Şou-biznes

Ana səhifə

Şou-biznes

“Göygöl” ansamblının 40 illik yubileyi qeyd edilib - FOTOSESSİYA

“Göygöl” ansamblının 40 illik yubileyi qeyd edilib - <font color=red>FOTOSESSİYA</font>

29 yanvar 2010 10:26 (UTC +04:00)

Bakı. Ülkər Qasımova – APA. Yanvarı 29-da Muğam Teatrında xalq artisti Şahnaz Haşımovanın rəhbərlik etdiyi “Göygöl” Dövlət Mahnı və Rəqs Ansamblının 40 illik yubileyinə həsr olunmuş tədbir keçirilib. APA-nın məlumatına görə, Ş. Haşımova ansamblın fəaliyyətindən danışıb və kollektivin üzvlərinə sadiqlikləri üçün təşəkkürünü bildirib: “1969-cu ildə Fikrət Əmirovun təşəbbüsü ilə bu ansambl yaradıldı. O tarixdən bəri bu ansambl öz sözünə xilaf çıxmadı. Qırx il səhnədə, sənətdə qalmaq çox böyük zəhmət tələb edir”.

Xalq artisti, tarzən Ramiz Quliyev deyib ki, Gəncənin tarixində iki böyük şəxsiyyətin – Nizami Gəncəvi və Cavad xanın adı çəkildikdə Gəncənin hansı vüqara sahib olduğu məlum olur: “Bu gün Azərbaycanımızın musiqi sənətinin layiqli simaları bu ansamblda toplaşıb. Şahnaz Haşımovanın simasında hər bir kollektiv üzvünü təbrik edirəm. “Göygöl” ansamblı Azərbaycanın və Gəncənin fəxridir”.

Əməkdar artist Aybəniz Haşımova da “Göygöl”ün Azərbaycan mədəniyyətində əvəzsiz xidmətlərinin olduğunu söyləyib.

Sonra Şahnaz Haşımova “Göygöl” ansamblının müşayiəti ilə mahnı ifa edib.

Tədbirin yaddaqalan məqamlarından biri də Aybəniz Haşımovanın qızı Aynişanın mahnı ifa etməsi olub. Aynişan Quliyeva məşhur türkiyəli müğənni Sezen Aksunun repertuarından bir mahnı ilə xalasını təbrik edib.