Şou-biznes

Ana səhifə

Şou-biznes

Türkiyəli müğənni Rafet El Roman Bakıda doqquzuncu konsertini verib - FOTOSESSİYA

Türkiyəli müğənni Rafet El Roman Bakıda doqquzuncu konsertini verib - <font color=red>FOTOSESSİYA</font>

30 noyabr 2009 07:27 (UTC +04:00)

Bakı. Ülkər Qasımova – APA. Noyabrın 29-da türkiyəli sənətçi Rafet El Roman Bakıda konsert proqramı ilə çıxış edib. APA-nın məlumatına görə, “Səs Organization”un rəhbəri Nahid Emiloğlunun təşkilatçılığı ilə baş tutan konsert “Metkarting” İdman və Əyləncə Mərkəzinin qış zalında keçirilib. Konsert elə həmin qış zalının təntənəli açılış mərasiminə həsr olunub.

Konsertdə onu müşayiət edəcək azərbaycanlı musiqiçilərlə söhbət edən müğənni tar və kamana olan marağını gizlətməyib, hətta tarı əlinə alıb ifa etməyə də çalışıb: “Azərbaycan musiqisi çox zəngindir. Bu musiqi alətləri məni valeh edir. Fərəh hissi keçirirəm ki, mən bu musiqi alətlərinin müşayiəti ilə mahnılar ifa edəcəyəm. Düzdür, bu musiqi alətlərini çala bilmirəm, ancaq çalmağı çox istərdim. Gitara çaldığım üçün alətlərdən başım çıxır və bu musiqi alətlərindəki tellər, səslər çox gözəldir”. Rafet El Roman musiqiçilər Humay Qədimova və Sevinc Bağıyevanın müşayiəti ilə məşq edib.

Müğənni saat 23:00 radələrində - konsert təyin olunan vaxt səhnəyə çıxıb. Hər konsertində olduğu kimi, budəfəki konsertində Rafet El Romanı izləməyə çoxsaylı tamaşaçılar gəlib. İki saata yaxın davam edən konsertdə sənətçi köhnə və yeni mahnılarını ifa edib. Səhnədən Azərbaycan xalqını salamlayan müğənni Bakıda olmaqdan və yenidən bakılı izləyicilər qarşısında çıxış etməkdən məmnunluq hissi keçirdiyini dilə gətirib: “Bakıda hər konsertim mənə ayrıca bir həzz və zövq verir. Bakıya hər gəlişimdə çox sevinirəm və elə bilirəm ki, öz evimdəyəm. Türkiyə ilə Azərbaycanı heç zaman bir-birindən ayırmıram. Həm Türkiyə, həm də Azərbaycan mənim evimdir. Bundan sonra da sizin qarşınızda hər zaman çıxış etməyə hazıram”.

Müğənni öz repertuarından “Beni aff edermisin” və Tofiq Quliyevin “Sənə də qalmaz” mahnılarını tar və kamanın müşayiəti ilə ifa edib. Konsertdə həm tamaşaçılar, həm də sənətçi özü rəqs edib. Tamaşaçıların istəyi ilə müğənni populyar və çox sevilən “Səni seviyorum” və “Beni aff edermisin” mahnılarını iki dəfə səsləndirib.

Konsertin sonunda Azərbaycan tamaşaçıları ilə sağollaşan müğənni yaxın bir zamanda yenidən Bakıda konsert vermək arzusunu dilə gətirib. Rafet El Roman bu gün Türkiyəyə geri dönüb.

Konsertin təşkilatçısı Nahid Emiloğlu APA-ya bildirib ki, bu, Rafet El Romanın Bakıda keçirilən doqquzuncu konserti olub. Təşkilatçının sözlərinə görə, Rafet El Romanın tez-tez Bakıda konsertinin təşkil olunmasına səbəb onun yetəri sayda tamaşaçısının olmasıdır: “Rafetin konsertinin harada keçirilməsindən asılı olmayaraq, tamaşaçısı var. Bu da onun konsertini təşkil etməyə bizə əsas verir. Rafet El Romanın tamaşaçıları heç zaman onu heç bir konsertində tək buraxmır. İstənilən sənətçinin öz tamaşaçısı var və bu tamaşaçıları hər bir müğənni yeni mahnılarla, səhnə perfomansı ilə əldə saxlayır. Rafet El Roman isə heç zaman müştərilərini yola vermir, tamaşaçıların qarşısında hər zaman ürəkdən çıxış edir”.