Şou-biznes

Ana səhifə

Şou-biznes

Bakıda səfərdə olan 50 Cent Azərbaycan haqqında film çəkəcək - FOTOSESSİYA

Bakıda səfərdə olan 50 Cent Azərbaycan haqqında film çəkəcək - <font color=red>FOTOSESSİYA</font>

10 aprel 2010 15:03 (UTC +04:00)

APA-nın məlumatına görə, Azərbaycan paytaxtına ilk dəfə qonaq gələn dünya ulduzu bu gün yerli mətbuat nümayəndələri ilə görüşüb.

Konfransa nə az, nə çox 1 saat gecikən reper media mənsublarının qarşısına idman geyimində çıxıb. İlk əvvəl Azərbaycan xalqını salamlayan 50 Cent Bakıda olmaqdan məmnunluğunu bildirib. Reper ilk dəfə Azərbaycanda olduğunu diqqətə çatdıraraq, bu səfər çərçivəsində Bakını gəzəcəyini deyib: «Hava limanından enəndən sonra birbaşa mehmanxanaya gəlmişəm. Ona görə də indi heç bir şey deyə bilməyəcəyəm. Mən Bakı haqqında çox məlumatlı deyiləm. Amma bu səfərdə Azərbaycan haqqında məlumat toplayacağam. Özümlə video-kamera da gətirmişəm ki, Bakıda keçirdiyim günləri, gəzəcəyim hər yeri lentə alım və arxivimə daxil edim».

İki aydır turneyə çıxan reper sonuncu səfərinin Azərbaycan olduğunu deyib. Eminemi özünə rəqib bilmədiyini deyən 50 Cent Castin Timberleyklə duet oxuduğunu etiraf edib. 50 Cent hazırda ən böyük arzusunun yeni açdığı kinoşirkətin işə başlaması olduğunu deyib: «Arzularım həyata keçir. Ancaq hazırda ən böyük arzum açdığım yeni film şirkətinin işini başlatmaqdır. Azərbaycandan qayıdandan sonra ilk işim bu şirkətdə yeni filmin çəkilişlərini başlamaq olacaq. Bu filmdə özüm də oynayacağam. Eyni zamanda mənim Azərbaycan haqqında da film çəkmək niyyətim var. Burda aparacağım çəkilişlərdən ibarət Azərbaycan haqqında film çəkəcəyəm».

Daha sonra 50 Cent yeni albomunun hazırlandığını bildirib və bu albomun yay aylarında hazır olacağını deyib: «İstəyirəm hər işim peşəkar olsun. Repersevərlərə peşəkar albom təqdim etmək üçün albomun hazırlığı bu qədər uzun çəkdi». Dünyaca tanınmış reperlə mətbuat konfransı əvvəlcədən də xəbərdarlıq edildiyi kimi 20 dəqiqə davam edib.

Qeyd edək ki, 50 Centin Bakıya səfərinin təşkilatçısı «Korsika Lounge», PR təşkilatçısı «Sky Group», mid-agent isə «Mamedia» şirkətidir. Konsert proqramının əsas məqsədi həm də reperin «Before I Self Destruct» adı ilə satışa çıxardığı yeni albomunun tanıtımıdır. «Buta Palace»ın səhnəsində 50 Centlə yanaşı tanınmış rep qrupu «G-Unit»in məşhur simaları Lloyd Banks, Toni Yayo və DJ Who Kidd çıxış edəcəklər. Konsertin daha bir sürprizi isə Azərbaycanın tanınmış rep qrupu «Dəyirman»ın iştirakı ilə bağlıdır. 50 Centin çıxışından sonra, dünyada tanınmış rəqs brendi olan «Unidance»ın rəqqasları və azərbaycanlı Dj Mansur disko-proqramı davam etdirəcəklər.