Şou-biznes

Ana səhifə

Şou-biznes

Nümayəndə heyətinin rəhbəri: “Azərbaycanın “Eurovision-2010” təmsilçisinin seçilməsində saxtalaşdırma olmayıb” - FOTO

Nümayəndə heyətinin rəhbəri: “Azərbaycanın “Eurovision-2010” təmsilçisinin seçilməsində saxtalaşdırma olmayıb” - <font color=red>FOTO</font>

04 mart 2010 15:09 (UTC +04:00)

Bakı. Ülkər Qasımova – APA. Bu gün İctimai Televiziya və Radio Verilişləri Şirkətində (İTV) Azərbaycanı bu ilin mayında Osloda keçiriləcək “Eurovision-2010” mahnı müsabiqəsində təmsil edəcək Səfurə Əlizadə, “Eurovision” müsabiqəsi üzrə Azərbaycanın nümayəndə heyətinin rəhbəri Adil Kərimli və İTV-nin ictimaiyyətlə əlaqələr şöbəsinin müdiri Tahir Məmmədovun iştirakı ilə mətbuat konfransı keçirilib. APA-nın məlumatına görə, mətbuat konfransında çıxış edən Adil Kərimli medianı və Azərbaycan xalqını Səfurə Əlizadəyə dəstək olmağa çağırıb: “Biz hər birimiz ona dəstək olmlıyıq, necə ki, iki il təmsilçilərimizə dəstək olduq da, bu il də bu dəstək təkrarlanmalıdır”.

Mətbuat nümayəndələrinin “Səfurə Əlizadənin seçilməsində qeyri-obyektivlik olubmu” sualına cavab olaraq A. Kərimli seçimlərin obyektiv keçirildiyini qeyd edib: “Əgər həqiqətən də biz təmsilçinin kimliyini müəyyənləşdirsəydik, o zaman qornşu Türkiyə kimi sadəcə, təmsilçimizin adını açıqlayardıq və bu cür seçimlərə ehtiyac duymazdıq. Azərbaycan təmsilçisinin seçilməsi tam obyektiv şəkildə aparılıb. Buna qəti surətdə şübhə ola bilməz. Sadəcə, bizim istəyimiz peşəkar münsif heyətinin qərarı ilə seçimlərə qatılan namizədlər arasından daha yaxşısını müəyyən etmək idi və biz buna nail olduq”.

A. Kərimli qeyd edib ki, builki müsabiqədə təmsilçisinin ifa edəcəyi mahnı məhz əcnəbi bəstəkarlar tərəfindən təqdim olunan dörd mahnı arasından seçiləcək: “Mahnının seçilməsi prosesi isə martın 18-dək yekunlaşacaq. Səfurə Əlizadənin ifasında bu mahnılardan hansı daha yaxşı səslənsə o mahnı ilə də “Eurovision-2010” müsabiqəsində çıxış edəcək”.

Səfurə Əlizadənin seçilməsi ilə bağlı münsiflər heyətində tərəddüdlərin olduğunu da açıqlayan nümayəndə heyətinin rəhbəri deyib ki, hər üç finalçı çox yaxşı nəticə nümayiş etdirdi: “Ancaq üçünün də çıxışında hər hansısa qüsur var idi. Səfurənin səhnə görünüşü, eləcə də vokal imkanları digərlərindən daha üstün olduğu üçün o seçildi. Yəni Səfurə Əlizadənin digər finalçılardan üstünlüyü var idi və o bunu nümayiş etdirdi”.

Yaxın günlərdə isə final iştirakçılarına milli münsif heyəti tərəfindən verilən səslərin açıqlanacağını deyən A. Kərimli, xarici səfərdə olan, milli seçimlərdə də iştirak etməyən xalq artisti Fərhad Bədəybəylinin qiyabi olaraq finalçılara səs verdiyini və nəticələrdə saxtalaşdırmanın olmadığını bildirib.

Təmsilçi olaraq ilk dəfə yerli media qarşısına çıxan Səfurə Əlizadə isə özünə çox inandığını bir daha vuğrulayıb: “Mən uşaqlıdan arzuladığım ən böyük istəyimə çatdım.
Özümə inanmasaydım seçimlərə qatılmazdım, inandım və elədim. Oslodakı ifamla hər kəsin xoşuna gəlmək istəyirəm. İfam güclü olmalıdır”.