Şou-biznes

Ana səhifə

Şou-biznes

Azərbaycan ilk dəfə olaraq “Dünya misteri” Beynəlxalq Müsabiqəsində təmsil olunacaq – FOTO

Azərbaycan ilk dəfə olaraq “Dünya misteri” Beynəlxalq Müsabiqəsində təmsil olunacaq – <font color=red>FOTO</font>

04 noyabr 2009 23:16 (UTC +04:00)

Bakı. Ülkər Qasımova – APA. Azərbaycan 2010-cu il aprelin 17-də Seulda (Koreya) keçiriləcək “Dünya misteri” Beynəlxalq Müsabiqəsində təmsil olunacaq.

APA-nın İnterfaxs.by-a istinadən yaydığı xəbərə görə, bu müsabiqədə ölkəmizi Belarusda Sergey Naqorninin Moda Studiyasında model kimi çalışan Hafiz Ağayev təmsil edəcək. Həmyerlimiz məhz müsabiqəyə hazırlıq məqsədilə çalışdığı Sergey Naqorninin Moda Studiyasında xüsusi təlimlər keçir.

“Dünya misteri” müsabiqəsi dünyada kişilər arasında keçirilən ən mötəbər müsabiqədir. İki ildən bir keçirilən müsabiqədə 80 ölkənin nümayəndəsi dünyanın ən arzu olunan kişisi uğrunda mübarizə aparacaq. 17 gün ərzində müsabiqə iştirakçıları çoxsaylı sınaqdan keçməli olacaq, həmin sınaqlarla onların gücü, möhkəmliyi, fərasəti, çətin vəziyyətdən çıxmaq qabiliyyəti aşkarlanacaq. Müsabiqənin qalibi 50 min dollar məbləğində pul mükafatı və böyük model biznesinə imkan yaradacaq. Müsabiqə 100-dən artıq ölkənin televiziya kanalında yayımlanacaq.

Hafiz Ağayev interfaks.by-a verdiyi müsahibədə deyib ki, Azərbaycan ilk dəfədir bu müsabiqəyə qatılır və bu onun üçün çox böyük məsuliyyətdir: “Mən çalışacağam ki, Azərbaycan mədəniyyəti və Bakı haqqında məlumatı dünya ictimaiyyətini məlumatlandırım. Bizim fəxr etməyə çox şeyimiz var. Azərbaycan muğamı UNESCO-nun təşəbbüsü ilə bəşəriyyətin mədəni irs siyahısına daxil olunub. Azərbaycan kinorejissoru Rüstəm İbrahimbəyov “Oskar” mükafatı laureatıdır. Azərbaycan xalq yaradıcılıq nümunələri - xalçaları dünyanın ən tanınmış muzeylərində qorunur. Mən Azərbaycanı layiqincə təmsil etməyə çalışacağam”.

Bir neçə aydır Belarusda müsabiqəyə hazırlıq keçən Hafiz Ağayev bu müddətdə ingilis dilini də öyrənib. Eyni zamanda podium məktəbi, dəfilə, səhnə mədəniyyəti ilə bağlı treninqlər keçir. Onun üzərində stilistlər də çalışır.

Qeyd edək ki, 24 yaşlı Hafiz Ağayev Bakıda anadan olub.