlə söhbətlər aparılıb. Azərbaycanın “Eurovision-2010” müsabiqəsindəki təmsilçisi yerli münsiflər heyətinin və beynəlxalq ekspertlərin iştirakı ilə müəyyənləşdiriləcək. Təmsilçinin adının noyabrda açıqlanması gözlənilir.

Qeyd edək ki, 2010-cu ilin mayın 25-də və 27-də Norveçin paytaxtı Osloda “Eurovision” müsabiqəsinin yarımfinalları, mayın 29-da isə finalı keçiriləcək.

eurovision