Şou-biznes

Ana səhifə

Şou-biznes

“Eurovision -2010” müsabiqəsində Azərbaycan təmsilçiliyi hansı namizədə həvalə olunacaq? - SORĞU – FOTOSESSİYA

“Eurovision -2010” müsabiqəsində Azərbaycan təmsilçiliyi hansı namizədə həvalə olunacaq? - <font color=red>SORĞU – FOTOSESSİYA </font>

27 fevral 2010 12:02 (UTC +04:00)

Bakı. Ülkər Qasımova – APA. Martın 2-də “Eurovision-2010” mahnı müsabiqəsində Azərbaycanı təmsil edəcək sənətçi və onun ifa edəcəyi mahnı məlum olacaq. Həmin gün Osloda keçiriləcək 55-ci “Eurovision” mahnı müsabiqəsində ölkəmizi təmsil etmək iddiasında olan üç namizəd –Səfurə Əlizadə, Məryəm Şabanova və “Milk&Kisses” qrupu təmsilçilik uğrunda mübarizə aparacaqlar. APA milli finala bir neçə gün qalmış finalçılar arasında finala hazırlıq, eləcə də təmsilçiliyə hazır olub-olmadıqları barədə sorğu keçirib. Məlum olub ki, finala vəsiqə qazanan bu üç namizədin hər biri təmsilçilik uğrunda ciddi mübarizəyə hazırlaşırlar. Onu da vurğulamaq yerinə düşər ki, sorğumuz zamanı namizədlərin heç biri həmin gün təqdim edəcəkləri mahnıların müəlliflərin adlarını, geyim və şoularının necə olacağını açıqlamayıblar. Hər bir təmsilçiyə isə bu barədə öncədən məlumat verilməməsi üçün xüsusi göstəriş verilib.

Səfurə Əlizadə: “Azərbaycanı “Eurovision-2010” müsabiqəsində təmsil edəcəyimə inanıram”

“İstirahət etmədən, dayanmadan çalışmaq, işləmək rejiminə çox insan bəlkə də tab gətirə bilməz. Ancaq mən bu müsabiqədə təmsilçiliyi o qədər arzulamışam ki, yorğunluğu hiss etsəm də, özümə yaxın buraxmıram. Martın 2-də mənə inanan bütün insanların arzusunu çin etmək və Osloda Azərbaycanı yüksək səviyyədə təmsil etmək üçün bütün enerjimi səhnədə göstərəcəyəm”. Bu açıqlamanı APA-ya “Eurovision-2010” müsabiqəsində milli finala vəsiqə qazanan və bu müsabiqədə Azərbaycan təmsilçisi kimi çıxış etmək şansı olan namizədlərdən biri Səfurə Əlizadə verib. Namizəd martın 2-də “Buta Palace”da keçiriləcək milli final konserti üçün xüsusi bir neçə proqram və geyim hazırladığını qeyd edib. Səfurə Əlizadə həmin gün üç mahnı ilə münsiflərin qarşısında çıxış edəcəyini və bu çıxışa var gücü ilə hazırlaşdığını qeyd edib: “Martın 2-nə kimi bir az istirahət etmək fikrindəyəm, çünki həmin gün yorğun səslə çıxış etmək istəmirəm. Mən çox enerjiliyəm, özümə çox inanaram və təmsilçinin məhz mən olacağına da ümid edirəm. Sözsüz ki, mən də bir çoxlarından öz ünvanıma çox sözlər eşitmişəm. Deyilər guya, artıq mənim yerim hazırdır, təmsilçi mənəm. Mən isə öz gücümə inanıram, heç kimə yox. Heç bir ölkə necə tapşırıq olsa belə, bu cür beynəlxalq müsabiqəyə bacarıqsız, istedadsız təmsilçi göndərməyə risk etməz. Həmin sözləri danışanlara isə deyirəm ki, mən çox istedadlıyam, istedad qarşısında isə heç bir tapşırığa lüzum yoxdur”.

S.Əlizadə təmsilçilik şansı qazansa, ölkəsini layiqli, hətta birinci yerə çıxaracağını da əminliklə dilə gətirib: “Müsabiqə hazırlığından az-çox məlumatlıyam və hər bir çətinliyə özümü hazır hiss edirəm. Martın 2-də təmsilçi olaraq münsiflər heyəti tərəfindən mən seçilsəm, həmin gündən etibarən öz üzərimdə daha artıq çalışacağam. Bu, çox böyük bir məsuliyyətdir. Biz hər üç namizəd bu məsuliyyəti dərk edirik. Azərbaycan bu müsabiqədə layiqli yeri tutmalıdır. Hansımız təmsilçi olsaq da, mən nəticənin yaxşı olacağına inanıram”. S. Əlizadə hələ də saksofonla mahnı ifa etmək fikrindən daşınmadığını etiraf edib və hazırlanan şou imkan versə, Avropa ölkələrini qadın saksofon ifaçısı kimi heyrətləndirmək fikrindədir.

Məryəm Şabanova: “Təmsilçi olsam, ürəyimdən birincilik keçir”

Finalçılardan Məryəm Şabanova APA-ya açıqlamasında martın 2-də qalib olması və Azərbaycanı builki “Eurovision” müsabiqəsində təmsil etmək şansı qazanmaq üçün ciddi-cəhdlə, istirahətsiz hazırlaşdığını deyib: “Dayanmadan, istirahət etmədən məşq edirəm. Bütün komandamıza çox böyük təşəkkür edirəm ki, heç bir çətinliyə baxmadan canla-başla işləyirlər. Bu dəfə ki, hazırlığımız fevralın 2-dəki hazırlıqdan da çətindir. Hətta işlərin çoxluğundan başımız belə hərlənir. Fikrimcə bu əziyyətlər yerdə qalmayacaq və əziyyətimi qiymətləndirəcəklər”.

M. Şabanova martın 2-də onunla birgə təmsilçilik uğrunda mübarizə aparacaq digər iki namizəd – Səfurə Əlizadə və “Milk&Kisses”in də çox zəhmət çəkdiklərinə toxunub: “Biz hazırda hər üç namizəd olaraq çox çətin iş qrafiki ilə çalışırıq. Deyə bilmərəm ki, mənim qalib olmaq şansım daha artıqdır. Düşünürəm ki, hər birimizin fərqli şansı var”.

Martın 2-də mənə dəstək olan və inanan insanları yanıltmamağa çalışacağını deyən namizəd, eləcə də ona pərəstiş edən insanlara, dəstək olanlara təşəkkürünü də ünvanlamağı unutmayıb. Vaxt azlığından “Eurovision-2010” müsabiqəsində artıq təmsilçilərini seçmiş iştirakçı ölkələrdən isə xəbərsiz olduğunu bildirib: “Təəssüflər olsun ki, bununla maraqlanmağa belə vaxtım yoxdur. Əsas gücümü məşqlərə və hazırlığa vermişəm, bundan başqa heç bir şey düşünmək və beynimi yormaq belə istəmirəm. Digər ölkə təmsilçiləri ilə isə başqaları maraqlanmalıdır”.

Namizəd eləcə də əgər Osloda Azərbaycan təmsilçiliyi ona həvalə olunsa, Azərbaycanı layiqli yerə çıxaracağını ümid etdiyini dilə gətirib: “Mən zəmanət verə bilərəm ki, əgər Azərbaycan təmsilçisi mən olsam, bütün gücümü bu işə qoyacağam. Bütün gücümlə, Azərbaycanı ən ön sıralara, əlbəttə ürəyimdən birincilik keçir, gətirəcəyəm. Mən özümə tam olaraq inanıram, öz gücümə, enerjimə, ifama güvənirəm. Mənim üçün ən önəmlisi odur ki, bütün dünyaya Azərbaycanın gücünü göstərim, bütün dünya Azərbaycanın təqdim etdiyi nömrəni uzun müddət unuda bilməsinlər. Hansımız bu yarışmada Azərbaycanı təmsil etsək, mütləq dünyanın yaddaşına həkk olunmalıyıq”.

“Milk&Kisses” qrupu: “Martın 2-də biz final səhnəsini super şou və ifa ilə lərzəyə gətirəcəyik”

Təmsilçilərdən olan və “Eurovision” müsabiqəsində Azərbaycanı təmsil etmək uğrunda mübarizə aparan “Milk&Kisses” qrupunun üzvləri APA-ya açıqlamalarında özlərinə və ifalarına çox inandıqlarını deyiblər. Martın 2-də milli münsiflərin qarşısında üç yeni mahnı ifa edəcək qrup üzvləri, ciddi-cəhdlə final konsertinə hazırladıqlarını bildiriblər: “Təmsilçiliyinin bizə həvalə olunub-olunmayacağını dəqiq deyə bilmərik. Ancaq seçilmək üçün əlimizdən gələni edirik. Bu aralar istirahətin nə olduğunu belə unutmuşuq. Martın 2-də bizim pərəstişkarlarımız da finalda iştirak edəcək və bizə mənəvi güc verəcəklər. Biz həmin səhnəni super şou və ifa ilə lərzəyə gətirəcəyik”. Qrup üzvləri Dilarə Kazımova və Fəridə Nelson həmin gün sonadək mübarizə aparacaqları, digər iki namizəd rəqib görmədiklərini qeyd edib: “Bilirik ki, hər üç namizəd hər birimiz çox böyük əziyyət çəkirik. Biz bu gün desək ki, hamıdan güclüyük, bu, düzgün olmaz”.

Qeyd edək ki, martın 2-də “Buta Palace”da keçiriləcək milli final konsertində üç namizəd Azərbaycanı 55-ci “Eurovision” müsabiqəsində təmsil etmək uğrunda mübarizə aparacaq. Məhz həmin gün Azərbaycanın builki müsabiqə təmsilçisi və ifa edəcəyi mahnı müəyyənləşəcək. Təmsilçini və mahnının seçmək isə 7 nəfərdən ibarət milli münsiflərin öhdəsinə verilib. Həmin gün Bakı səhnəsində namizədlərə dəstək olmaq üçün Rusiyanın “Fabrika zvezd” yarışmasının iştirakçısı Dakota və Gürcüstanın “Eurovision-2010” təmsilçisi Sofo Nijaradzenin xüsusi proqramla çıxışı nəzərdə tutulub.