Şou-biznes

Ana səhifə

Şou-biznes

Gürcüstanın “Eurovision-2010” müsabiqəsindəki təmsilçisi: “Azərbaycandan dəstək gözləyirəm” - FOTO

Gürcüstanın “Eurovision-2010” müsabiqəsindəki təmsilçisi: “Azərbaycandan dəstək gözləyirəm” - <font color=red>FOTO</font>

03 mart 2010 10:21 (UTC +04:00)

Bakı. Ülkər Qasımova-APA. “Azərbaycandan çox böyük dəstək gözləyirəm. Ümid edirəm ki, yüksək mədəniyyətə malik olan Azərbaycan xalqı düzgün seçim etməyi bacaracaq. Bu müsabiqədə yaxşı nəticə əldə etməyim üçün sizlərin dəstəyi çox vacibdir, bu dəstəyi məndən əsirgəməyin”. Bu sözləri APA-ya açıqlamasında Azərbaycanın “Eurovision-2010” müsabiqəsində təmsilçisinin seçilməsi məqsədi ilə keçirilən milli finalda iştirak etmək üçün Azərbaycana gələn Gürcüstanın 55-ci “Eurovision” müsabiqəsindəki təmsilçisi Sofo Nijaradze deyib. Təmsilçi Azərbaycan tamaşaçısı qarşısında çıxış etməkdən məmnunluğunu da dilə gətirib və tamaşaçı auditoriyamızdan müsbət enerji aldığını deyib: “Mən bu zamana kimi bir neçə dəfə Bakıda olmuşam. Bu ölkəni və şəhəri çox sevirəm. Hər səfərimdə buradan xüsusi və çox xoş təəssüratlarla ayrılıram. Azərbaycanda ilk dəfə olaraq səhnəyə çıxırdım və bu. məni çox sevindirdi. İfam zamanı tamaşaçılardan mənə gələn müsbət aura və isti münasibət məni ruhlandırırdı”.

Sofo Nijaradze eləcə də Azərbaycanın milli finalında iştirak edən üç namizədi də bəyəndiyini vurğulayıb. Ancaq təmsilçi, “Milk&Kisses” qrupuna xüsusi simpatiya duyduğunu da gizlətməyib: “İstərdim ki, təmsilçi məhz bu qrup olsun, ancaq Səfurə Əlizadə də yaxşı ifaçıdır. Ümumiyyətlə, hər üç finalçı güclü səsə və gözəl səhnə görünüşünə malikdir. Azərbaycana bu müsabiqədə uğurlar arzulayıram və bildirirəm ki, biz dost və qonşu ölkə olaraq sizin yanındıqdayıq”.

Oslonun “Telenor Arena”sında ölkəsini “Shine” mahnısı ilə təmsil edəcəyini diqqətə çatdıran gözəl təmsilçi, bu mahnını çox bəyəndiyini və məhz bu mahnı ilə Bakı əhli qarşısında çıxış etməsindən məmnunluğunu dilə gətirib: “Gürcüstanda keçirilən milli final konsertindən sonra, ilk dəfə olaraq “Shine” mahnısını Bakıda ifa etdim. Sözsüz ki, bu da təsadüfi deyil, çünki bizim hər birimizin Azərbaycana ayrıca sevgimiz var. Azərbaycan bizim hər birimiz üçün çox doğma və əzizdir”.

Digər ölkə təmsilçiləri kimi Gürcüstan təmsilçisi də “Eurovision-2010” müsabiqəsində ölkəsinə birincilik gətirmək arzusundadır: “Sözsüz ki, digər təmsilçilər kimi mən də ölkəmi qalib etmək istəyirəm. Ötən il məlum səbəblərdən Gürcüstan müsabiqədə iştirak edə bilmədi. Bu il isə təmsilçiliyimlə bu halı da unutdurmaq və Gürcüstanın “Eurovision” tarixinə düşməsi üçün əlimdən gələni edəcəyəm. Əvvəlcədən hansı nəticəni əldə etməyimi deməyim çox çətindir. Ən əsas istəyim ölkəmi layiqincə təmsil etməkdir. Nəticə necə olacaq, bunu əvvəldən demək mümkün deyil. Nəticənin yaxşı olması üçün Azərbaycandan da dəstək gözləyirəm”.