Şou-biznes

Ana səhifə

Şou-biznes

Azərbaycan şou-biznesində düşmənçilik – ARAŞDIRMA

Azərbaycan şou-biznesində düşmənçilik – <font color=red>ARAŞDIRMA </font>

01 dekabr 2009 09:34 (UTC +04:00)

Bakı. Ülkər Qasımova – APA. Azərbaycan şou-biznes aləminin nümayəndələri arasında uzun illərdir bir-biri ilə küsülü olanlar, hətta sözün həqiqi mənasında düşmənçilik edənlər az deyil. APA üçün bu mövzunu işləyib ortaya çıxarmaq həm asan oldu, həm çətin. Ona görə asan oldu ki, münaqişəli tərəfləri uzun-uzadı axtarmağa, müxtəlif mənbələrlə dəqiqləşdirmə aparmağa ehtiyac yoxdur, bu sənət adamlarının kimlər olduğunu çoxumuz əzbərdən bilirik. Çətinliyin səbəbi isə bir-biri ilə “soyuq müharibə” aparan müğənnilərin siyahısının çox uzun olmasından qaynaqlandı. Belələrinin sayı o qədər çoxdur ki, heç bu siyahının sonuna gedib çıxa bilmədik. Bu səbəblə yazını oxuyanların “filankəslə filankəsdən yazmamısınız” şəklində iradını sanki indidən duyuruq. Mövzumuza Azərbaycanın iki azman sənətkarı, xalq artistləri Flora Kərimova ilə İlhamə Quliyevanın 40 illik tarixçəsi olan və bitib-tükənmək bilməyən qarşıdurmasından başlayaq.

Hər iki sənət adamı bir-birini əbədi düşmən adlandırıb. Aralarındakı münaqişə məhkəmə müstəvisinə də çıxıb. Bu məhkəmə işində Flora Kərimovanın qarşı-qarşıya gəldiyi şəxslər arasında xalq artisti Faiq Ağayev, aktyor Sərxan Kərəmoğlu, İlhamə Quliyevanın mətbuat katibi Faiq Ələkbərli də var. F. Kərimova adları sadalanan bu dörd nəfərlə heç vaxt barışmaq niyyətində olmadığını qətiyyətlə vurğulayır: “Mənə böhtan atan insanlarla necə barışa bilərəm?!”

Xalq artistləri Brilliant Dadaşova ilə Faiq Ağayevin 15 ilə yaxındır davam edən küsülülüyünü də düşmənçilik kimi təqdim etsək, yanılmarıq. Bu şöhrətli sənətçilər arasında qalmaqalın səbəbi kimi toyların birində F. Ağayevin B. Dadaşovanın anasının ünvanına səsləndirdiyi ifadələr göstərilir. Hətta tərəflər məhkəməyə qədər gedib çıxıblar. Brilliant Dadaşova ilə Lalə Məmmədova arasında da soyuqluq var. Küsülülüyün səbəbi budur ki, B. Dadaşova L. Məmmədovanı onu təqlid etməkdə qınayır. Brilliant xanımın küsülü olduğu sənət adamları arasında Azərbaycan sabiq mədəniyyət naziri, hazırda Rusiyadakı səfirimiz, xalq artisti Polad Bülbüloğlu da var. Əldə etdiyimiz məlumata görə, P. Bülbüloğlu ilə B. Dadaşova arasındakı küsülülüyün tarixi 2004-2005-ci illərə təsadüf edir. Bu iki tanınmış sima arasında münasibətlərin korlanmasında Faiq Ağayevin rol oynadığı iddia edilir. Belə ki, Brilliant Dadaşova o vaxt digər həmkarları (Aygün Kazımova və Zülfiyyə Xanbabayeva) ilə birlikdə Moskvada keçirilən Azərbaycan Mədəniyyət Günlərində iştirakdan imtina edib. Çünki həmin tədbirdə F. Ağayev də iştirak edirmiş.

Xalq artisti Aygün Kazımovanın küsülü olduğu sənətçilərin siyahısı da uzundur. Onlar arasında Sevda Ələkbərzadə, Natəvan Həbibi, Röya və Elnarə Xəlilovanın adlarını çəkmək olar. A. Kazımovanın S. Ələkbərzadə ilə münasibətlərinin korlanmasının tarixi 2007-ci ilə təsadüf edir və deyilənə görə, birincinin digərinin anası haqqında söylədiyi fikirlərdən qaynaqlanır. A. Kazımova dəfələrlə S. Ələkbərzadənin ifasını bəyəndiyini deyib, lakin ona yalnız radioda oxumağı məsləhət görüb. Bu ikili uzun müddətdir nəinki təmasdan qaçır, hətta qarşı-qarşıya gələndə salamlaşmır. A. Kazımova ilə N. Həbibinin münasibətlərindəki soyuqluğun təməli isə yerli televiziyaların birində yayımlanan “Nömrə-1” şousunda qoyulub. Röya-Aygün konfliktinə gəldikdə, münasibətlərin pisləşməsinin səbəbi birincinin xalq artistinin ünvanına dediyi sözlər olub. A. Kazımova da söz altında qalan olmadığından hər dəfə Röyanın cavabını artıqlaması ilə verib. Bu küsülülük bəziləri tərəfindən sənət qısqanclığı və şou dünyasında birincilik davası kimi qiymətləndirilsə də, Aygün Röyanı özünə rəqib görmədiyini dəfələrlə bəyan edib. Ümumiyyətlə, Aygün Kazımova müəllimi Vaqif Gərayzadənin vaxtilə yaratdığı “W-trio” qrupunun heç bir üzvü ilə kəlmə kəsmir. Elnarə də bu baxımdan istisna deyil.

Şou nümayəndələri arasında uzun müddət yaxın dost olduqları zənn edilən Zülfiyyə Xanbabayeva ilə Aygün Kazımova cəmiyyət arasında görüşsələr də, münasibətləri əvvəlki kimi deyil. Zülfiyyə Xanbabayeva ilə əməkdar artist Aygün Bəylər arasında soyuqluq isə bir neçə il əvvəl Sibel Canın Bakıda keçirilən konsertində əmələ gəlib. Belə ki, həmin konsertdə Z. Xanbabayeva uğurlu çıxış edə bilmədiyindən səhnəyə A. Bəyləri çıxarıblar, bu isə Zülfiyyə xanımda qısqanclıq yaradıb. Qısqanclıq özünü bu yaxınlarda daha bariz göstərib. A. Bəylərin Z. Xanbabayevanın repertuarına müraciət etməsi ikincinin qəzəbinə səbəb olub və o, İradə İbrahimovanın toyunda bunu açıq-aydın büruzə verib.

İradə İbrahimovanın kəlmə kəsmədiyi müğənnilər arasında isə Röya, Səidə Sultan, prodüserlər Anar və Elnurə Mədətovlar var. Röya ilə İradənin qalmaqalının əsası bir müddət əvvəl qoyulub.

Xalq artisti Faiq Ağayevlə Abbas Bağırov arasındakı sevgisizlik də çoxlarına məlumdur. Münasibətlərin korlanmasına toy bazarında baş verən proseslər səbəb olub. (Yeri gəlmişkən qeyd edək ki, Abbas Bağırov müğənni Elnurla da danışmır.) F. Ağayevin münasibət saxlamadığı müğənnilər arasında Nadir Qafarzadə, Kərim, Rəqsanə İsmayılova və prodüser Rüfət İsmayılov da var. Xalq artisti ilə Kərim arasındakı “soyuq müharibə”nin səbəbi Kərimin F. Ağayevin keçmiş qaynı Rüfət İsmayılovla işbirliyi qurmasıdır.

Müğənni Nura Surinin kəllə-kəlləyə gəldiyi həmkarları sırasında xalq artisti Aygün Kazımova, müğənnilər Zamiq, Natəvan Həbibi, Röya, stilist Anar Ağakişiyev, eləcə də prodüser Tarix Əliyevin (Tolik) adlarını sadalamaq olar.

Xalq artisti Nazpəri Dostəliyevanın “qara siyahı”sında isə Brilliant Dadaşova, Milli Konservatoriyanın rektoru Siyavuş Kərimi kimi tanınmış sənət adamları var.

Araşdırmamız zamanı o da üzə çıxdı ki, indiyə qədər ictimaiyyətə məlum olmayan küsülülər də var. Məsələn, əməkdar artistlər Manana ilə Azərin uzun müddətdir bir-birindən gen gəzir...

Siyahını uzatmaq da olar, lakin bu mövzuya müraciət etməkdə məqsədimiz mövcud narazılıqları, qarşıdurmaları daha da qızışdırmaq, sönmüş vulkanları oyatmaq deyil, keçmişdə əsası qoyulan xoşagəlməz ənənələrin bu gün gənc müğənnilər tərəfindən davam etdirildiyinə diqqət çəkməkdir. Təəssüf ki, özünü sənətdə çox-çox öncələr təsdiq etmiş yaşlı-başlı sənətçilərimiz gənc müğənnilərə örnək olmaq əvəzinə, yanan oda neft tökməyə davam edir, hətta heç ehtiyacları olmadığı halda, sənətdə ilk addımlarını atan bu gənclərlə söz davasına çıxır, rəqabətə girirlər. Bu gün gəncləri mənasız düşmənçilikdə qınayan yaşlı nəslin nümayəndələri unutmasınlar ki, bu ənənənin əsası məhz onlar tərəfindən qoyulub. Necə deyərlər, dünya gör götür dünyasıdır...