Şou-biznes

Ana səhifə

Şou-biznes

“Eurovision-2010” müsabiqəsində Azərbaycan təmsilçisinin seçilməsi üçün milli yarımfinal konserti başlayıb

02 fevral 2010 17:04 (UTC +04:00)

Bakı. Ülkər Qasımova - APA. Bu ilin mayında Norveçin paytaxtı Osloda keçiriləcək “Eurovision-2010” mahnı müsabiqəsində Azərbaycan təmsilçisinin seçilməsi üçün “Buta Palace”da milli yarımfinal konserti başlayıb.

APA-nın yarımfinalı izləyən əməkdaşının məlumatına görə, milli yarımfinal Heydər Əliyev Fondu, Gənclər və İdman Nazirliyi, “Eurovision” müsabiqəsi üzrə Azərbaycanın Milli Yayım Şurası olan İctimai Televiziya və Radio Yayım Şirkətinin təşkilatçılığı ilə keçirilir.

Yarımfinalda Azərbaycanı 55-ci “Eurovision” müsabiqəsində təmsil etmək iddiasında olan 6 namizəd - Azad Şabanov, Ülviyyə Rəhimova, Məryəm Şabanova, Səfurə Əlizadə, Elli Miçiyeva və “Milk&Kisses” qrupu mübarizə aparacaqlar.

Milli münsiflər heyətində İTV-nin baş direktoru İsmayıl Ömərov, Bakı Musiqi Akademiyasının rektoru Fərhad Bədəlbəyli, Azərbaycan Dövlət Filarmoniyasının direktoru Murad Adıgözəlzadə, Beynəlxalq Musiqi Şurasının Azərbaycan Milli Musiqi Komitəsinin prezidenti Lalə Kazımova, dirijor Azad Əliyev, Mədəniyyət və Turizm Nazirliyinin nümayəndəsi Mənzər Nurəliyeva, Gənclər və İdman Nazirliyinin nümayəndəsi Fərhad Hacıyev təmsil olunur.

Yarımfinal gecəsində gənclərimizə dəstək olmaq üçün “Eurovision-2004”ün qalibi Ruslana, “Eurovision-2009”un qalibi Aleksandr Rıbak və Azərbaycanı “Eurovision-2009” müsabiqəsində təmsil edərək üçüncü yeri qazanan AySel Teymurzadə xüsusi proqramla çıxış edəcəklər. Yarımfinal gecəsi İTV ilə yanaşı, “TRT Avaz”, Gürcüstanın İctimai Televiziyası və www.itv.az saytında canlı yayımlanacaq.

Onu da bildirək ki, milli yarımfinal müsabiqəsini izləmək üçün “Eurovision TV”-nin sabiq baş direktoru Byorn Eriksson da Azərbaycana gəlib.

Məhz bu münsiflər heyətinin qərarı ilə 6 namizəd arasından 3-nün milli finala keçməsi nəzərdə tutulur. Bu günlərdə isə “Eurovision-2010” mahnı müsabiqəsi üçün mahnı yazılması ilə bağlı bəstəkarlara müraciət olunacaq. “Eurovision-2010”da Azərbaycanı təmsil edəcək şəxsin kimliyi fevralın son günlərində mütəxəssislərin qərarı ilə məlum olacaq.