Şou-biznes

Şou-biznes

Rafet El Roman valideyn himayəsindən məhrum olmuş istedadlı uşaqların ifasına valeh olub – FOTOSESSİYA

Rafet El Roman valideyn himayəsindən məhrum olmuş istedadlı uşaqların ifasına valeh olub – <font color=red>FOTOSESSİYA </font>

30 noyabr 2009 10:02 (UTC +04:00)

Bakı. Ülkər Qasımova – APA. Dekabrın ortalarında Azərbaycanda yeni musiqi yarışması start götürəcək.

Layihənin təşkilatçısı olan “Səs Organization”un rəhbəri Nahid Emiloğlu APA-ya bildirib ki, bu yarışma kimsəsizlər evindəki valideyn himayəsindən məhrum olmuş istedadlı uşaqların üzə çıxarılması məqsədilə həyata keçiriləcək. “Sən bir nəğməsən” adı altında baş tutacaq musiqi yarışmasının ilk 14 iştirakçısı artıq məlumdur.

N.Emiloğlunun sözlərinə görə, 14 iştirakçı Bakıda fəaliyyət göstərən internat evlərindən seçilib: “Dekabrın ortalarında yarışmanın televiziya versiyasının nümayişinə başlanacaq. Yarışmanın qalibi SMS vasitəsilə təyin olunacaq və məhz gələn SMS-lərlə biz uşaqların gələcək həyatını dəyişdirəcəyik. Onların təhsilini, internatdan ayrıldıqdan sonra iş yeri ilə təmin olunmasını təmin edəcəyik. Yarışmanın əsas mükafatı isə ev olacaq”.

N.Emiloğlu deyib ki, yarışmada heç bir iştirakçı ələnməyəcək, yarışmanın sonunda ən çox SMS toplayan ifaçı birinci yeri qazanacaq və əsas qalibə ev hədiyyə ediləcək: “Bu yeri həmin qalibə xalq verəcək, çünki digər yarışmalardan fərqli olaraq bu yarışmadakı iştirakçılara nə valideynlər, nə də qohumlar tərəfindən SMS göndərilməyəcək. Digər iştirakçılara isə başqa mükafatlar nəzərdə tuturuq. Münsiflər heyəti barədə hələ qəti qərara gəlməmişik. Hələlik münsiflər heyətinin yeganə üzvü prodüser və bəstəkar Asif Kərimovun olacağını dəqiqləşdirmişik. Müğənni və aktyor barəsində isə hələ fikirləşirik”. N.Emiloğlu bu yarışmanın davamlı olacağına da ümid etdiyini vurğulayıb.

Yarışmanın 14 iştirakçısını Bakıda qonaq olan türkiyəli müğənni Rafet El Roman da dinləyib. Konsertdən əvvəl müğənni “Sən bir nəğməsən” musiqi müsabiqəsinin iştirakçıları ilə tanış olub. Türkiyəli sənətçi seçilmiş və artıq müsabiqədə iştirakı təsdiqlənmiş azyaşlı ifaçıları dinlədikdən sonra onların istedadına valeh olduğunu açıqlayıb: “Həqiqətən də çox istedadlı uşaqlardır və onları dinləmək mənə xüsusi zövq verdi. İnanıram ki, bu yarışmada layiqlisi yer tutacaq, ancaq mən bir dinləyici kimi hamısını bəyəndim və bu yarışmaya hər zaman dəstək verməyə hazıram. Bu uşaqlar həm Azərbaycanın xalq mahnılarını, həm də istənilən estrada mahnısını ifa etmək bacarığına malikdirlər. Azərbaycan musiqisi çox zəngindir və bu yolu davam etdirəcək istedadlı gənclərə ehtiyac var. Bu uşaqların da layiqli davamçılar olacağına əminəm”.

Qeyd edək ki, “Sən bir nəğməsən” musiqi yarışmasının informasiya dəstəyi APA İnformasiya Agentliyinə məxsusdur.