Şou-biznes

Ana səhifə

Şou-biznes

“Mister World” beynəlxalq müsabiqəsində Azərbaycanı model Hafiz Ağayev təmsil edəcək - FOTOSESSİYA

“Mister World” beynəlxalq müsabiqəsində Azərbaycanı model Hafiz Ağayev təmsil edəcək - <font color=red>FOTOSESSİYA </font>

25 fevral 2010 12:43 (UTC +04:00)

Bakı. Ülkər Qasımova-APA. Aprelin 17-də Seulda keçiriləcək “Mister World” beynəlxalq müsabiqəsində Azərbaycanı təmsil edəcək 24 yaşlı Hafiz Ağayev və onu bu müsabiqəyə hazırlaşdıran Belarusda fəaliyyət göstərən Moda Studiyasının direktoru Sergey Naqornı Bakıya səfər ediblər. APA-ya açıqlama verən Hafiz Ağayev əslən Qarabağdan olduğunu və bununla fəxr etdiyini deyib: “Azərbaycan bu müsabiqədə ilk dəfə olaraq mənim təmsilçiliyimə iştirak edir. Burada olduğum müddətdə müsabiqə iştirakçılarına Azərbaycanla bağlı suvenirlər alacağam. Model kimi ilk təklifi 16 yaşında almışam, ancaq bu təklifdən imtina etmişəm. Çünki o zaman təhsil alırdım. Elə bu sahədə ilk işim Sergey Naqornı ilə olub. Səmimi olaraq etiraf edim ki, bu sənətdə ilk günlərim çox çətin olub. Ancaq bu çətinliklərə dözəcəyəm. Moda agentliyi ilə 5 illik müqavilə bağladım və müsabiqəyə hazırlığı agentlik özü maliyyələşdirir. Bu müsabiqədə bütün dünya ölkələrindən iştirakçılar olacaq. Mən ora qalib olmaq üçün gedirəm və orada Azərbaycan bayrağını qaldıracağam”. Müsabiqənin qalibinə xüsusi titul və 50 000 ABŞ dolları veriləcək.

Hafiz Ağayev Belarus mətbuatının onun Minskdəki diskoteka və gecə klublarına getməsinə qadağa qoyulması barədə yazılan məlumatları təsdiqləyib: “Mənə gecə klublarına, diskotekalara getməyə qadağa qoyulub. Çünki, belə yerlərdə iştirakım zamanı qızların diqqəti mənim üzərimdə olur. Bütün günü işləyirəm, hətta bazar günləri də istirahətə vaxtım olmur. Şəxsi həyatımda isə heç kim yoxdur, hələlik ürəyim istəyənə rast gəlməmişəm”.

Model biznesinin Azərbaycan mentalitetinə zidd olduğunu bildirən Hafiz Ağayev, bu sənəti seçdiyinə heç də peşman deyil: “Bizim mentalitetə görə gözəl kişilər özlərini model biznesində sınaya bilmirlər. Amma dostlarım mənim bu sahədə işləyəcəyimi eşidəndə bunu normal qəbul etdilər. Valideynlərim isə əvvəl təəccüblənsələr də, etiraz etmədilər. Çünki onlar çox gözəl bilirlər ki, mən heç zaman öz seçimimdə uduzmuram”.

Həmyerlimizi bu müsabiqəyə ciddi-cəhdlə hazırlaşdıran Sergey Naqornı isə APA-ya açıqlamasında, “Mister World” müsabiqəsinin dünyada kişilər arasında keçirilən ən mötəbər müsabiqə olduğunu qeyd edib: “Bu müsabiqə dünyanın 100-ə yaxın televiziyasında nümayiş olunacaq. Bura gəlməyimdə məqsəd isə müsabiqənin Azərbaycan televiziyalarından birində də yayımlaması ilə danışıqlar aparmaqdır. Azərbaycan təmsilçisinə dəstək durmaq üçün bunu gerçəkləşdirmək vacibdir”. S. Naqornı eləcə də Hafiz Ağayevin qalib gələcəyinə çox inandığını deyib. Onun sözlərinə görə, Hafizin stilisti Rusiya və dünya kişi saç bərbəri yarışmasının çempionu Yuliya Sorokadır. Bu müsabiqədə Azərbaycan təmsilçisinin stili ilə məşğul olmaq üçün isə o Moskvadan Belarusa gəlib: “Hafiz güclü, ağıllı, nəzakətli olmalıdır. Bu işdə Hafizə keçmişdə boksla məşğul olması kömək edir. Bundan əlavə Hafiz ingilis dilini öyrənir, moda studiyasında dərslərə gedir, orada səhnə qabiliyyəti, etika və dəfilə dərslərini alır. Ümidvaram ki, Hafiz müsabiqədə layiqli yer tutacaq”.

Qeyd edək ki, müsabiqədə Azərbaycan təmsilçisi ilə yanaşı, 80 ölkənin nümayəndəsi dünyanın ən arzu olunan kişisi adı uğrunda mübarizə aparacaqlar. 17 gün ərzində müsabiqə iştirakçıları çoxsaylı sınaqdan keçməli olacaq, həmin sınaqlarla onların gücü, möhkəmliyi, fərasəti, çətin vəziyyətdən çıxmaq qabiliyyəti aşkarlanacaq. Bu müsabiqə 100-dən artıq ölkənin televiziya kanalında yayımlanacaq.