Şou-biznes

Ana səhifə

Şou-biznes

Milli finala vəsiqə qazanan hər üç namizəd Azərbaycanı “Eurovision-2010” müsabiqəsində təmsil etməyə iddialıdır – SORĞU - FOTO

Milli finala vəsiqə qazanan hər üç namizəd Azərbaycanı “Eurovision-2010” müsabiqəsində təmsil etməyə iddialıdır – <font color=red>SORĞU - FOTO </font>

03 fevral 2010 11:59 (UTC +04:00)

Namizədlər finala keçdikdən sonra APA-ya verdiklərini açıqlamalarında bu məsuliyyəti dərk etdiklərini bildiriblər.

“Milk&Kisses” qrupu: “Finala çıxacağımızı gözləmirdik”

Finala vəsiqə qazanan “Milk&Kisses” qrupunun üzvləri Dilarə Kazımova və Fəridə Nelson APA-ya açıqlamalarında finala vəsiqə qazandıqları üçün çox xoşbəxt olduqlarını vurğulayıblar: “Əslində finala çıxacağımızı gözləmirdik və bu, bizim üçün çox gözlənilməz oldu. Adımız açıqlananda bilmədik kədərlənək, yoxsa sevinək. Çünki yerdə qalan 3 iştirakçının hər biri ilə çox mehriban və dostluq münasibətimiz var. O səbəbdən də onların müsabiqədən kənarda qalmasına çox kədərləndik. Əgər biz finalda qələbə qazansaq və “Eurovision-2010” müsabiqəsində Azərbaycan təmsilçiliyi bizə həvalə olunsa, Azərbaycanın ən ön sıralarda olması üçün əlimizdən gələni edəcəyik. Biz özümüzə inanırıq”. Qrup üzvləri digər iki finalçını da özləri üçün güclü rəqib hesab etdiklərini dilə gətiriblər.

Səfurə Əlizadə: “Əlimdən gələni edəcəyəm ki, “Eurovision-2010” musiqi yarışmasında Azərbaycanı mən təmsil edim”

Finala vəsiqə qazanan digər namizəd Səfurə Əlizadə APA-ya açıqlamasında münsiflərin seçiminin onun ürəyincə olduğunu deyib: “Yarımfinalın nəticələri və münsiflərin seçimi ürəyimcə oldu. Fikrimcə, münsiflər heyəti ən layiqli üç nəfəri finala layiq görüb. Bir şeyi də əlavə edim ki, milli seçim turuna qədər öz üzərimdə çox çalışmışdım və finalçılar sırasında olmağım da bunu nəticəsidir. Əlimdən gələni edəcəyəm ki, “Eurovision-2010” musiqi yarışmasında Azərbaycanı mən təmsil edim. Əgər bu belə olsa, söz verirəm ki, var gücümlə çalışıb Azərbaycana birincilik qazandıracağam. Etiraf etməliyəm ki, digər iki iştirakçı da kifayət qədər güclü rəqibdir və onlarla mübarizə aparmaq heç də asan məsələ deyil. Ancaq mən özümə tam inanıram”

Məryəm Şabanova: “Biz indidən sonra öz üzərimizdə daha da çox işləməliyik”

Azərbaycanı “Eurovision-2010” müsabiqəsində təmsil etmək iddiasında olan üçüncü finalçı Məryəm Şabanova da APA-ya açıqlamasında iddialı danışıb. Finalçı təmsilçilik uğrunda rəqibləri ilə var gücü ilə rəqabət aparacağını da gizlətməyib: “Milli finala vəsiqə qazandığım üçün çox şadam. Biz hər üçümüz çox güclüyük. Düşünürəm ki, artıq hər birimizin üzərinə daha çox məsuliyyət düşür. Bu o deməkdir ki, biz bundan sonra öz üzərimizdə daha çox işləməliyik. Üç finalçı arasında gərgin mübarizə hələ qarşıdadır”.

Qeyd edək ki, Azərbaycanın “Eurovision-2010” müsabiqəsində təmsilçinin kimliyi fevralın sonlarında açıqlanacaq. Azərbaycanın 55-ci “Eurovision” müsabiqəsində təmsilçisi məhz bu üç namizəd arasından 7 nəfərdən ibarət milli münsiflər heyəti tərəfindən seçiləcək.
Osloda “Telenor Arena”da keçiriləcək “Eurovision-2010” müsabiqəsinin yarımfinal mərhələsi mayın 25-i və 27-də, finalı isə mayın 29-da keçiriləcək.