Şou-biznes

Ana səhifə

Şou-biznes

“Miss Azərbaycan-2010” gözəllik müsabiqəsinin təşkilinə 500 min avro vəsait xərclənəcək - FOTO

“Miss Azərbaycan-2010” gözəllik müsabiqəsinin təşkilinə 500 min avro vəsait xərclənəcək - <font color=red>FOTO</font>

10 mart 2010 12:44 (UTC +04:00)

Bakı. Ülkər Qasımova-APA. Bu il Azərbaycanda “Miss Azərbaycan” gözəllik müsabiqəsi keçiriləcək. “Nur production”un təşkilatçılığı ilə keçirilməsi nəzərdə tutulan müsabiqəyə bu gündən etibarən sənəd qəbulu başlanılıb. APA-nın məlumatına görə, bu gün “Nur production”ın rəhbəri Nuriyyə Əhmədova, baş prodüser Nazim Səmədov, müsabiqənin direktoru Günay Səmədova, müsabiqə proqramlarının rejissoru Ülviyyə Könül və müsabiqənin bədii rəhbəri və aparıcısı Natella Kərimovanın iştirakçı ilə mətbuat konfransı keçirilib. Konfransda çıxış edən Nazim Səmədov bildirib ki, “Miss Azərbaycan” milli müsabiqəsi-professional gözəllik müsabiqəsidir: “Bu gündən başlayaraq martın 25-dək müsabiqəyə sənəd qəbulu həyata keçiriləcək. Müsabiqənin şərtlərinə görə, boyu 1.70-dən aşağı olmayan qızlar iştirakçılıq hüququ qazanacaq. Onu da diqqətə çatdırmaq lazımdır ki, müsabiqədə 18 -26 yaş arasında, model görünüşü olan qızlar iştirak edə biləcəklər. Müsabiqə iştirakçısı müsabiqədə iştirak edən zaman ailəli və ya boşanmış olmamalı və müsabiqədə iştirak edənədək uşağı olmamalıdır. Müsabiqə iştirakçısı Azərbaycan və digər respublikalar tərəfindən cinayət və inzibati təqiblərə məruz qalmamalıdır. Müsabiqədə ancaq Azərbaycan Respublikasının vətəndaşı iştirak edə biləcəklər”.

Münsiflər heyəti sənədlərini təqdim edən iştirakçılar arasından müsabiqənin formatına uyğun 30 qız seçəcək. Sona qalan 30 iştirakçı arasından isə 14-ü artıq son mərhələyə vəsiqə qazanacaq. Həmin 14 iştirakçının adı məhz media mənsublarının qarşısında açıqlanacaq. Bu proses isə aprelin sonuna kimi davam edəcək. N. Səmədov qeyd edib ki, bu ilin mayında Heydər Əliyev Sarayında “Miss Azərbaycan -2010” müsabiqəsinin finalı baş tutacaq və 14 iştirakçı arasından Azərbaycan gözəli seçiləcək. “Miss Azərbaycan” nominasiyasından başqa intellekt, idman, top-model, istedad nominasiyalarında mükafatlar təqdim ediləcək. Təşkilatçılar bildiriblər ki, müsabiqənin keçirilməsi üçün 500 min avroya yaxın pul xərclənəcək: “Ancaq biz bu müsabiqəni gəlir əldə etmək üçün etmirik. Biz bu müsabiqəni sırf Azərbaycan naminə edirik. Ümidvarıq ki, bizim təşkilatçılığımız altında bundan sonra hər il “Miss Azərbaycan” yarışması keçiriləcək. Sonuncu dəfə Azərbaycanda bu yarışma 2006-cı ildə təşkil olunmuşdu. Biz isə bunu ənənə halına çevirmək niyyətindəyik. Hər şeyin yüksək səviyyədə təşkili üçün əlimizdən gələni edəcəyik”. Günay Səmədova qalibə ev və maşın, eləcə də bahalı hədiyyələrin verilməsinin də nəzərdə tutulduğunu deyib.