Şou-biznes

Ana səhifə

Şou-biznes

Adil Kərimli: ““Eurovision” bir musiqi yarışmasıdır, siyasi mübarizə deyil” - MÜSAHİBƏ

Adil Kərimli: ““Eurovision” bir musiqi yarışmasıdır, siyasi mübarizə deyil” - <font color=red>MÜSAHİBƏ</font>

11 dekabr 2009 08:36 (UTC +04:00)

Bakı. Ülkər Qasımova - APA. İctimai Televiziya və Radio Verilişləri Şirkətinin (İTV) Hüquq və beynəlxalq əlaqələr departamentinin rəhbəri, “Eurovision” müsabiqəsi üzrə Azərbaycan nümayəndə heyətinin rəhbəri Adil Kərimlinin APA-ya müsahibəsi

- Azərbaycanın “Eurovision” müsabiqəsində iştirakına yaranan problemlər tam həllini tapdımı?

- Əslində, bu məsələni problem kimi qiymətləndirmək doğru olmaz, bu, bir araşdırma idi. Avropa Yayımları Birliyinin apardığı araşdırmalar nəticəsində müvafiq qərar qəbul edildi. Qaldı Azərbaycanın 2010-cu il “Eurovision” mahnı müsabiqəsində iştirakına, burada heç bir problem yoxdur.

- Avropa Yayım Birliyinin İTV-ni 2700 avro dəyərində cərimə etməsi Sizcə düzgün qərardır?

- Məncə, bu, ədalətli qərardır. Ümumiyyətlə, Avropa Yayım Birliyi çox demokratik qurumdur və istənilən qərar ətraflı, dəqiq araşdırmadan sonra verilir. Ona görə də verilən qərarın ədalətsiz, sərt olduğunu söyləmək düzgün deyil. Eyni zamanda, İctimai Teleradio aparılan bütün müzakirələrdə iştirak edib və baş vermiş qüsurun araşdırılmasında əsas tərəf olub. Ona görə də qəbul olunan qərara hörmətlə yanaşırıq. Məncə, bu cür qərarların verilməsi cəza deyil, AYB-nin mövcud qanun və qaydalarına özünün və üzvlərin daha ciddi yanaşmasıdır.

- Bizdə olan məlumata görə, Avropa Yayım Birliyi Azərbaycanın müsabiqədə iştirakı ilə bağlı qərar verərkən, Ermənistanı da müsabiqəyə siyasi don geyindirməkdə qınayıb və bununla bağlı xəbərdarlıq edib...

- Doğrudur, Ermənistana cərimə tətbiq olunmayıb, lakin belə halın bir daha təkrarlanmaması ilə bağlı onlara ciddi xəbərdarlıq edilib.

- “Eurovision-2009” müsabiqəsində Azərbaycan təmsilçilərindən biri olan Araşın iştirakı birmənalı qarşılanmadı. Erməni təmsilçilərinə səs göndərən Azərbaycan vətəndaşları da etirazlarını bu yolla bildirdiklərini dedilər. Növbəti illərdə də digər ölkə sənətçisi Azərbaycanı sözügedən müsabiqədə təmsil edə bilərmi və bu, nə dərəcədə doğrudur?

- “Eurovision” Mahnı Müsabiqəsində belə bir təcrübə mövcuddur. Bu təcrübədən uğurla istifadə edənlərdən biri də məhz Azərbaycan oldu. Təbii ki, bir məqamı nəzərə almaq çox vacibdir. Əsas iştirakçı mütləq azərbaycanlı olmalıdır.

- “Eurovision-2010” müsabiqəsi üçün aparılan milli seçimlər hansı mərhələdədir və təmsilçimiz hansı yolla seçiləcək?

- Seçim davam edir. Müsabiqənin son mərhələsi və keçirilmə forması ilə bağlı ictimaiyyətə geniş məlumat veriləcək. Onu da deyim ki, seçim peşəkar jüri tərəfindən aparılır.

- “Eurovision” müsabiqəsində Azərbaycanı təmsil etmiş sənətçilərin müsabiqədən sonrakı fəaliyyəti o qədər də nəzərə çarpmır. İTV müsabiqədən sonra təmsilçilərimizin aqibəti ilə maraqlanırmı?

- “Eurovision” müsabiqəsindən sonra hər bir təmsilçi müstəqil fəaliyyət göstərir. Bununla yanaşı, onların yaradıcı fəaliyyətini bir teleradio kimi biz də izləyirik.

- Avropa Yayım Birliyi 2010-cu il üçün “Eurovision” müsabiqəsinin qaydalarında bir sıra dəyişikliklər edib. Bu dəyişikləri necə qiymətləndirirsiniz?

- Edilən dəyişikliklərə heç bir iradımız yoxdur. Düşünürəm ki, bu dəyişikliklər AYB-nin qaydalarının təkmilləşdirilməsinə xidmət edir. Bu dəyişikliklər müsabiqə zamanı AYB-nin qaydalarına daha ciddi riayət olunmasına xidmət edəcək.

- “Eurovision” müsabiqəsinin musiqi yarışmasından daha çox siyasi yarışma olması barədə fikirləri bölüşürsünüzmü?

- Yox, bu, bir musiqi yarışmasıdır, siyasi mübarizə deyil.

- İki ildir, bu müsabiqədə təmsil olunmağımıza baxmayaraq, Azərbaycanın müsabiqə ilə bağlı saytı yoxdur. Nədənsə müsabiqə ilə bağlı məlumatlar çox çətinliklə əldə olunur. Bu halın aradan qalxması üçün hansı tədbirlər görülür?

- “Eurovision” mahnı müsabiqəsi ilə bağlı məlumatlar müxtəlif mənbələrdən əldə oluna bilər. Məlumatların yerləşdirildiyi eurovision.az saytı isə tezliklə bərpa olunacaq. Bununla bağlı hazırda işlər gedir.

- Ölkələr “Eurovision”da iştirak üçün nə qədər vəsait xərcləyir? Bu müsabiqədə iştirak üçün bu xərci çəkməyə dəyərmi?

- “Eurovision”da iştirak üçün ölkələrin çəkdiyi xərclər müxtəlifdir. Konkret rəqəm söyləmək çətindir. Hesab edirəm ki, mədəniyyətimizin və musiqimizin təbliği, eyni zamanda ölkəmizin dünya ictimaiyyətinə daha yaxından tanıdılması baxımından bu əhəmiyyətli bir layihədir. Ona görə də bu işlərə müəyyən qədər vəsait xərcləməyə dəyər.