Şou-biznes

Ana səhifə

Şou-biznes

Murad Dadaşov baş prodüser vəzifəsindən istefa verməsinin səbəblərini açıqlayıb

12 fevral 2010 15:26 (UTC +04:00)

Bakı. Ülkər Qasımova - APA. ““Lider” televiziyasında tutduğum vəzifədən öz istəyimlə istefa vermişəm, ancaq bu televiziya ilə əməkdaşlıqda heç bir problem yoxdur. Baş prodüser olduğum dövrdə bu iş məni həddindən artıq yordu. Mən yaradıcı insanam. Sevdiyim işlə məşğul olmaq istəyirəm. İndi o yaşımdır ki, gərək yaradıcılıqla məşğul olum. Bundan sonra məni məmur vəzifəsində görməyəcəksiniz”. Bu sözləri APA-ya açıqlamasında “Lider” televiziyasının sabiq baş prodüseri Murad Dadaşov deyib.

O bildirib ki, telekanal rəhbərliyi də istefasını normal qarşılayıb: “Bu televiziya ilə əməkdaşlığımız bundan sonra daha sıx şəkildə davam edəcək. Sırf yaradıcılıqla məşğul olmağım üçün indi daha geniş imkanlar yaranır. Baş prodüser vəzifəsində olanda, yaradıcı işlərdən daha çox inzibati işlərlə, dırnaqarası məmurluqla məşğul idim. “Lider” kanalının rəhbərliyindən xahiş etdim ki, bu məsuliyyəti mənim üzərimdən götürsün. Çox sağ olsunlar ki, məni başa düşdülər və razılaşdılar”. M. Dadaşov baş prodüser vəzifəsindən “Maşın şou”nun yubiley layihəsinə görə uzaqlaşdığını da açıqlayıb: “Maşın şou”nun 10-cu buraxılışı martda efirə çıxacaq. Bundan başqa, “Lider” kanalının 10 illiyi təntənəli şəkildə qeyd olunacaq. Bununla bağlı mən 3-4 çox böyük layihə həyata keçirəcəyəm. Mən “Lider” kanalından uzaqlaşmıram, sadəcə baş prodüser vəzifəsini daha icra etməyəcəyəm”.

M. Dadaşov “GEN MMC” ilə bağlı məsələyə görə tutduğu vəzifədən uzaqlaşdırılması ilə bağlı səslənən fikirlərlə də razılaşmayıb.

M. Dadaşov deputatlığa namizədliyini irəli sürməyəcəyini də deyib: “Parlament seçkilərində iştirak etmək niyyətində deyiləm. Hələ keçən parlament seçkilərində iştirak etməyim üçün bir neçə təklif gəlmişdi, ancaq mən imtina etdim. Hesab edirəm ki, hər bir insan ölkəyə, vətənə, dövlət başçısına öz sahəsində xidmət göstərməlidir. Mən çalışdığım sahədə ölkəm üçün, əhalinin əhval-ruhiyyəsi üçün daha çox fayda verə bilərəm, nəinki deputat kürsüsündə oturmaqla...”