Şou-biznes

Ana səhifə

Şou-biznes

“Eurovision-2010” müsabiqəsində Azərbaycanı təmsil etmək şansı olan namizədlərlə görüş keçirilib - FOTOSESSİYA

“Eurovision-2010” müsabiqəsində Azərbaycanı təmsil etmək şansı olan namizədlərlə görüş keçirilib - <font color=red>FOTOSESSİYA</font>

16 yanvar 2010 07:05 (UTC +04:00)

Bakı. Ülkər Qasımova-APA. Yanvarın 15-də İctimai Televiziya və Radio Verilişləri Şirkətində (İTV) “Eurovision-2010” müsabiqəsində sona qalan 6 namizədlə görüş keçirilib. APA-nın məlumatına görə, görüşdə namizədlərdən Azad Şabanov, Səfurə Əlizadə, Məryəm Şabanova, Ülviyyə Rəhimova və “Milk&Kisses” qrupu iştirak edib. Namizədlərdən Elli Miçiyeva Almaniyada yaşadığına görə görüşə qatıla bilməyib. Görüşə eləcə də “Eurovision” müsabiqəsinin rəsmi fan-klubu olan “Ogae Azerbaijan”ın üzvləri də qatılıblar.

Namizədlərin hər biri fevralın 2-də keçiriləcək yarımfinal müsabiqəsinə ciddi hazırlaşdıqlarını bildiriblər. Azad Şabanov çıxışında yarımfinala keçən hər bir namizədi özünə rəqib hesab etdiyini vurğulayıb. Namizəd eləcə də özünə və səsinə güvəndiyini də gizlətməyib. Kiçik yaşlarından musiqiyə həvəsinin olduğunu deyən Azad Şabanov “Eurovision”da iştirakı uzun müddətdir arzuladığını qeyd edib. O bildirib ki, bu müsabiqədə ritmik mahnının ifa olunması vacibdir və iştirakçıda mütləq müsbət enerji olmalıdır.

Məryəm Şabanova 24 yaşında olduğunu və uşaqlıqdan bu sənətə çox böyük marağı yarandığını vurğulayıb: “Atam da musiqiçidir. Mən müxtəlif janrlarda musiqiləri dinləməyi də, ifa etməyi də sevirəm. Əsasən Meray Keri, Uitni Hyustonun yaradıcılığını sevirəm”.

Səfurə Əlizadə hazırda 11-ci sinifdə oxuduğunu və təhsil aldığı orta məktəbin ona fevralın 2-də keçiriləcək yarımfinal mərhələsinə hazırlaşmaq üçün şərait yaratdığını qeyd edib. O həmçinin saksofon musiqi alətində ifa bacarığının olduğunu vurğulayıb: “İki-üç aya artıq mən bu alətdə çalmağı öyrəndim. Azərbaycan səhnəsində saksofon musiqi alətində ifa edən ümumiyyətlə yoxdur. Mən hər zaman yenilikləri sevmişəm və bu addımımla da bunu nümayiş etdirmişəm. Saksofonda ifa etməyi çox sevirəm. Çox qısa müddətdə istənilən bir mahnını saksofonda ifa edə bilirəm. Yəni musiqi duyumum çox yaxşıdır. Layiqli ölkə təmsilçisində plastika, cəlbedicilik və şarm olması vacib amillərdir”. S. Əlizadə eləcə də dünya estradasından Beyonsu çox sevdiyini vurğulayıb.

“Milk&Kisses” qrupunun üzvləri Dilarə və Fəridə də fevralın 2-nə ciddi hazırlaşdırdıqlarını qeyd ediblər.

Ülviyyə Rəhimova bildirib ki, “Eurovision” müsabiqəsində qalib gəlmək üçün təmsilçidən çox böyük məsuliyyət tələb olunur. Eləcə də hər bir namizəd bu müsabiqədə qalibiyyət üçün səhnə görünüşünün, mahnı seçiminin və təmsilçinin enerjili olmasını xüsusi vurğulayıblar.