Şou-biznes

Ana səhifə

Şou-biznes

Ülviyyə Rəhimova: “Eurovision-2010”-da Azərbaycan təmsilçisinin artıq seçilməsi ilə bağlı danışılanlar dedi-qodudur” - FOTOSESSİYA

Ülviyyə Rəhimova: “Eurovision-2010”-da Azərbaycan təmsilçisinin artıq seçilməsi ilə bağlı danışılanlar dedi-qodudur” - <font color=red>FOTOSESSİYA</font>

16 yanvar 2010 09:50 (UTC +04:00)

Bakı. Ülkər Qasımova – APA. “Eurovision-2010”-da Azərbaycan təmsilçisinin artıq seçilməsi ilə bağlı danışılanların hamısı dedi-qodudur. Mən bütün bu deyilənlərə inanmıram və belə bir şeyin olmadığına əminəm. Hər şey göz önündədir, hamıya məlumdur ki, altı namizəd seçilib, ayın 2-də üç nəfər finala keçəcək və həmin üç nəfər arasından təmsilçimiz seçiləcək”. Bu sözləri APA-ya açıqlamasında “Eurovision-2010” müsabiqəsində Azərbaycan təmsilçisinin seçilməsi üçün keçirilən milli seçimlərdə yarımfinala keçən 6 namizəddən biri Ülviyyə Rəhimova deyib.

İfaçı bu cür dedi-qoduların hər il milli seçimlər ərəfəsində yarandığını vurğulayıb: “Əgər biz namizədlər bu şayiələrə inansaydıq, o zaman heç fevralın 2-nə hazırlaşa bilməzdik. Bu cür söz-söhbətlər, daha doğrusu, şayiələr hər zaman olub və olacaq. Bu, təkcə bizdə deyil, bütün iştirakçı ölkələrdə baş verir. Fevralın 2-nə hazırlığım çox güclü gedir və ümid edirəm ki, pərəstişkarlarım ciddi-cəhdlə hazırladığım mahnını bəyənəcəklər. Həmin günü münsiflər heyətini öz stilimlə, səs tembrimlə və əlbəttə ki, mahnımla təəccübləndirmək fikrindəyəm. Həmin gün çox ritmik bir mahnı ifa edəcəyəm”.

Özünə və səsinə güvənən Ü.Rəhimova Azərbaycan təmsilçisi olsa, ölkəmizi ilk üçlüyə çıxaracağını açıqlayıb: “Əgər təmsilçilik mənə həvalə olunsa, ötən ilki təmsilçilərimiz Aysellə Araşın uğurunu təkrarlamaq və bəlkə də qabaqlamaq üçün əlimdən gələni edəcəyəm. Ən azı ümid edirəm ki, təmsilçi olsam, ilk üçlüyə daxil olacağam. Özünəinam çox yaxşı xüsusiyyətdir və təmsilçidə bu xüsusiyyətin olması vacibdir. İlk üçlüyə daxil olmaq da pis nəticə deyil”.

Xatırladaq ki, fevralın 2-də “Buta Palace”da “Eurovision-2010” təmsilçisinin seçilməsi üçün milli yarımfinal konserti keçiriləcək. Konsertdə yarımfinala keçən 6 namizəd, eləcə də konsertin qonaqları - “Eurovision-2009”-un qalibi Aleksandr Rıbak, “Eurovision-2009” müsabiqəsində Azərbaycanı təmsil edən AySel Teymurzadə, eləcə də bir neçə il bundan əvvəl bu müsabiqədə qalib olmuş ukraynalı Ruslana çıxış edəcək.