Şou-biznes

Ana səhifə

Şou-biznes

“Eurovision-2010” müsabiqəsində Azərbaycanı təmsil etməyə iddialı olan 6 namizəddən 3-ü finala vəsiqə qazanacaq

16 yanvar 2010 09:15 (UTC +04:00)

Bakı. Ülkər Qasımova - APA. Bu ilin mayında Osloda keçiriləcək “Eurovision-2010” müsabiqəsində Azərbaycan təmsilçisinin seçilməsi üçün fevralın 2-də “Buta Palace”da keçiriləcək milli yarımfinal konsertində altı namizəddən üçü finala keçəcək.

Müsabiqənin Azərbaycan üzrə nümayəndə heyətindən APA-ya verilən məlumata görə, fevralın 2-də keçirilən milli seçimlərdən yarımfinala vəsiqə qazanan altı namizəd hazırladığı mahnıları ifa edəcək.

Namizədlərin, eləcə də konsertin qonaqlarının ifalarından sonra milli münsiflər heyətinin qərarı ilə finala keçən üç namizədin adı məlum olacaq. Daha sonrakı mərhələdə isə həmin üç namizəddən biri Azərbaycanı “Eurovision-2010” müsabiqəsində təmsil etmək şansı qazanacaq.

Qeyd edək ki, 55-ci “Eurovision” müsabiqəsinin mayın 25-i və 27-də yarımfinal, 29-da isə final mərhələsi keçiriləcək. “Eurovision-2010” müsabiqəsində Avropanın 39 ölkəsi iştirak edəcək.