Şou-biznes

Ana səhifə

Şou-biznes

Avropa Yayım Birliyi “Eurovision” müsabiqəsi üçün hazırladığı rolikə siyasi çalar qatdığı üçün Ermənistana xəbərdarlıq edib

08 dekabr 2009 13:55 (UTC +04:00)

APA-nın məlumatına görə, Ermənistanın “Eurovision-2010”-da Mihran və Emmi ilə təmsil olunacağı barədə xəbərdən sonra isə “ArmTV” Avropa Yayım Birliyinin Azərbaycanla bağlı qərarından narazı olduğunu və müsabiqədə iştirakdan imtina barəsində düşündüklərini bildirib. “Eurovision” müsabiqəsi üzrə Ermənistanın nümayəndə heyətinin rəhbəri Diana Mnatsakanyan EBU-nun Azərbaycanla bağlı son qərarını gözlədiklərini deyib: “Bu məsələ ilə bağlı rəsmi qərarı almadığımıza görə, biz hələ 2010-cu ildə “Eurovision”-da iştirakla bağlı son qərarımızı elan etməmişik. Yalnız Avropa Yayım Birliyinin qərarından sonra milli seçimlə bağlı qərar verəcək, seçimin necə və harada keçiriləcəyini bildirəcəyik”.

Müsabiqənin rəsmi internet saytında yerləşdirilən xəbərlə bağlı “Eurovision” müsabiqəsi üzrə Azərbaycan nümayəndə heyətinin rəhbəri Adil Kərimli isə APA-ya bildirib ki, Azərbaycanla bağlı verilən qərar EBU-nun son və qəti qərardır: “Məncə, bu, ədalətli qərardır. Avropa Yayım Birliyinin qərarına əsasən, biz 2700 avro məbləğində cərimə ödəmişik. Ümumilikdə isə onu qeyd etmək istərdim ki, Avropa Yayım Birliyinin çox demokratik qurumdur və istənilən qərar ətraflı, dəqiq araşdırmadan sonra verilir. Ona görə də verilən qərarın ədalətsiz, yaxud sərt cəza olmasını söyləmək düzgün deyil. İctimai Teleradio aparılan bütün müzakirələrdə iştirak edib, baş vermiş qüsurun araşdırılmasında əsas tərəf olub. Ona görə də qəbul olunan qərara hörmətlə yanaşırıq. Məncə, bu cür qərarların verilməsi cəza deyil, EBU-nun mövcud qanun və qaydalarına özünün və üzvlərinun daha ciddi yanaşmasıdır. Çıxarılan qərarın Azərbaycanın növbəti yarışmada iştirakına təsiri yoxdur. Azərbaycan “Eurovision-2010”-da da layiqincə təmsil olunacaq”.

A. Kərimli qeyd edib ki, Ermənistanın bu cür çıxışları heç də qərarda hansısa dəyişikliyin olacağı anlamına gəlmir: “Həmin qərara əsasən, Azərbaycan və İspaniyaya xəbərdarlıq olundu və bununla bağlı qoyulan cərimə ödənildi. Biz EBU-ya yetəri qədər dəlil və sübutlar təqdim etdik. EBU isə bildirdi ki, həqiqətən də Azərbaycan televiziyasında Ermənistan təmsilçilərinin sms nömrələrinin yazılmaması texniki səbəbdən baş verib. Bu qərardan sonra isə hansısa şikayət verilə bilməz. EBU-nun müvafiq tənzimləyici sənədlərində və nizamnaməsində də müvafiq müddəalar göstərilib. Nizamnamədə bildirilir ki, EBU-nun son və qəti qərarından sonra şikayət verilə bilməız”.

A. Kərimli bildirib ki, Ermənistanın “Eurovision-2010” müsabiqəsində iştirakdan imtina edib-etməyəcəyi öz işidir: “Ermənistan müsabiqədən imtinasına hansısa don geyindirmək istəyirsə, bu onun öz işidir. Ancaq onu bildirmək istərdim ki, gələnilki “Eurovision” müsabiqəsində təmsilçiliyi təsdiqlənmiş ölkələr dekabrın ortalarına kimi iştirakdan imtina edə bilərlər. Bu tarix isə EBU tərəfindən qoyulub. İstənilən ölkənin göstərilən tarixədək müsabiqədən imtina etmə hüququ var. Yanvar ayının əvvəllərində isə artıq “Eurovision-2010” müsabiqəsində iştirakçı ölkələrin son siyahısı açıqlanacaq”.

Etibarlı mənbələrdən isə APA-ya bəlli olub ki, Azərbaycanla bağlı verilən qərarla yanaşı, Ermənistana da EBU tərəfindən xəbərdarlıq olunub. Bu xəbərdarlıq Ermənistana “Eurovision-2009” müsabiqəsi üçün hazırladığı rolikə siyasi çalar qatdığı üçün edilib. Ermənistan isə müsabiqədə siyasi müdaxiləyə bir daha yol verməyəcəyinə dair EBU-ya söz verib.

Qeyd edək ki, EBU noyabrın 21-də Azərbaycanın İctimai Televiziyası ilə bağlı rəsmi bəyanat yayıb. Bəyanata görə, İctimai Televiziya itirilmiş gəlirin qaytarılmasına və cərimənin ödənilməsinə görə məsuliyyət daşıyır. Avropa Yayım Birliyi, həmçinin İTV-yə xəbərdarlıq edib ki, qaydalar yenidən pozularsa, ölkənin müsabiqədə iştirakına üç il ardıcıl qadağa qoyula bilər.

“Eurovision_2010”