Şou-biznes

Ana səhifə

Şou-biznes

Azərbaycanın “Eurovision-2010”-dakı təmsilçisi: “Uğur qazanacağıma inanmayanlara yanlış düşündüklərini sübut edəcəyəm” - MÜSAHİBƏ - FOTOSESSİYA

Azərbaycanın “Eurovision-2010”-dakı təmsilçisi: “Uğur qazanacağıma inanmayanlara yanlış düşündüklərini sübut edəcəyəm” - <font color=red>MÜSAHİBƏ - FOTOSESSİYA</font>

25 mart 2010 11:58 (UTC +04:00)

Bakı. Ülkər Qasımova - APA. Azərbaycanın 55-ci “Eurovision” mahnı müsabiqəsində təmsil edəcək Səfurə Əlizadənin İsveçdən APA-ya eksklüziv müsahibəsi

- “Eurovision-2010” müsabiqəsinə hazırlıq hansı mərhələdədir?

- Hazırlıq prosesi çox ciddi gedir. Hazırda İsveçdə albom üzərində işləyirəm. Demək olar ki, artıq alboma daxil olunacaq mahnıların hamısı yazılıb. Alboma daxil olunan bütün mahnılar superdir. Bu prosesdə işbirliyində olduğum insanlarla işləmək mənim üçün şərəfli və çox maraqlıdır. Digər tərəfdən, “Eurovision” müsabiqəsində iştirak uşaqlıqdan, özümü anlayandan arzum olub. Bu arzuma çatdığıma görə çox xoşbəxtəm. Əgər bu məsuliyyətli iş mənə həvalə olunubsa, öhdəsindən layiqincə gəlmək borcumdur.

- “Eurovision”da Azərbaycanı təmsil etməyin məsuliyyətinin fərqində olduğunu dəfələrlə bildirmisən. Bu məsuliyyəti dərk edərək, bir təmsilçi kimi Azərbaycan xalqına neçənci yeri vəd edirsən?

- Əvvəlcədən demək istəməzdim. Reytinqlərdə hələ ki, birincilikdəyik. Öz tərəfimdən deməliyəm ki, bu reytinqlərin real olması üçün çox çalışıram. Bu çalışmaların nəticəsinin müsbət və sevindirici olacağına ümid edirəm. Çox istəyirəm ki, yüksək pillələr olsun. Bunun üçün əlimdən gələni edirəm, edəcəyəm də. Sözlərimin səmimiliyinə inanın. Uğur qazanacağıma inanmayanlara yanlış düşündüklərini sübut edəcəyəm. Bu gücü özümdə hiss edirəm.

- Milli seçimlərdə qələbə qazanmağının əvvəlcədən razılaşdırıldığı barədə deyilir, yazılır. Maraqlısı budur ki, indi də Türkiyə mətbuatında Azərbaycanın “Eurovision-2010” müsabiqəsində birinciliyi satın aldığı barədə yazırlar dərc olunur...

- Milli seçimlər zamanı nəticə məlum olmamış mənim təmsilçi olacağımla bağlı fikirlər səslənir, mənə də bu cür suallar verilirdi. Lakin bu fikirlər, sadəcə Azərbaycanın gözlənilən uğuruna xələl gətirmək məqsədi daşıyır. Bu, beynəlxalq müsabiqədir, burada hansısa yerin satın alınmasından söhbət gedə bilməz. Bu, ağlasığmazdır, həqiqətdən çox-çox kənar bir şeydir. Hər halda bu müsabiqədə Azərbaycan layiqli yer qazanacaq. Mən buna əminəm. Bütün bu deyilənləri isə özümə yaxın buraxmıram, çünki bu cür fikirlər hazırlığıma mane ola bilər.

- Bu müsabiqədə Ermənistan Azərbaycandan daha öndə olsa, bu, sənə necə təsir edəcək?

- Bu, mahnı müsabiqəsidir və bu yarışmada mən özümü ən yüksək səviyyədə göstərəcəyəm. Qalan məsələlər məni maraqlandırmır. Sadəcə onu deyə bilərəm ki, mən özümə çox inanıram.

- “Drip drop” mahnısının seçilməsini necə qarşıladın?

- Bu mahnını ilk dəfə eşidəndə ürəyimə yatdı və çox sevdim. Məhz “Drip drop”un seçimi çox ürəyimcə oldu. Bu mahnını hər dəfə ifa edəndə və dinləyəndə yeni nələrsə tapıram. Onu oxumaq mənim üçün həm səs imkanlarım baxımından, həm də emosional tərəfdən çox rahatdır. Ümidvaram ki, Səfurə ilə “Drip Drop” Azərbaycana layiqli yer qazandıra biləcək!

- Artıq müsabiqə bukmekerlərinin səsverməsi başlayıb. Maraqlıdır ki, Azərbaycan bu səsvermələrdə birinci yerdədir...

- Bu xəbəri eşidəndə çox sevindim. Çünki bu mənim və bütün komandanın işinə verilən qiymətdir. Çox sevinirəm, ümidvaram ki, belə də qalacaq və nəticə dəyişməyəcək. Bukmekerlərin fikri çox vaxt müsabiqənin nəticələri ilə üst-üstə düşür. Bəlkə də məhz elə bundandır ki, Azərbaycan haqqında mənfi rəy yaratmaq istəyirlər...

- “Eurovision-2010” müsabiqəsində iştirak edəcək 39 ölkənin təmsilçisi və mahnısı da müəyyənləşib. Hansı ölkə təmsilçisini özünə rəqib görürsən?

- Bu suala cavab vermək çətindir. Çünki onlardan yalnız bir neçəsinin mahnısını eşitmişəm. İnanın heç təmsilçilərin mahnısını belə dinləməyə vaxt tapa bilmirəm. Amma yaxın günlərdə qulaq asacağıma söz verirəm.

- Ekspertlər hesab edir ki, bu il əsas rəqabət Azərbaycan, Danimarka və İsrail arasında gedəcək...

- Ola bilsin ki, elə belə də olacaq. Danimarkanı Nevergreen təmsil edir. O, kifayət qədər tanınmış müğənnidir. İsrail təmsilçisinin də güclü olduğunu bilirəm. Hər halda bu rəqabətdə Azərbaycanın da adının ön sıralarda çəkilməsi qürur vericidir. Bütün bunlar mənə daha çox işləmək gücü verir. Əvvəldən də bildirmişdim ki, gücümə, enerjimə inanıram. Bu inamım davam edir, müsabiqədə də inamla çıxış edəcəyəm.

- Britni Spirs, Madonna, Selin Dion kimi məşhurlarla işləyən tanınmış prodüser-bəstəkar Nikolas Fliktlə işbirliyində olmaq sənə nə verir?

- Bu işbirliyinin verdiyi hisslər çox müsbət və qarışıqdır. Bu, bir tərəfdən adama çox güc verir, digər tərəfdən isə çox böyük məsuliyyətdir. Mən hazırlıq prosesində çox şey öyrənirəm. Gələcək karyeramda da bu hazırlığın müsbət rol oynayacağından əminəm.

- Hər çıxışında anan yanında olur. Hazırlıq səfərlərində də anan yanındadır?

- Bəli, anam həmişə yanımda olurdu. Hazırlıq prosesində isə yanımda deyil, amma hər gün onunla təmasda oluram, bütün prosesi ona danışıram. Hər gün mənə məsləhətlər verir.

- Osloda “Telenor Arena”da Səfurəni hansı geyimdə görəcəyik? Səhnə geyimləri, eyni zamanda şou hazırlanırmı və geyimlər hansı ölkəyə məxsus olacaq?

- Sadəcə onu deyə bilərəm ki, hər zaman olduğu kimi, bu il də Azərbaycan fərqlənəcək. Hər bir şey super olacaq. Ancaq bunu hələlik bir sirr olaraq saxlamaq istərdim…

- Təsəvvür et ki, artıq may ayı gəlib və sən Osloda beynəlxalq medianın qarşısındasan. Azərbaycanı necə təqdim edərdin?

- Azərbaycan haqqında ən gözəl sözləri deyəcəyəm. Azərbaycan mədəniyyətinin necə tarixi köklərə dayandığını, xalqımızın nə dərəcədə sülhsevər və qonaqpərvər olduğunu bildirəcəyəm. Azərbaycan sözlərin ən gözəlinə layiqdir. Bunun üçün xüsusi hazırlaşacağam. İndi isə mənim dəstəyə çox böyük ehtiyacım var. Xalqımızdan mənə dəstək olmağı istəyirəm. Bu dəstək müsabiqədə çıxışıma da təsir edəcək. Hər zaman güclü arxa və dəstək görən insan istədiyi nəticəni qazanır. Azərbaycan naminə bu dəstəyi məndən əsirgəməyin. Mən isə xalqıma ötən ilki sevincli anları yaşadacağıma söz verirəm. Vətənə sizlərə və dəstəyinizə layiq dönəcəyimə inanıram!

“Eurovision_2010”