Şou-biznes

Ana səhifə

Şou-biznes

«Miss Azerbaijan-2010» gözəllik müsabiqəsində 24 qız mübarizə aparacaq

10 aprel 2010 12:58 (UTC +04:00)

APA-nın məlumatına görə, bununla bağlı bu gün müsabiqənin təşkilat komitəsi mətbuat konfransı keçirib.

Konfransda çıxış edən «Miss Azerbaijan-2010» müsabiqəsinin prodüseri Nazim Səmədov bildirib ki, ümumilikdə müsabiqədə iştirak etmək üçün 80-a yaxın qız təşkilat komitəsinə müraciət edib: «Müraciət edənlər arasında müsabiqənin şərtlərinə uyğun olmayanlar, eyni zamanda digər ölkə vətəndaşları da iştirak etmək istəyib. Onlar arasında Rusiya, Britaniya, Estoniya vətəndaşları olub, ancaq biz əvvəlcədən elan etmişdik ki, yarışmada ancaq Azərbaycan vətəndaşı olanlar iştirak edə bilər».

Qeyd edək ki, seçim 10 nəfərlik münsiflər heyəti tərəfindən aparılıb və sonda 30 yarımfinalçı müəyyənləşib. Lakin bunlardan 6-sı müəyyən səbəblərə görə müsabiqədə iştirakdan imtina edib. Yarışmaya qatılmayan 3 qızın valideynləri övladlarının müsabiqədə iştirak etməsinə qarşı çıxıb.

N.Səmədov bildirib ki, münsiflər heyətinə əməkdar incəsənət xadimi, modelyer Fəxriyyə Xələfova və bir neçə tanınmış simalar dəvət olunub. Mətbuat konfransında iştirak edən münsiflər heyətinin üzvü F.Xələfova Azərbaycanda yenidən gözəllik müsabiqəsinin keçirilməsini olduqca müsbət qarşılayıb: «Azərbaycanda ilk gözəllik müsabiqəsi 1997-ci ildə keçirilib. Əgər bu ənənə varsa, nədən müsabiqə bu il keçirilməsin. Beynəlxalq aləm bu cür yarışlarda çox maraqlıdır. Müsabiqə iştirakçılarından heç bir məsləhətimi əsirgəməyəcəyəm. Həm lazımi məsləhətlər verəcəyəm, həm geyim baxımından iştirakçıları təmin edəcəyəm, həm də obyektiv münsif kimi öz seçimimi edəcəyəm».

Mayın 23-də Heydər Əliyev Sarayında keçiriləcək final konsertində Rumıniyanın «Morandi» qrupu, «Ricci&Poveri» qrupları çıxış edəcək. Tanınmış rusiyalı şoumen Leonid Yakuboviç isə «Miss Azerbaijan-2010» müsabiqəsini idarə edəcək.

Müsabiqənin bədii rəhbəri, «Fashion Models School» model agentliyinin rəhbəri Lyubov Qutorova bildirib ki, yarımfinala keçmiş qızlar üzərində hazırda ciddi hazırlıq işlər aparılır. Təşkilatçılar bildiriblər ki, aprelin 12-də «Miss İntellekt» və «Miss İstedad», aprelin 16-da «Miss İdman», aprelin 23-də «Miss Top-model» nominasiyalarının təqdimatının, aprelin 27-də «Miss Azerbaijan-2010» müsabiqəsinin 14 finalçısının müəyyən edilməsi nəzərdə tutulur.