Şou-biznes

Şou-biznes

İraklinin Bakıdakı konserti “Halloween”lə yadda qalıb – FOTOSESSİYA

İraklinin Bakıdakı konserti “Halloween”lə yadda qalıb – <font color=red>FOTOSESSİYA </font>

02 noyabr 2009 12:26 (UTC +04:00)

Bakı. Ülkər Qasımova – APA. Rusiyanın “Fabrika zvoyzd” yarışmasının iştirakçısı olmuş, əslən gürcü olan, ancaq Rusiyada yaşayan gənc müğənni İrakli Pircxalava Bakıda “Face club”da maraqlı konsert proqramı ilə çıxış edib. APA-nın məlumatına görə, “Halloween” formasında keçirilən konsert iki saat gec başlayıb. Konsertə təşrif buyuran qonaqların hərəsi müxtəlif və maraqlı geyimlərlə sənətçini izləməyə gəliblər. Qonaqlar arasında “Eurovision-2009” müsabiqəsində Azərbaycanı təmsil edən Aysel Teymurzadə də olub. Konsertdə müğənni “London-Parij”, “Kaplya absenta”, “Zdelay şaq”, “Vova çuma” və digər məşhur hitləri ifa edib.
İraklinin Bakıdakı konserti Azərbaycanın tanınmış prodüseri Tarix Əliyevin (Tolik) təşkilatçılığı ilə baş tutub.

Konsertdən əvvəl jurnalistlərlə görüşən İrakli həm Azərbaycan musiqisi, həm də öz yaradıcılığı ilə bağlı sualları cavablandırıb: “Mən artıq dördüncü dəfədir ki, Azərbaycandayam. Bakı çox gözəl şəhərdir. Hər dəfə Bakıya gəlmək mənə böyük sevinc hissləri yaşadır. Bakı həm şəhər olaraq, həm də əhali baxımından çox isti məkandır. Bakı mənə həm görünüş, həm energetika, həm də qonaqpərvərliyi ilə Tiflisi xatırladır”. Azərbaycan musiqisindən də danışan sənətçi Müslüm Maqomayev, Polad Bülbüloğlu kimi Azərbaycan sənətkarlarının yaradıcılığını çox sevdiyini və daima dinlədiyini bildirib: “Sentyabr ayında Nabranda olmuşam və orada Bakıda yaşayan həmyerlim Suli ilə tanış olmuşam. Biz onunla birgə səhnəyə çıxmışıq. Ancaq onunla aramızda nəyinsə olması barədə deyilənlər həqiqətə uyğun deyil. Bu münasibətləri sadəcə dostluq adlandırmaq olar. Mən bilirəm ki, Bakıda mənim həmyerlim Manana var və onun ifasını çox sevirəm. Yenidən Bakıda olmaqdan şərəf duyuram”. İrakli qeyd edib ki, Azərbaycanda klip çəkdirmək niyyətindədir, ancaq bu planının nə zaman gerçəkləşəcəyini hələ dəqiq bilmir: “Nabranda olarkən bu fikrə gəlmişik ki, Azərbaycanda bir klip çəkdirək. Ancaq hələlik bununla bağlı dəqiq heç nə deyə bilmirəm, çünki hələ axtarışlar və danışıqlar gedir. Bu işlərlə mənim çox yaxın təşkilatçı dostum məşğul olur”.

“Eurovision” müsabiqəsində iştirak etmək niyyətinin olmadığını da qeyd edən gənc sənətçi bu müsabiqənin ona yaradıcılığı yox, idmanı xatırlatdığını vurğulayıb: “Musiqi yaradıcılıqdır. O müsabiqədə böyük pul var və faktiki olaraq yaradıcılıq orada üstünlük təşkil etmir. Bu isə mənə əsas verir ki, o müsabiqədə iştirak etməyim”.