Şou-biznes

Ana səhifə

Şou-biznes

Byorn Eriksson: “Eurovision” da uğur qazanmaq üçün iştirakçıların ilk növbədə olduqları kimi görünmələri vacibdir”

01 fevral 2010 18:14 (UTC +04:00)

Bakı. Ülkər Qasımova – APA. “Azərbaycan “Eurovision” müsabiqəsində 1-ci dəfə 8-ci yeri, 2-ci dəfə isə 3-cü yeri qazana bildi. Bu çox böyük uğurdur. Azərbaycan “Eurovision” mahnı müsabiqəsində birincilik uğurunda iddiasını müsabiqədə iştirak etdiyi ilk gündən ortaya qoyub”. APA-nın məlumatına görə, bu açıqlamanı “Eurovision” müsabiqəsi üzrə İctimai Televiziya və Radio Verilişləri Şirkətinin (İTV) dəvəti ilə Azərbaycana gələn Eurovision TV-nın sabiq baş direktoru Byorn Eriksson deyib.

Sabiq TV direktoru onu da vurğulayıb ki, Azərbaycanın “Eurovision” mahnı müsabiqəsində uğur qazanması üçün imkanları böyükdür: “Mən ilk dəfə 2 il bundan öncə müsabiqə ilə bağlı Eurovision TV-nin direktoru kimi Bakıda keçirilən seçim turunu müşahidə etdim. Belə bir böyük layihənin İctimai Televiziya tərəfindən icra olunması, yüksək peşəkarlıqla ərsəyə gətirilməsi, mənə unudulmaz anlar yaşatdı. Biz heç təsəvvürümüzə gətirməzdik ki, müsabiqənin yeni bir iştirakçısı olan bir telekanal seçim turunu belə möhtəşəm təşkil etsin. İctimai Televiziyanın fəaliyyətinin nəticəsidir ki, Azərbaycan bu möhtəşəm yarışmada 1-ci dəfə 8-ci yeri, 2-ci dəfə isə 3-cü yeri qazana bildi. Bu o deməkdir ki, Azərbaycan bu müsabiqədə özünü təsdiq edib. Və bundan sonra da yüksək yerlərə iddialıdır”.

B. Eriksson “Eurovision” müsabiqəsində uğur qazanmağın xüsusi bir düsturunun olmadığı fikrini də söyləyib: “Bununla bağlı məndə uğurun konkret formulu yoxdur. Əgər bu formula olsaydı və mən onu bilsəydim yəqin ki, dünyanın ən varlı adamı olardım. Əlbəttə ki, həmin formulu satmaq hesabına. Amma buna baxmayaraq hesab edirəm ki, uğur qazanmaq üçün iştirakçıların ilk növbədə olduqları kimi görünmələri vacibdir. Bununla yanaşı, ümumi formula olmasa da əllərindən gələni uğur qazanmaq üçün etməlidirlər. Necə ki, ötən il Norveç təmsilçisi bunu edə bildi”.

Eurovision TV-nin sabiq direktoru Azərbaycanın İTV kanalı bundan sonra da əməkdaşlıq edəcəyini diqqətə çatdırıb.

Qeyd edək ki, sabiq baş direktorun Azərbaycana səfəri fevralın 2-də “Buta Palace”da “Eurovision-2010” müsabiqəsində Azərbaycan təmsilçisinin seçilməsi üçün keçiriləcək milli yarımfinalda iştirak etmək məqsədi daşıyır.