Şou-biznes

Ana səhifə

Şou-biznes

Azərbaycanın “Eurovision-2010”-dakı təmsilçisinin müəyyənləşməsi üçün martın 2-də keçiriləcək milli finalla bağlı son yeniliklər açıqlanıb - EKSKLÜZİV - FOTO

23 fevral 2010 16:23 (UTC +04:00)

Bakı. Ülkər Qasımova – APA. Bu ilin mayında Norveçin paytaxtı Osloda keçiriləcək “Eurovision-2010” mahnı müsabiqəsində Azərbaycan təmsilçisinin seçilməsində tamaşaçı səsverməsindən istifadə olunmayacaq. Bu barədə APA-ya açıqlamasında müsabiqənin Milli Yayım Şurası olan İctimai Televiziya və Radio Yayımlar Şirkətinin ictimaiyyətlə əlaqələr şöbəsinin müdiri Tahir Məmmədov bildirib. T. Məmmədov deyib ki, martın 2-də keçiriləcək milli finalın səsverməsi əvvəlcədən müəyyən edilmiş qayda üzrə peşəkar münsiflər heyəti tərəfindən həyata keçiriləcək.

Həmin gün Azərbaycanı 55-ci “Eurovision” müsabiqəsində təmsil etmək iddiasında olan üç namizəd – Məryəm Şabanova, Səfurə Əlizadə və “Milk&Kisses” qrupu 3-ə yaxın mahnı ifa edəcək: “Bu mahnılardan biri yeni, yəni müsabiqə üçün yazılmış mahnı olacaq. İfa olunacaq mahnıların bəstəkarlarının adı isə martın 2-də “Buta Palace”da təşkil olunacaq şouda açıqlanacaq. Bildiyiniz kimi, İctimai Televiziya hər il “Eurovision”la bağlı təşkil etdiyi möhtəşəm milli seçim konsertlərini digər ölkələrdə fəaliyyət göstərən İctimai Televiziyalar da canlı yayımlayır, bu konsertlərə başqa ölkələrin tanınmış ulduzları da dəvət olunur. Bu il təşkil olunan yarımfinal mərhələsində “Eurovision”un qalibləri Ruslana və Aleksandr Rıbak dəvət olunmuşdu. Final mərhələsi üçün təşkil olunan şouda isə Rusiyanın “Fabrika zvezd” layihəsindən tanınan Dakota və Gürcüstanı “Eurovision-2010” müsabiqəsində təmsil edəcək Sofo Nijaradze iştirak edəcəklər”.

T. Məmmədov “Eurovision-2010” mahnı müsabiqəsində Azərbaycan təmsilçisinin ifa etməsi üçün təqdim olunan mahnıların bəstəkarlarının adının məxfi saxlanılmasına məsələsinə də münasibət bildirib. Onun sözlərinə görə, bu, heç də məxfilikdən irəli gəlmir, sadəcə, milli Yayım Şurası bəzi məqamların şou iştirakçıları və qonaqlar üçün sürpriz olmasını istəyir.

Milli final mərhələsinə isə yarımfinal konserti kimi bilet satışı nəzərdə tutulmayıb: “Doğrudur, budəfəki şou digərlərindən fərqlənir. Final mərhələsi parti formatında təşkil olunacaq. Burada əsas məqsəd daha çox gənclərin iştirakını təmin etməkdir. Dəvətnamə ilə iştirakın təşkil olunması da bununla bağlıdır. Şou hər dəfə olduğu kimi, İctimai Televiziya, həmçinin Türkiyənin TRT və Gürcüstanın İctimai Televiziyası ilə canlı yayımlanacaq”.
Qeyd edək ki, Azərbaycanın “Eurovision-2010” müsabiqəsindəki təmsilçisi və onun ifa edəcəyi mahnı martın 2-də “Buta Palace”da keçiriləcək milli final gecəsində müəyyənləşəcək.

“Eurovision_2010”