Şou-biznes

Ana səhifə

Şou-biznes

Adil Kərimli: “Eurovision-2010” müsabiqəsində Azərbaycan təmsilçisinin artıq seçildiyi barədə fikirlər əsassızdır” – EKSKLÜZİV – FOTOSESSİYA

Adil Kərimli: “Eurovision-2010” müsabiqəsində Azərbaycan təmsilçisinin artıq seçildiyi barədə fikirlər əsassızdır” – <font color=red>EKSKLÜZİV – FOTOSESSİYA</font>

18 yanvar 2010 08:40 (UTC +04:00)

Bakı. Ülkər Qasımova – APA. ““Eurovision-2010” müsabiqəsində Azərbaycan təmsilçisinin artıq seçilməsi və bütün seçimlərin sadəcə gözə kül üfürmək üçün həyata keçirilməsi ilə bağlı ictimaiyyətdə kifayət qədər yanlış fikirlər var. Mətbuatdan da dəfələrlə xahiş etmişik ki, bu fikirlərə əsas verəcək heç nə yoxdur, ola da bilməz. Biz müsabiqənin milli yayım şurası olaraq 6 nəfəri seçmişik ki, münsiflər heyəti də onların arasından ən yaxşısını seçsin. Onların hər hansı birinə üstünlük veriləcəyini demək çox bəsit bir şeydir. Bu cür düşüncə məntiqə sıxmır”. Bu açıqlamanı APA-ya “Eurovision” müsabiqəsi üzrə Azərbaycan nümayəndə heyətinin rəhbəri Adil Kərimli deyib.

O bildirib ki, hazırda Azərbaycanın “Eurovision-2010” müsabiqəsində təmsilçisinin seçilməsi üçün fevralın 2-də “Buta Palace”da keçiriləcək milli yarımfinala ciddi hazırlıq işləri gedir: “Fevralın 2-nə çox az vaxt qalıb, ancaq buna baxmayaraq çox gərgin hazırlıq gedir. Çünki biz demişik ki, bu konsertin keyfiyyət “Eurovision” səviyyəsində olacaq. Təbii ki, bu durumda da bu konsertin Avropaya çıxacaq bir şəkildə həyata keçməsi üçün maksimum işlər görülməlidir. “Eurovision-2008” müsabiqəsində Azərbaycan təmsilçisinin seçilməsi üçün elə həmin il keçirilən milli final gecəsi kimi bunu da çox keyfiyyətli edəcəyik. Ona görə də həm yaradıcılıq, həm texniki baxımdan, eyni zamanda təşkilatı işlərlə bağlı çox gərgin hazırlıqlar gedir. Altı namizədin də tam olaraq hazırlığı başlanılıb. Artıq onlar milli yarımfinal gecəsində ifa edəcəkləri mahnılar üzərində çalışırlar. Biz hesab edirik ki, gələn ay 2-də çox uğurlu bir seçimimiz olacaq”.

“Eurovision-2010” müsabiqəsində Azərbaycanı təmsil etmək iddiasında olan namizədlərdən biri olan Elli Miçiyevanın Almaniyada yaşamasına gəlincə Adil Kərimli namizədin xaricdə yaşamasında heç bir problem olmadığını diqqətə çatdırıb: “Ellinin Almaniyada yaşaması qəti problem yarada bilməz. O milli seçimlərə iştirakçı kimi qatılır və altı nəfərdən biridir. Təbii ki, şərtlərə əməl etsə, onun Almaniyada yaşamasının heç bir problemi yoxdur”. Adil Kərimli 55-ci “Eurovision” müsabiqəsində Azərbaycan təmsilçisinin seçilməsi üçün keçiriləcək yarımfinal və final mərhələsində münsiflər heyətinin tərkibində dəyişiklik olacağını deyib: “Münsiflər heyətinin tərkibinin açıqlanmamasının əsas səbəbi obyektivliyə riayət etmək deyil. Sadəcə olaraq münsiflər heyətinin tərkibində dəyişiklik olacaq və dəyişiklik olan kimi də tərkib ictimaiyyətə açıqlanacaq”.

Nümayəndə heyətinin rəhbəri onu da vurğulayıb ki, “Eurovision-2010” müsabiqəsində də Azərbaycan təmsilçisinin hazırlığı üçün iki il ərzində əməkdaşlıq etdikləri Ukraynanın “Luksen” şirkəti ilə işbirliyi olacaq: “Təbii ki, builki müsabiqədə də təmsilçimizin hazırlığı üçün lazımi tədbirlərin həyata keçirilməsi haqqında düşünürük, ancaq konkret hansı şirkətlə əməkdaşlıq edəcəyimiz məlum deyil. Təbii ki, biz bu ildə iki il əməkdaşlıq etdiyimiz ukraynalı tərəfdaşlarımızın köməyindən istifadə edəcəyik”.